❝ പ്രീ ക്വാർട്ടർ 👑🏆 പോരാട്ടങ്ങളുടെ
തുടക്കം⚽👌 തന്നെ 🔥ആവേശോജ്വലം
ഇറ്റലിയും🇮🇹🇩🇰 ഡെന്മാർക്കും കേറി ❞

ഈ യൂറോ കപ്പിലെ കറുത്ത കുതിരകൾ ആരാണെന്ന ചോദ്യത്തിനുള്ള ഉത്തരം തന്നെയായിരുന്നു ആദ്യ പ്രീ ക്വാർട്ടർ മത്സരം. ബെയ്‌ലും ,റംസിയും ഡാനിയൽ ജെയിംസും അടങ്ങിയ വെയ്ൽസിനെ എതിരാല്ലാത്ത നാല് ഗോളുകൾക്ക് തകർത്ത് ക്വാർട്ടർ ഫൈനലിലെ ആദ്യ മത്സരാർത്ഥിയായ ഡെൻമാർക്ക്‌. ആംസ്റ്റർഡാമിൽ നടന്ന മത്സരത്തിൽ കഴിഞ്ഞ തവണത്തെ സെമി ഫൈനലിസ്റ്റുകളായ വെയിൽസിനെ മനോഹരമായ ഫുട്ബോളിലൂടെയാണ് ഡെൻമാർക്ക്‌ കീഴ്പെടുത്തിയത്.ഗ്രൂപ്പ് ഘട്ടത്തിലെ അവസാന മത്സരത്തില്‍ റഷ്യക്കെതിരെ പുറത്തെടുത്ത മികവ് തുടരുകയായിരുന്നു ഡാനിഷ് പട. മൈതാനത്ത് കുഴഞ്ഞുവീണ് ജീവിതത്തിലേക്ക് തിരിച്ചെത്തിയ സൂപ്പർതാരം ക്രിസ്റ്റ്യന്‍ എറിക്‌സനുള്ള സഹതാരങ്ങളുടെ സ്നേഹസമ്മാനം കൂടിയായി ഈ വിജയം. ഡച്ച് ക്ലബ് അയാക്സിന്റെ ഹോം ഗ്രൗണ്ടിൽ അയാക്സ് താരം കാസ്പർ ഡോൽബർഗിന്റെ ഇരട്ട ഗോളുകളാണ് ഡെന്മാർക്കിന്റെ വിജയത്തിന് കരുത്തായത്.

യൊഹാന്‍ ക്രൈഫ് അരീനയില്‍ വെയ്ല്‍സിന്‍റെ മുന്നേറ്റത്തോടെയാണ് കളി തുടങ്ങിയത്. വെയ്ല്‍സ് 4-2-3-1 ശൈലിയിലും ഡെന്‍മാര്‍ക്ക് 3-4-2-1 ഫോര്‍മേഷനിലും കളത്തിലെത്തി. പത്താം മിനുറ്റില്‍ തന്നെ ഗാരെത് ബെയ്ല്‍ മികച്ചൊരു ഷോട്ടുതിര്‍ത്തെങ്കിലും പോസ്റ്റിനെ ഉരുമി കടന്നുപോയി. പിന്നാലെ റാംസിയും ആക്രമണത്തിന് ശ്രമിച്ചെങ്കിലും വിലപ്പോയില്ല. 24 മിനുറ്റിനിടെ നാല് കോര്‍ണര്‍ ലഭിച്ചെങ്കിലും ഡെന്‍മാര്‍ക്കിനും മുതലാക്കാനായില്ല. പതിയെ ഡെന്മാർക്ക് കളിയുടെ നിയന്ത്രണം ഏറ്റെടുത്തു. 27ആം മിനുട്ടിൽ അവരുടെ ആദ്യ ഗോളും വന്നു. ഡാംസ്ഗാർഡിന്റെ പാസ് സ്വീകരിച്ച് പെനാൾട്ടി ബോക്സിന് പുറത്ത് നിന്ന് ഡോൽബർഗ് തൊടുത്ത ഷോട്ട് കർവ്‌ ചെയ്ത് വലയുടെ ഇടതു കോർണറിൽ വീണു.32-ാം മിനുറ്റില്‍ രണ്ടാം ഗോളിനുള്ള സുവർണാവസരം ഡോള്‍ബര്‍ഗിന് ലഭിച്ചെങ്കിലും ഗോൾ കീപ്പർ തടഞ്ഞു.

