രണ്ടു ഗോളടിച്ച് കിരീടം നേടികൊടുത്തിട്ടും പ്ലെയർ ഓഫ് ദ ടൂർണമെന്റ് അവാർഡില്ല , പ്രതിഷേധവുമായി റൊണാൾഡോ |Cristiano Ronaldo

കിംഗ് ഫഹദ് സ്റ്റേഡിയത്തിൽ നടന്ന അറബ് ക്ലബ് ചാമ്പ്യൻസ് ക്ലബ് ഫൈനലിൽ അൽ ഹിലാലിനെതിരെ 2-1 ന്റെ വിജയത്തോടെ ക്രിസ്റ്റ്യാനോ റൊണാൾഡോ ഒടുവിൽ അൽ നാസറിനൊപ്പം തന്റെ ആദ്യ ട്രോഫി നേടി. 2022 ഫിഫ ലോകകപ്പിന് ശേഷം റൊണാൾഡോ അൽ നാസറിലേക്ക് മാറിയെങ്കിലും അവരെ ലീഗ് കിരീടത്തിലേക്ക് നയിക്കുന്നതിൽ പരാജയപ്പെട്ടു.

സൗദി പ്രോ ലീഗിൽ അൽ നാസർ രണ്ടാം സ്ഥാനത്താണ് ഫിനിഷ് ചെയ്തത്.ഫൈനലിൽ രണ്ട് ഗോളുകൾ ഉൾപ്പെടെ പോർച്ചുഗൽ സൂപ്പർ താരം 6 ഗോളുകൾ ടൂർണമെന്റിൽ നേടി.51-ാം മിനിറ്റിൽ അൽ ഹിലാൽ മൈക്കിൾ നേടിയ ഗോളിൽ മുന്നിലെത്തി.74-ാം മിനിറ്റിൽ റൊണാൾഡോ സമനില പിടിച്ചു, തുടർന്ന് അധികസമയത്ത് വിജയ ഗോളും നേടി.അൽ നാസർ താരങ്ങളായ അബ്ദുല്ല അൽ-അമ്രി, നവാഫ് ബൗഷൽ എന്നിവർക്ക് ചുവപ്പ് കാർഡ് ലഭിക്കുകയും ചെയ്തു.അൽ നാസറിനൊപ്പം തന്റെ ആദ്യ കിരീടം നേടിയിട്ടും, മികച്ച കളിക്കാരനുള്ള അവാർഡ് നൽകാത്തതിനെത്തുടർന്ന് റൊണാൾഡോ നിരാശനായി.

അത് അൽ ഹിലാലിന്റെ സെർഗെജ് മിലിങ്കോവിച്ച്-സാവിക് സ്വീകരിച്ചു. അതിനുശേഷം മുൻ മാഞ്ചസ്റ്റർ യുണൈറ്റഡ് താരത്തിന്റെ ഒരു വീഡിയോ വൈറലായിട്ടുണ്ട്, അദ്ദേഹം ഈ തീരുമാനത്തിൽ ദേഷ്യപ്പെടുകയും പ്രതിഷേധിക്കുകയും ചെയ്തു.തന്നെ മികച്ച താരമായി തിരഞ്ഞെടുക്കുമെന്നാണ് റൊണാൾഡോ കരുതിയതെന്ന് താരത്തിന്റെ മുഖഭാവത്തിൽ നിന്നും വ്യക്തമാണ്. അതിനു പിന്നാലെ അടുത്ത് നിൽക്കുന്ന ഒഫീഷ്യലിനോട് റൊണാൾഡോ പ്രതിഷേധരൂപേണെ എന്തോ പറയുന്നതും വീഡിയോ ദൃശ്യങ്ങളിൽ നിന്നും വ്യക്തമാണ് തീരുമാനത്തിൽ അതൃപ്തിയുണ്ടെങ്കിലും ട്രോഫി നേടിയതിൽ റൊണാൾഡോ സന്തോഷം പ്രകടിപ്പിച്ചു.

ട്വിറ്ററിൽ അദ്ദേഹം കുറിച്ചു, “ഈ സുപ്രധാന ട്രോഫി ആദ്യ തവണ നേടാൻ ടീമിനെ സഹായിച്ചതിൽ അങ്ങേയറ്റം അഭിമാനമുണ്ട്! ഈ മഹത്തായ നേട്ടത്തിൽ പങ്കാളികളായ ക്ലബ്ബിലെ എല്ലാവർക്കും നന്ദി, എപ്പോഴും എന്റെ കൂടെ നിന്നതിന് എന്റെ കുടുംബത്തിനും സുഹൃത്തുക്കൾക്കും നന്ദി! ഞങ്ങളുടെ ആരാധകരുടെ മികച്ച പിന്തുണ! ഇതും നിങ്ങൾക്കുള്ളതാണ്!”.

പരുക്ക് മൂലം അധികസമയത്ത് റൊണാൾഡോ കരഞ്ഞുകൊണ്ട് കളം വിടുന്നതും മത്സരത്തിൽ കണ്ടു. അതേസമയം, അൽ നാസർ ഹെഡ് കോച്ച് ലൂയിസ് കാസ്ട്രോയും മത്സരത്തിന് ശേഷം റൊണാൾഡോയുടെ പരിക്കിനെക്കുറിച്ച് സംസാരിച്ചു. പരിക്ക് മാറി ക്രിസ്റ്റ്യാനോ റൊണാൾഡോ എത്രയും വേഗം തിരിച്ചെത്തുമെന്നും അദ്ദേഹം പറഞ്ഞു.