ലോകകപ്പിനുള്ള അർജന്റീന ടീം ഖത്തറിലെത്തി. ഇന്നലെ യുണൈറ്റഡ് അറബ് എമിറേറ്റ്‌സിനെതിരായ സൗഹൃദ മത്സരത്തിന് ശേഷം അർജന്റീന ടീം അബുദാബിയിൽ നിന്ന് ഖത്തറിലേക്ക് പുറപ്പെട്ടു. ഇപ്പോൾ അർജന്റീനിയൻ ദേശീയ ടീം തങ്ങളുടെ ഔദ്യോഗിക ട്വിറ്റർ ഹാൻഡിലിലൂടെ ദോഹയിൽ ഇറങ്ങിയതായി അറിയിച്ചു. ലയണൽ മെസ്സിയുടെ ദോഹയിലേക്കുള്ള വരവ് ഉൾപ്പെടെയുള്ള താരങ്ങളുടെ ചിത്രങ്ങൾ അർജന്റീന ട്വിറ്ററിൽ പങ്കുവച്ചു.
ഇന്നലെ യുണൈറ്റഡ് അറബ് എമിറേറ്റ്‌സിനെതിരായ സൗഹൃദ മത്സരത്തിൽ അർജന്റീന 5-0ന് ജയിച്ചു. എയ്ഞ്ചൽ ഡി മരിയ ഇരട്ട ഗോളുകൾ നേടിയപ്പോൾ ജൂലിയൻ അൽവാരസ്, ലയണൽ മെസ്സി, ജോക്വിൻ കൊറിയ എന്നിവർ അർജന്റീനയ്ക്കായി മറ്റു ഗോളുകൾ നേടി. മുഹമ്മദ് ബിൻ സായിദ് സ്റ്റേഡിയത്തിൽ നടന്ന മത്സരത്തിന് ശേഷം അബുദാബിയിൽ നിന്ന് ദോഹയിലേക്ക് നേരിട്ട് പോവുകയായിരുന്നു അര്ജന്റീന ടീം.
അബുദാബിയിൽ നിന്നുള്ള ദൃശ്യങ്ങളും വിമാനത്തിനുള്ളിലെ ദൃശ്യങ്ങളും ആൽബിസെലെസ്‌റ്റ് ടോക്ക് പുറത്തുവിട്ടു. അർജന്റീന ഡിഫൻഡർ ഒട്ടമെൻഡിയാണ് ദൃശ്യങ്ങൾ പകർത്തിയത്. വീഡിയോയിൽ, ഒട്ടമെൻഡി ഓരോ കളിക്കാരന്റെയും പേര് പരാമർശിക്കുന്നു. ഖത്തറിലെത്തിയ ശേഷം ടീമിന്റെ ഔദ്യോഗിക ട്വിറ്റർ ഹാൻഡിൽ താരങ്ങൾ വിമാനത്തിൽ നിന്ന് ഇറങ്ങുന്നതിന്റെ ചിത്രങ്ങളും മറ്റും പങ്കുവെച്ചിരുന്നു.
Argentina National Team are on its way to Qatar! 🇦🇷
— All About Argentina 🛎🇦🇷 (@AlbicelesteTalk) November 16, 2022
The Plane review by Otamendi 🛩️😂
LA MANIJA 🇶🇦 pic.twitter.com/3raNQOffcg
ഖത്തറിലെത്തിയ അർജന്റീന ടീമിന്റെ തുടർ പരിപാടികൾ ഇന്ന് അപ്‌ഡേറ്റ് ചെയ്യുമെന്ന് അർജന്റീന ദേശീയ ടീം അറിയിച്ചു. അർജന്റീനയുടെ ആദ്യ ലോകകപ്പ് മത്സരം നവംബർ 22 ന് സൗദി അറേബ്യക്കെതിരെയാണ്. തുടർന്ന് അർജന്റീന നവംബർ 27 ന് മെക്സിക്കോയെയും ഡിസംബർ 1 ന് പോളണ്ടിനെയും നേരിടും. ലോകകപ്പിന് മുന്നോടിയായുള്ള അർജന്റീനയുടെ പരിശീലന സെഷനുകളുടെ ഷെഡ്യൂൾ അർജന്റീന ദേശീയ ടീം ഉടൻ പ്രസിദ്ധീകരിക്കും.