രണ്ടാംപകുതിയുടെ തുടക്കത്തിലെ ഡെന്‍മാർക്ക് ലീഡ് രണ്ടാക്കി. 48-ാം മിനുറ്റില്‍ വലതുവിങ്ങിലൂടെയുള്ള ബ്രാത്ത്‍വെയ്റ്റിന്‍റെ മുന്നേറ്റത്തിനൊടുവില്‍ പന്ത് ക്ലിയർ ചെയ്യുന്നതില്‍ പകരക്കാരന്‍ നെക്കോ വില്യംസിന് പിഴച്ചപ്പോള്‍ കാല്‍പ്പാകത്തിന് ലഭിച്ച പന്ത് അനായാസം വലയിലെത്തിച്ച് 23കാരൻ ഡോള്‍ബര്‍ഗ് തന്‍റെയും ടീമിന്‍റേയും ഗോള്‍ സമ്പാദ്യം രണ്ടാക്കി. രണ്ടു ഗോൾ നേടിയെങ്കിലും മുന്നേറ്റത്തിൽ ഡെൻമാർക്ക്‌ ഒരു കുറവും വരുത്തിയില്ല.വെയിൽസിന് ഡെന്മാർക്ക് ഗോൾകീപ്പർ കാസ്പ്സ്ർ ഷിമൈക്കളിനെ കാര്യമായി പരീക്ഷിക്കാൻ പോലും ആയില്ല.82, 86-ാം മിനുറ്റില്‍ ബ്രാത്ത്‍വെയ്റ്റിന്‍റെ ഗോള്‍ശ്രമം തലനാരിഴയ്ക്ക് പിഴച്ചു. പിന്നാലെ 89ആം മിനുട്ടിൽ മെഹ്ലെയുടെ ഇടം കാലൻ സ്ട്രൈക്ക് മൂന്നാം ഗോളും ഡെന്മാർക്കിന്റെ വിജയവും ഉറപ്പിച്ചു. ഇതിനു പിന്നാലെ വെയിൽസ് താരം ഹാരി വിൽസൺ ചുവപ്പ് കണ്ട് പുറത്തായി.

ഇഞ്ച്വറി ടൈമിൽ ബാഴ്സലോണ താരം ബ്രെത്വൈറ്റിന്റെ ഗോളിലൂടെ ഡെന്മാർക്ക് നാലാം ഗോളും നേടി വെയിൽസ് തകർച്ചക്ക് അടിവരയിട്ടു. തുടർച്ചയായ രണ്ടാം മത്സരത്തിലാണ് ഡെന്മാർക്ക് നാലു ഗോളുകൾ നേടുന്നത്. വിജയത്തോടെ ക്വാർട്ടറിലേക്ക് എത്തിയ ഡെന്മാർക്ക് ഇനി ഹോളണ്ടും ചെക്ക് റിപബ്ലിക്കും തമ്മിലുള്ള മത്സരത്തിലെ വിജയികളെ ആകും നേരിടുക. ഡെൻമാർക്ക്‌ നിരയിൽ എടുത്തു പറയേണ്ട പ്രകടനം നടത്തിയ താരമാണ് എറിക്‌സൺ പകരം ടീമിലെത്തിയ മിഡ്ഫീൽഡർ മൈക്കൽ ഡാംസ്‌ഗാർഡ്. എറിക്സന്റെ അഭാവം അറിയിക്കാതെയുള്ള പ്രകടനമായിരുന്നു 20 കാരൻ പുറത്തെടുത്തത്.

