❝യൂറോപ്യന്‍ 🏆👑 ഫുട്‌ബോളിന്റെ ഭരണം
ഏറ്റെടുക്കാൻ ഒരുങ്ങുന്ന ⚽🔥 ഇംഗ്ലീഷ്
വമ്പന്മാരുടെ പടയോട്ടം❞

യൂറോപ്യന്‍ ക്ലബ്ബ് ഫുട്‌ബോളില്‍ കരുത്തറിയിക്കുന്നത് ഇംഗ്ലീഷ് പ്രീമിയര്‍ ലീഗ് ടീമുകള്‍. യുവേഫ ചാമ്പ്യന്‍സ് ലീഗിലും യൂറോപ ലീഗയിലും സെമിഫൈനല്‍ ലൈനപ്പ് റെഡിയായപ്പോള്‍ കൂടുതല്‍ ടീമുകള്‍ ഇംഗ്ലീഷ് പ്രീമിയര്‍ ലീഗില്‍ നിന്നാണ്.ചാമ്പ്യന്‍സ് ലീഗില്‍ ചെല്‍സിയും മാഞ്ചസ്റ്റര്‍ സിറ്റിയും സെമിയിലുണ്ട്. യൂറോപ ലീഗയില്‍ മാഞ്ചസ്റ്റര്‍ യുനൈറ്റഡും ആഴ്‌സണലും അവസാന നാലില്‍ ഇടം പിടിച്ചു. രണ്ട് പ്രധാന ചാമ്പ്യന്‍ഷിപ്പിലും ആള്‍ ഇംഗ്ലണ്ട് ഫൈനല്‍ സാധ്യത തള്ളിക്കളയാനാകില്ല. അങ്ങനെ വന്നാല്‍, യുവേഫ സൂപ്പര്‍ കപ്പ് ഇംഗ്ലീഷ് പോരിന് വേദിയാകും.



യുവേഫ ചാമ്പ്യന്‍സ് ലീഗില്‍ ചെല്‍സിക്ക് നേരിടേണ്ടത് സിനദിന്‍ സിദാന്റെ റയല്‍ മാഡ്രിഡിനെയാണ്. എഫ് സി പോര്‍ട്ടോയെ ആദ്യ പാദത്തില്‍ തോല്‍പ്പിച്ചതിന്റെ ബലത്തിലാണ് ചെല്‍സിയുടെ മുന്നേറ്റം. റയല്‍ ടിക്കറ്റുറപ്പിച്ചത് ലിവര്‍പൂളിനെ അവരുടെ തട്ടകത്തില്‍ ഗോളില്ലാ കളിയില്‍ പിടിച്ചു കെട്ടിയിട്ടാണ്.മാഞ്ചസ്റ്റര്‍ സിറ്റിയുടെ ജയം ജര്‍മന്‍ ക്ലബ്ബ് ബൊറുസിയഡോട്മുണ്ടിനെതിരെയായിരുന്നു. ഇരുപാദത്തിലും 2-1 മാര്‍ജിനില്‍ ജയിക്കാന്‍ പെപ് ഗോര്‍ഡിയോളയുടെ സംഘത്തിന് സാധിച്ചു. ഏപ്രില്‍ 27,28ന് ആദ്യ പാദ സെമിയും മെയ് 4,5ന് രണ്ടാം പാദസെമിയും നടക്കും. ഫൈനല്‍ മെയ് 29ന്.

യൂറോപ ലീഗയില്‍ മാഞ്ചസ്റ്റര്‍ യുനൈറ്റഡ് ക്വാര്‍ട്ടര്‍ കടമ്പ താണ്ടിയത് അനായാസമായിരുന്നു . സ്പാനിഷ് ക്ലബ്ബ് ഗ്രനഡയെ ഇരുപാദത്തിലുമായി 4-0നാണ് തകര്‍ത്തത്. ആഴ്‌സണലിന്റെ സ്ഥിതിയും വ്യത്യസ്ഥമല്ല. സ്ലാവിയ പ്രാഗിനെ രണ്ടാം പാദത്തില്‍ അവരുടെ തട്ടകത്തില്‍ 4-0നാണ് ആഴ്‌സണല്‍ തകര്‍ത്തു വിട്ടത്. അയാക്‌സിനെ കീഴടക്കിയ റോമയും ഡിനാമോ സാഗ്രെബിനെ തോല്‍പ്പിച്ച് വിയ്യാറയലും യൂറോപ ലീഗയില്‍ സെമിയിലെത്തിയിട്ടുണ്ട്.