❝50 കളിക്കാർ എപ്പോഴും റെഡിയാണ് ; ഭാവിയിൽ ഒരേ സമയം ഇന്ത്യയ്ക്ക് 2 ടീമുകൾ!❞

ടീം ഇന്ത്യയുടെ തിരക്കേറിയ ക്രിക്കറ്റ് ഷെഡ്യൂൾ കണക്കിലെടുക്കുമ്പോൾ കളിക്കാരുടെ ജോലിഭാരം വലിയ ചർച്ചാവിഷയമാണ്. നേരത്തെ, 2021-ൽ, രണ്ട് വ്യത്യസ്ത സീനിയർ  ടീമുകൾ ഇന്ത്യക്കായി ഒരേസമയം കളിച്ചിരുന്നു. വിരാട് കോഹ്‌ലിയുടെ നേതൃത്വത്തിലുള്ള ഇന്ത്യ ഇംഗ്ലണ്ടിലായിരുന്നപ്പോൾ, ശിഖർ ധവാന്റെ നേതൃത്വത്തിലുള്ള മറ്റൊരു ടീം ശ്രീലങ്കയ്‌ക്കെതിരെ പോരാടി. സമാനമായ സാഹചര്യമാണ് ഇപ്പോഴും വന്നിരിക്കുന്നത്.

അതേസമയം, കളിക്കാരുടെ ജോലിഭാരം നിയന്ത്രിക്കാനും രണ്ട് വ്യത്യസ്ത ടീമുകളെ ഫീൽഡ് ചെയ്യാൻ ഇന്ത്യൻ സ്‌ക്വാഡിൽ മതിയായ കളിക്കാർ ഉള്ളതിനാലും ക്രിക്കറ്റ് ആരാധകർക്ക് ഭാവിയിലും സമാനമായ സാഹചര്യം കാണാൻ കഴിയും എന്നാണ് ബോർഡ് ഓഫ് കൺട്രോൾ ഫോർ ക്രിക്കറ്റ് ഇൻ ഇന്ത്യ (ബിസിസിഐ) സെക്രട്ടറി ജയ് ഷാ പറയുന്നത്. “ഞാൻ എൻസിഎ മേധാവി വിവിഎസ് ലക്ഷ്മണുമായി ചർച്ച നടത്തിയിട്ടുണ്ട്, നമ്മുടെ പട്ടികയിൽ എപ്പോഴും 50 കളിക്കാർ ഉണ്ടാകും,” ജയ് ഷാ പറയുന്നു.

“ഭാവിയിൽ, ഇന്ത്യൻ ടെസ്റ്റ് ടീം ഒരു രാജ്യത്ത് ഒരു പരമ്പരയും വൈറ്റ്-ബോൾ ടീം മറ്റൊരു രാജ്യത്ത് ഒരു പരമ്പരയും കളിക്കുന്ന സാഹചര്യങ്ങൾ ഇനിയുമുണ്ടാവും.  ഒരേസമയം രണ്ട് ദേശീയ ടീമുകളെ തയ്യാറാക്കുന്ന ആ ദിശയിലേക്കാണ് ഞങ്ങൾ പോകുന്നത്,” അദ്ദേഹം പിടിഐയോട് പറഞ്ഞു. 2023 മുതൽ 5-6 ടീമുകൾ ഉൾക്കൊള്ളുന്ന വനിതാ ഐപിഎൽ ഉണ്ടാകുമെന്നും ബിസിസിഐ സെക്രട്ടറി വാഗ്ദാനം ചെയ്യുന്നു.

“ലോക ക്രിക്കറ്റ് ശക്തമായി നിലനിൽക്കുന്നിടത്തോളം ഇന്ത്യൻ ക്രിക്കറ്റും ശക്തമായി നിലനിൽക്കും. ഞാൻ ഇത് നിങ്ങൾക്ക് ഉറപ്പുതരാം. ബിസിസിഐ അന്താരാഷ്ട്ര ക്രിക്കറ്റിനോട് പ്രതിജ്ഞാബദ്ധമാണ്. ഇത് ഇന്ത്യയും ഓസ്‌ട്രേലിയയും, അല്ലെങ്കിൽ ഇന്ത്യയും ഇംഗ്ലണ്ടും തമ്മിലുള്ള മാർക്വീ സീരീസ് മാത്രമല്ല,  ചെറിയ രാജ്യങ്ങളോടും എല്ലാ ഫോർമാറ്റുകളിലും ഉഭയകക്ഷി അന്താരാഷ്ട്ര മത്സരങ്ങൾ കളിക്കാൻ നമ്മൾ പ്രതിജ്ഞാബദ്ധമാണ്,” അദ്ദേഹം പറഞ്ഞു.