യൂറോ കപ്പ് രണ്ടാം ക്വാർട്ടറിൽ ഉജ്ജ്വല ഫോമിലുള്ള ഇറ്റലിയെ വിറപ്പിച്ച് ഓസ്ട്രിയ കീഴടങ്ങി. എക്സ്ട്രാ ടൈം വരെ നീണ്ട പോരാട്ടത്തിൽ ഒന്നിനെതിരെ രണ്ടു ഗോളുകൾക്കാണ് ഇറ്റലി വിജയം പിടിച്ചെടുത്തത്. ആദ്യമായി ഒരു പ്രധാന ചാമ്പ്യന്‍ഷിപ്പിന്റെ നോക്ക് ഔട്ട് റൗണ്ടിലെത്തിയ ഓസ്ട്രിയ തകര്‍പ്പന്‍ പ്രകടനമാണ് കരുത്തരായ ഇറ്റലിക്കെതിരെ കാഴ്ച വെച്ചത്. നിശ്ചിത സമയത്തില്‍ ഇരു ടീമുകളും ഗോള്‍ രഹിത സമനിലയില്‍ പിരിഞ്ഞതോടെ മത്സരം എക്‌സ്ട്രാ ടൈമിലേക്ക് നീളുകയായിരുന്നു. രണ്ടാം പകുതിയില്‍ മാന്‍ചീനി കളത്തിലിറക്കിയ രണ്ട് സബ്ബുകളാണ് ഇറ്റലിക്ക് വേണ്ടി സ്‌കോര്‍ ചെയ്തത്. യൂറോ ചരിത്രത്തിലെ വാശിയേറിയ പോരാട്ടങ്ങളില്‍ ഒന്നിനാണ് വിഖ്യാത വെംബ്ലി സ്റ്റേഡിയം സാക്ഷിയായത്. തോല്‍വി അറിയാത്ത 31ആം മത്സരമാണ് ഇറ്റലി ഇന്ന് ഇംഗ്ലണ്ടിലെ വെംബ്ലി സ്റ്റേഡിയത്തില്‍ പൂര്‍ത്തിയാക്കിയിരിക്കുന്നത്


ഗ്രൂപ്പ് ഘട്ടത്തിലെ മൂന്ന് മത്സരങ്ങളും ജയിച്ചെത്തിയ ഇറ്റലി വെംബ്ലിയില്‍ ഇമ്മോബൈല്‍, ബെറാര്‍ഡി, ഇന്‍സൈന്‍ എന്നിവരെ മുന്നിലയച്ച് 4-3-3 ശൈലിയില്‍ കളത്തിലിറങ്ങി. അർനോട്ടോവിച്ചിനെ ആക്രമ ണത്തിന് നിയോഗിച്ച് ഓസ്‍ട്രിയ 4-2-3-1 എന്ന ശൈലിയിലും ഇറങ്ങി. ഇറ്റലിക്ക് എളുപ്പത്തിൽ വിജയിക്കാൻ ആകുമെന്നാണ് ഭൂരിഭാഗവും ഇന്നലത്തെ മത്സരത്തെ വിലയിരുത്തിയത് എങ്കിലും ഓസ്ട്രിയ ഇറ്റലിക്ക് കനത്ത പോരാട്ടമാണ് തുടക്കം മുതൽ നൽകിയത്. ഇറ്റാലിയൻ അറ്റാക്കുകളെ അച്ചടക്കത്തോടെ നേരിട്ടാണ് ഓസ്ട്രിയ ആദ്യ പകുതി ആരംഭിച്ചത്. ആദ്യ പകുതിയിൽ ഓസ്ട്രിയ ഡിഫൻസ് മറികടന്ന് നല്ല അവസരങ്ങൾ സൃഷ്ടിക്കാൻ ഇറ്റലി കഷ്ടപ്പെട്ടു.

ഇമ്മോബൈല്‍-ബെറാര്‍ഡി-ഇന്‍സൈന്‍ ത്രയം ഓസ്‍ട്രിയന്‍ ഗോള്‍മുഖത്ത് തുടക്കത്തിലെ എത്തിയെങ്കിലും പ്രതിരോധത്തില്‍ തട്ടിനിന്നു. 17-ാം മിനുറ്റില്‍ ബരെല്ലായുടെ ഉഗ്രന്‍ ഷോട്ട് ഓസ്ട്രിയന്‍ ഗോളി കാലുകൊണ്ട് തടുത്തു. 31-ാം മിനുറ്റില്‍ ഇമ്മോബൈല്‍ ലോംഗ് റേഞ്ചർ വർഷിച്ചെങ്കിലും പന്ത് ബാറില്‍ത്തട്ടി തെറിച്ചു. എന്നാല്‍ ആദ്യ പകുതിയില്‍ ഇറ്റാലിയന്‍ നിരയെ വലിഞ്ഞുമുറുക്കികൊണ്ട് ഡേവിഡ് അലാബയും സംഘവും ഗോള്‍ രഹിത സമനിലയില്‍ പിരിയുകയായിരുന്നു. രണ്ടാം പകുതിയിൽ 52ആം മിനുട്ടിൽ ഓസ്ട്രിയക്ക് ഒരു ഫ്രീകിക്ക് ലഭിച്ചു. ക്യാപ്റ്റൻ അലാബ എടുത്ത കിക്ക് ഗോൾ പോസ്റ്റിന് തൊട്ടുരുമ്മിയാണ് പുറത്ത് പോയത്.

