❝കനേഡിയൻ🇨🇦🔥അത്ഭുത ബാലനു⚡🤩 പിറകെ യൂറോപ്പിലെ വമ്പൻമാർ💰⚽എല്ലാം ഇറങ്ങിയിട്ടുണ്ട്…❞

ജക്കീലെ മാര്‍ഷല്‍-റുട്ടി എന്ന അത്ഭുത ബാലന് പിന്നാലെയാണ് യൂറോപ്പിലെ വമ്പൻ ക്ലബ്ബുകൾ . ചെല്‍സിയും മാഞ്ചസ്റ്റര്‍ യുനൈറ്റഡും മാഞ്ചസ്റ്റര്‍ സിറ്റിയും ബയേണ്‍ മ്യൂണിക്കും യുവെന്റസും ഈ പതിനാറ് വയസുകാരനെ സ്വന്തമാക്കാന്‍ മത്സരിക്കുകയാണ്. പതിനെട്ട് വയസ് പൂര്‍ത്തിയാക്കാതെ ഇംഗ്ലീഷ് പ്രീമിയര്‍ ലീഗ് വമ്പന്‍മാര്‍ക്കൊന്നും ഈ ടീനേജ് പ്ലെയറെ ടീമിലെത്തിക്കാന്‍ സാധിക്കില്ല. പക്ഷേ, മാഞ്ചസ്റ്റര്‍ സിറ്റി കോച്ച് പെപ് ഗോര്‍ഡിയോള 16 കാരനുമായി രഹസ്യമായൊരു കരാറുണ്ടാക്കാന്‍ ക്ലബ്ബ് മാനേജ്‌മെന്റിന് നിര്‍ദേശം നല്‍കിയെന്നാണ് റിപ്പോർട്ടുകളുണ്ട് .

യൂറോപ്പിലെ പ്രമുഖ ക്ലബ്ബുകള്‍ ഒരു പതിനാറ് വയസുകാരൻ വിങ്ങറെ സ്വന്തം പാളയത്തിലെത്തിക്കാന്‍ ഇത്രയേറെ അണിയറ നീക്കങ്ങള്‍ നടത്തുന്നുണ്ടെങ്കില്‍ അവന്‍ ഒരു അത്ഭുതം തന്നെയാവണം.2004 ജൂണില്‍ ജനിച്ച മാര്‍ഷല്‍-റുട്ടി കഴിഞ്ഞ ഒക്ടോബറിലാണ് മേജര്‍ ലീഗ് സോക്കറില്‍ അരങ്ങേറിയത്. കാനഡക്കായി അണ്ടര്‍ 15 വയസ് കാറ്റഗറിക്ക് മുകളില്‍ ഇനിയും അരങ്ങേറിയിട്ടില്ലാത്ത മാര്‍ഷല്‍ റുട്ടിയെ എം എല്‍ എസ് ടീമായ ടൊറോന്റോ സീനിയര്‍ ടീമില്‍ കളിക്കാനിറക്കിയത് വലിയ വാര്‍ത്താപ്രാധാന്യം നേടിയിരുന്നു.

ഫിലാഡല്‍ഫിയ യൂണിയനെതിരായ മത്സരത്തില്‍ മുന്‍ സ്വാന്‍സി മിഡ്ഫീല്‍ഡര്‍ അലെസാന്‍ഡ്രൊ പൊസ്വുലോയുടെ പകരക്കാരനായിട്ടായിരുന്നു റുട്ടി കളത്തിലിറങ്ങിയത്.കഴിഞ്ഞ മാസം കാനഡയുടെ സീനിയര്‍ ടീമിലേക്കും റുട്ടിക്ക് വിളി വന്നു. ട്രെയ്‌നിംഗ് ക്യാമ്പില്‍ പങ്കെടുത്തതോടെ കാനഡയുടെ ദേശീയ ടീമില്‍ ഇടം പിടിച്ച ഏറ്റവും പ്രായം കുറഞ്ഞ താരമെന്ന റെക്കോര്‍ഡ് റുട്ടിക്ക് സ്വന്തമായി. തകര്‍ത്തത് ബയേണ്‍ മ്യൂണിക്കിന്റെ ലെഫ്റ്റ് ബാക്ക് അല്‍ഫോണ്‍സോ ഡാവീസിന്റെ റെക്കോര്‍ഡ്.


പന്ത്രണ്ടാം വയസിലാണ് റുട്ടിയിലെ പ്രതിഭയെ ഫുട്‌ബോള്‍ ലോകം തിരിച്ചറിഞ്ഞത്. ഡല്ലാസ് കപ്പില്‍ ലാ ലിഗ ക്ലബ്ബിനെതിരെ ടൊറോന്റോക്കായി റുട്ടി പന്തുമായി ആടിത്തിമിര്‍ക്കുകയായിരുന്നു. പതിനാലാം വയസില്‍, 2018 ഡിസംബറിലാണ് റുട്ടി പ്രൊഫഷണലാകുന്നത്. ടൊറോന്റോയുടെ രണ്ടാം നിര ടീമിനായി കളിച്ചു കൊണ്ടായിരുന്നു അത്. 2020 ജനുവരിയില്‍, ടൊറോന്റോയുടെ സീനിയര്‍ ടീമിലെ ഏറ്റവും പ്രായം കുറഞ്ഞ താരമായി റുട്ടി.

ചെറിയ പ്രായത്തിലേ വന്ന പ്രശസ്തി തന്നെ ബാധിക്കാതെ നോക്കാന്‍ ബദ്ധശ്രദ്ധ കാണിക്കുന്നുണ്ട് യുവതാരം. ഡേവീസിന്റെ റെക്കോര്‍ഡ് ബ്രേക്ക് ചെയ്ത താരം എന്നത് വലിയ നേട്ടമായി കാണുന്നില്ല. ഡേവീസ് എന്ന വലിയ താരത്തിന്റെ പേരിനൊപ്പം തന്റെ പേരും ചേര്‍ന്ന് വരുന്നതില്‍ അഭിമാനിക്കുന്നു. എനിക്ക് ഏറെ മുന്നോട്ട് പോകാനുണ്ട്, ഒന്നുമായിട്ടില്ല – റുട്ടിയുടെ വാക്കുകളില്‍ പക്വത കാണാവുന്നതതാണ്.

യൂറോപ്പിലെ വലിയ ക്ലബ്ബിന്റെ താരമാകുന്നതോടെ 2026 ലോകകപ്പില്‍ കാനഡയുടെ ദേശീയ ഹീറോ മാര്‍ഷല്‍ റുട്ടിയായിരിക്കും. ഡേവീസും ജൊനാഥന്‍ ഡേവിയും ഉള്‍പ്പെടുന്ന താരനിരയിലെ രാജകുമാരനായി റുട്ടിയെ ഫുട്‌ബോള്‍ പ്രേമിക്ക് കാണാന്‍ സാധിക്കും. കാനഡ, യു എസ് എ, മെക്‌സിക്കോ എന്നിവിടങ്ങളിലായിട്ടാണ് 2026 ലോകകപ്പ്.