❝എന്ത് കൊണ്ട് ഈ സൂപ്പർ താരങ്ങൾ ആഴ്സണലിൽ എത്തിയില്ല? ❞ കാരണം വെളിപ്പെടുത്തി മുന്‍ പരിശീലകൻ

ഇംഗ്ലീഷ് പ്രീമിയര്‍ ലീഗ് ക്ലബ്ബായ ആഴ്‌സണലിനെ രണ്ട് ദശാബ്ദത്തിലേറെ പരിശീലിപ്പിച്ച ആര്‍സെന്‍ വെംഗര്‍ പ്രീമിയർ ലീഗിലെ ഏറ്റവും മികച്ച പരിശീലകരിൽ ഒരാളായാണ് അറിയപ്പെടുന്നത്.. യുവപ്രതിഭകളെ കണ്ടെത്തുകയും പ്ലെയിംഗ് ഇലവനില്‍ അവസരം നല്‍കുകയും ചെയ്താണ് ആര്‍സെന്‍ വെംഗര്‍ ആഴ്‌സണലിനെ പ്രീമിയര്‍ ലീഗിലെ മുന്‍ നിര ക്ലബ്ബാക്കി മാറ്റിയത്. മറ്റ് ടീമുകള്‍ സീനിയര്‍ താരങ്ങളെ അണിനിരത്തുമ്പോള്‍ ഏറ്റവും പ്രായം കുറഞ്ഞ നിരയുമായിട്ടാണ് വെംഗര്‍ തന്റെ ടീമിനെ കളത്തിലിറക്കിയത്.


ലോകഫുട്‌ബോളിലെ ഇതിഹാസ താരങ്ങളായി മാറിയ ക്രിസ്റ്റിയാനോ റൊണാള്‍ഡോയും ലയണല്‍ മെസിയും ആര്‍സെന്‍ വെംഗറുടെ ശ്രദ്ധയില്‍ പെട്ടവരാണ്. ഇവരെ ആഴ്‌സണലിലെത്തിക്കാന്‍ വെംഗര്‍ ശ്രമിച്ചിരുന്നു. അതുപോലെ, ഇപ്പോഴത്തെ സൂപ്പര്‍ താരം കിലിയന്‍ എംബാപെയെയും ആഴ്‌സണലിലെത്തിക്കാന്‍ വെംഗര്‍ നീക്കം നടത്തിയിരുന്നു. ക്രിസ്റ്റ്യാനോ റൊണാള്‍ഡോ ഒരഭിമുഖത്തില്‍ വ്യക്തമാക്കിയതാണ് ആഴ്‌സണലിലേക്കുള്ള ട്രാന്‍സ്ഫര്‍ നീക്കത്തെ കുറിച്ച്. ഏറെക്കുറെ കരാര്‍ ഉറപ്പിക്കാനായപ്പോഴാണ് മാഞ്ചസ്റ്റര്‍ യുനൈറ്റഡ് സ്‌പോര്‍ട്ടിംഗ് ലിസ്ബണ്‍ താരമായിരുന്ന ക്രിസ്റ്റിയാനോയെ റാഞ്ചിയത്.


2003 ആഗസ്റ്റിലായിരുന്നു 12.24 മില്യണ്‍ പൗണ്ടിന്റെ ട്രാന്‍സ്ഫര്‍. അന്ന് ക്രിസ്റ്റ്യാനോയെ ആഴ്‌സണലിന്റെ റഡാറില്‍ നിന്ന് അകറ്റിയത് മാഞ്ചസ്റ്ററിന്റെ പോര്‍ച്ചുഗീസുകാരനായ അസിസ്റ്റന്റ് കോച്ച് കാര്‍ലോസ് ക്വുറോസാണെന്ന് വെംഗര്‍ വെളിപ്പെടുത്തി. 2002 ല്‍ അലക്‌സ് ഫെര്‍ഗൂസന്റെ അസിസ്റ്റന്റ് ആയി മാഞ്ചസ്റ്ററിലെത്തിയ ക്വുറോസിന്ക്രിസ്റ്റിയാനോ റൊണാള്‍ഡോ എന്ന യുവപ്രതിഭയെ കുറിച്ച് നല്ല ധാരണയുണ്ടായിരുന്നു.ട്രാന്‍സ്ഫറില്‍ സ്‌പോര്‍ട്ടിംഗ് ലിസ്ബണിന്റെ യുവതാരത്തെ ഫെര്‍ഗൂസന്‍ ഉള്‍പ്പെടുത്താന്‍ തീരുമാനിച്ചത് ക്വറോസ് നല്‍കിയ ഉറപ്പാണ്.

2003 ല്‍ ക്രിസ്റ്റ്യാനോ മാഞ്ചസ്റ്ററിലേക്ക് ചേക്കേറിയപ്പോള്‍ ആഴ്‌സണലിലേക്ക് വെംഗര്‍ കണ്ടുവെച്ചത് ബാഴ്‌സയുടെ അക്കാദമിയിലെ മൂന്ന് പ്രതിഭകളെ.മെസി, ഫാബ്രിഗസ്, ജെറാര്‍ഡ് പീക്വെ. 1987 ജനറേഷനില്‍ പെട്ട മൂന്ന് പേരും ഒരുമിച്ച് കളിക്കുന്നവര്‍. ഇവരെ ഒരുമിച്ച് ലഭിച്ചാല്‍ ആഴ്‌സണലിന് ഗുണം ചെയ്യുമെന്ന് വെംഗര്‍ കണക്ക് കൂട്ടി.

പക്ഷെ, പീക്വെയെ മാഞ്ചസ്റ്റര്‍ യുനൈറ്റഡ് റാഞ്ചി. ഫാബ്രിഗസിനെ വെംഗറിന് ലഭിച്ചു. മെസിയെ ബാഴ്‌സലോണ വിട്ടു നല്‍കിയില്ല. മൊണാക്കോയുടെ അക്കാദമിയില്‍ നിന്ന് കിലിയന്‍ എംബാപെയുടെ പ്രതിഭ തിരിച്ചറിഞ്ഞ ആര്‍സെന്‍ വെംഗര്‍ ആഴ്‌സണലിന്റെ ഭാവിതാരമാക്കാന്‍ തീരുമാനിച്ചു. എന്നാല്‍, പി എസ് ജി 166 മില്യണ്‍ പൗണ്ടിന്റെ റെക്കോര്‍ഡ് ട്രാന്‍സ്ഫറില്‍ എംബാപെയെ റാഞ്ചി.