ഓസ്ട്രിയയുടെ ക്ഷമയോടെയുള്ള കളി 64ആം മിനുട്ടിൽ അവർക്ക് ഒരു ഗോൾ നൽകി എങ്കിലും വാർ അവർക്ക് ഒപ്പം നിന്നില്ല. അർണാടോവിചിന്റെ ഹെഡറിലൂടെ ഓസ്ട്രിയ വല കുലുക്കി എങ്കിലും താരം ഓഫ്സൈഡ് ആയിരുന്നു എന്ന് വാർ വിധിച്ചു. കളി നിയന്ത്രണത്തിലാക്കാൻ വേണ്ടി മാഞ്ചിനി ലോകടെല്ലിയെയും പെസ്സിനയെയും പകരക്കാരായി കളത്തിൽ എത്തിച്ചു. നിശ്ചിത സമയം ഗോള്‍രഹിതമായതോടെ മത്സരം അങ്ങനെ എക്‌സ്ട്രാ ടൈമിലേക്ക് നീണ്ടു.

ഇറ്റലിയെ മുന്നിലെത്തിക്കാന്‍ 93-ാം മിനുറ്റില്‍ കിയേസക്ക് സുവർണാവസരം ലഭിച്ചെങ്കിലും ഓസ്‍ട്രിയന്‍ ഗോളിയെ മറികടക്കാനായില്ല .എക്‌സ്ട്രാ ടൈമിന്റെ അഞ്ചാം മിനിട്ടില്‍ ഫെഡറിക്കോ കിയെസയിലൂടെ ഇറ്റലി മത്സരത്തില്‍ ലീഡ് നേടി. പെനാല്‍റ്റി ബോക്‌സിന് വലതുഭാഗത്തേക്ക് സ്പിനാന്‍സോള നല്‍കിയ ഒരു വൈഡ് ക്രോസ് കിയെസ ഒരു ബുള്ളറ്റ് ഷോട്ടിലൂടെ ഓസ്ട്രിയന്‍ ഗോള്‍ വല കുലുക്കുകയായിരുന്നു. 105 ആം മിനുട്ടിൽ ഡിഫൻഡർ ഫ്രാന്‍സെസ്‌കോ അസെര്‍ബിയുടെ പാസിൽ നിന്നും ഓസ്ട്രിയൻ ഗോൾ പോസ്റ്റിലെ കൂട്ടപ്പൊരിച്ചിലിൽ നിന്നും മറ്റൊരു പകരക്കാരൻ പെസ്സിന ഇറ്റലിയുടെ ലീഡുയർത്തി. എങ്കിലും ഓസ്ട്രിയ പൊരുതി നോക്കി.

107ആം മിനുട്ടിലെ ഷവുബിന്റെ ഷോട്ട് ഡൊണ്ണരുമ്മ ഡൈവ് ചെയ്ത് അകറ്റിയത് ഇറ്റലിയുടെ ക്ലീൻ ഷീറ്റ് ഉറപ്പിച്ചെന്ന് കരുതി. എന്നാൽ 114ആം മിനുട്ടിൽ ഒരു കോർണറിൽ നിന്ന് കലാസിച് ചെയ്ത ഹെഡർ ഡൊണ്ണരുമ്മയെ കീഴ്പ്പെടുത്തി. ഇറ്റലി കഴിഞ്ഞ വർഷം ഒക്ടോബറിന് ശേഷം വഴങ്ങുന്ന ആദ്യത്തെ ഗോളായിരുന്നു ഇത്. ക്വാർട്ടറിൽ പോർച്ചുഗൽ ബെൽജിയം മത്സരത്തിലെ വിജയികളാവും ഇറ്റലിയുടെ എതിരാളികൾ.