❝ പാതി വഴിയിൽ 🤦‍♂️🖤 എത്തിയപ്പോൾ
🏆⚽ കോപ്പ അമേരിക്ക വീണ്ടും
പ്രതിസന്ധിയിലേക്ക്, 52 പേര്‍ക്ക് കൊവിഡ് ❞

ഏറെ പ്രതിസന്ധികൾക്കും വിവാദങ്ങൾക്കൊടുവിലാണ് കോപ്പ അമേരിക്ക ടൂര്‍ണമെന്റിന് തുടക്കമായത്. എന്നാൽ നിലവിലെ സാഹചര്യത്തിൽ ടൂര്‍ണമെന്റ് പാതിവഴിയില്‍ ഉപേക്ഷിക്കേണ്ടിവരുമോ എന്ന ആശങ്കയിലാണ് സംഘാടകര്‍. ടൂര്‍ണമെന്റിനെത്തിയ കളിക്കാരും ഒഫീഷ്യലുകളുമായി 52 പേര്‍ക്കാണ് കൊവിഡ് 19 സ്ഥിരീകരിച്ചത്. ഓരോദിവസവും ടീമുകള്‍ക്കിടയില്‍ കൊവിഡ് റിപ്പോര്‍ട്ട് ചെയ്യുന്നത് വര്‍ധിച്ചുവരികയാണ്.

വെനസ്വെലന്‍ ടീമിലെ പന്ത്രണ്ടോളം പേര്‍ക്കാണ് രോഗബാധ ഉണ്ടായത്. ടീമുകള്‍ക്കെല്ലാം സംഘാടകര്‍ മുന്നറിയിപ്പ് നല്‍കിയിട്ടുണ്ട്. കടുത്ത സുരക്ഷാ മാനദണ്ഡങ്ങള്‍ പാലിച്ചില്ലെങ്കില്‍ രോഗബാധ വര്‍ധിക്കുമെന്ന് സംഘാടകര്‍ പറയുന്നു. ബ്രസീലില്‍ കൊവിഡ് 19 മൂന്നാം തരംഗം ആരംഭിക്കുകയാണെന്നാണ് ആരോഗ്യവിദഗ്ധര്‍ സൂചിപ്പിക്കുന്നത്. രോഗബാധ വര്‍ധിച്ചുവരികയും ടീമുകള്‍ക്ക് സമ്മര്‍ദ്ദമുണ്ടാവുകയും ചെയ്താല്‍ ടൂര്‍ണമെന്റ് പാതിവഴിയില്‍ ഉപേക്ഷിക്കേണ്ടിവരും.

ടൂര്‍ണമെന്റുമായി ബന്ധപ്പെട്ട് ഇതുവരെ 3,000ത്തില്‍ അധികം ടെസ്റ്റുകള്‍ നടത്തി. കഴിഞ്ഞദിവസം പെറു സംഘത്തിലെ ഫിറ്റ്‌നസ് കോച്ചുമാര്‍ക്ക് രോഗം കണ്ടെത്തിയിരുന്നു. കൊളംബിയന്‍ ടെക്‌നിക്കല്‍ അസിസ്റ്റന്റ് പാബ്ലോ റോമനും ഫിസിയോതെറാപ്പിസ്റ്റ് കാര്‍ലോസ് എന്റേനയ്ക്കും രോഗം സ്ഥിരീകരിച്ചു. വെനസ്വെലന്‍ സംഘത്തിലേക്ക് പുതുതായി 15 കളിക്കാരെ കൂടി കൊണ്ടുവരാനാണ് തീരുമാനം. ബൊളീവിയയുടെ മൂന്നു കളിക്കാര്‍ക്കും ഒരു പരിശീലകനും രോഗമുണ്ടെന്ന് അറിയിച്ചിട്ടുണ്ട്.

അര്‍ജന്റീനയില്‍ കൊവിഡ് 19 കേസുകള്‍ വര്‍ധിച്ചുവരുന്ന സാഹചര്യത്തിലാണ് ടൂര്‍ണമെന്റ് ബ്രസീലിലേക്ക് മാറ്റിയത്. ഇത് ബ്രസീലിയന്‍ ജനതയുടേയും കളിക്കാരുടേയും എതിര്‍പ്പിനിടയാക്കിയിരുന്നു. ടൂര്‍ണമെന്റ് മുന്നോട്ടുപോവുകയും കൂടുതല്‍ കളിക്കാര്‍ക്ക് രോഗം സ്ഥിരീകരിക്കുകയും ചെയ്താല്‍ ബ്രസീല്‍ സര്‍ക്കാര്‍ വിമര്‍ശനം നേരിടേണ്ടിവരും. നേരത്തെ ലയണല്‍ മെസ്സി ഉള്‍പ്പെടെയുള്ളവര്‍ രോഗഭീതിയുണ്ടെന്ന് അറിയിച്ചിരുന്നു.

Rate this post