❝മദ്യ ലഹരിയിൽ 🍻🖤 മുങ്ങിയ💔🙁 കരിയർ 💪⚽കളിയിലൂടെ
തന്നെ വീണ്ടെടുക്കുകയാണ്🇧🇷⭐ബ്രസീലിയൻ സ്‌ട്രൈക്കർ ജോ ❞

ബ്രസീല്‍ ഫുട്‌ബോളിലെ താരോദയമായി വാഴ്ത്തപ്പെട്ട ജോ ആല്‍വസ് ഡി അസിസ് സില്‍വ എന്ന ജോ വലിയ ഉയരങ്ങള്‍ കീഴടക്കുമെന്ന് പ്രവചനങ്ങളുണ്ടായിരുന്നു. ഒരു കൊള്ളിയാനെ പോലെ ബോക്‌സിനകത്ത് ഗോളടി വിസ്മയം തീര്‍ക്കുന്ന അത്ഭുതപ്രതിഭാസമായി ജോ വാഴ്ത്തപ്പെട്ടു. പക്ഷേ, പ്രൊഫഷണല്‍ കരിയറില്‍ ഒന്നുമായില്ല. എവിടെയും പ്രതീക്ഷിച്ച പോലെ അടയാളപ്പെടുത്തലുണ്ടായില്ല. എന്താണ് ജോയ്ക്ക് സംഭവിച്ചത്?

മദ്യപാനം! ഞാന്‍ സ്വയം നശിക്കുകയായിരുന്നു!! ജോ തന്നെ തനിക്ക് സംഭവിച്ചത് വെളിപ്പെടുത്തുന്നു. കരിയറില്‍ ദൗര്‍ഭാഗ്യം വേട്ടയാടിയപ്പോള്‍ ജോ ആല്‍ക്കഹോളിലാണ് ആശ്വാസം കണ്ടെത്തിയത്. ചില ദിവസങ്ങളില്‍ അതിരാവിലെ തുടങ്ങും. വീട്ടിനകത്ത് വെച്ചായിരുന്നു മദ്യസേവ. ആരോടും അധികം സംസാരിക്കാറില്ല. ഭാര്യയുമായി തെറ്റിപ്പിരിയേണ്ടി വന്നു. സുഹൃത്തുക്കള്‍ കൂട്ടുകൂടാന്‍ വരാതെയായി. തന്റെ ജീവിത ശൈലി തന്നെ മദ്യാസക്തിയില്‍ മാറിപ്പോയെന്ന് ജോ പറയുന്നു. എന്നാല്‍, കഴിഞ്ഞ രണ്ട് വര്‍ഷമായി ജോ ജീവിതം തിരിച്ചു പിടിച്ചു കൊണ്ടിരിക്കുകയാണ്. ആല്‍ക്കഹോളിനോട് ഗുഡ് ബൈ പറഞ്ഞു. ബ്രസീലിയന്‍ ക്ലബ്ബ് കോറിന്ത്യന്‍സില്‍ മുപ്പത്തിനാലാം വയസില്‍ പുത്തന്‍ പ്രതീക്ഷകളുമായി പന്ത് തട്ടുകയാണ് ജോ.

1987ല്‍ സാവോ പോളോയിലാണ് ജോ ജനിച്ചത്. ഏഴാം വയസില്‍ കോറിന്ത്യന്‍സിന്റെ യൂത്ത് അക്കാദമിയില്‍ ചേര്‍ന്നു. 2003 ല്‍ സീനിയര്‍ ടീമില്‍ അരങ്ങേറി. രണ്ട് സീസണുകളിലായി 81 മത്സരങ്ങള്‍. പതിനെട്ടുകാരന് റഷ്യന്‍ ക്ലബ്ബ് സി എസ് കെ എ മോസ്‌കോയില്‍ നിന്ന് ക്ഷണം ലഭിച്ചു. അതായിരുന്നു ജോയുടെ കരിയറിലെ സുവര്‍ണ കാലം. 77 മത്സരങ്ങളില്‍ നിന്ന് 44 ഗോളുകളാണ് നേടിയത്. 2007 ചാമ്പ്യന്‍സ് ലീഗില്‍ ഇന്റര്‍മിലാനെതിരെ ഇരുപാദത്തിലും ഗോളടിച്ച് ജോ തിളങ്ങി. ഈ മികവ് മാഞ്ചസ്റ്റര്‍ സിറ്റി കോച്ച് മാര്‍ക് ഹ്യൂസിനെ ആകര്‍ഷിച്ചു.

ഇരുപത്തൊന്നാം വയസില്‍ ബ്രസീല്‍ സ്‌ട്രൈക്കര്‍ക്ക് 18 ദശലക്ഷം പൗണ്ടിന്റെ ക്ലബ്ബ് റെക്കോര്‍ഡ് ട്രാന്‍സ്ഫര്‍ മൂല്യംനല്‍കി മാഞ്ചസ്റ്റര്‍ സിറ്റി സ്വന്തമാക്കി. അന്ന് സിറ്റിയുടെ ഉടമ മുന്‍ തായ്‌ലന്‍ഡ് പ്രസിഡന്റ് തക്‌സിന്‍ ഷിനവത്രയായിരുന്നു. ജൂലൈയിലാണ് ഈ ട്രാന്‍സ്ഫര്‍ സംഭവിക്കുന്നത്. സെപ്തംബറില്‍ സിറ്റിയെ അബുദാബി ഗ്രൂപ്പായ എഡിയുജി ഏറ്റെടുത്തു. റയല്‍ മാഡ്രിഡില്‍ നിന്ന് റൊബീഞ്ഞോയെ ടീമിലെത്തിക്കാന്‍ ശ്രമിച്ച ചെല്‍സിയേക്കാള്‍ പണമെറിഞ്ഞ് സിറ്റി പുതിയ ഉടമകളുടെ വരവറിയിച്ചു. ഇത് ദോഷം ചെയ്തത് ജോയ്ക്കാണ്. സിറ്റിക്കായി ആദ്യ ഒമ്പത് മത്സരങ്ങില്‍ ഒരു ഗോളുമായി തപ്പിത്തടഞ്ഞ സ്‌ട്രൈക്കറെ ലോണില്‍ എവര്‍ട്ടന് നല്‍കുകയുണ്ടായി. ഈ തിരിച്ചടി മറക്കാന്‍ ജോ കണ്ടെത്തിയ വഴി വെള്ളമടിയായിരുന്നു.


എവര്‍ട്ടന്‍ കോച്ചായിരുന്ന ഡേവിഡ് മോയസ് ബ്രസീല്‍ യുവതാരത്തിന് അവസരം നല്‍കാന്‍ തയ്യാറായി. റഷ്യന്‍ ക്ലബ്ബില്‍ പുറത്തെടുത്ത മികവാണ് മോയസിനെ ആകര്‍ഷിച്ചിരുന്നത്. ബോള്‍ട്ടനെതിരെ രണ്ട് ഗോളുകള്‍ നേടിക്കൊണ്ടായിരുന്നു എവര്‍ട്ടനിലെ അരങ്ങേറ്റം. 2008-09 സീസണില്‍ പന്ത്രണ്ട് മത്സരങ്ങളില്‍ അഞ്ച് ഗോളുകളാണ് ജോ നേടിയത്. അടുത്ത സീസണിലും എവര്‍ട്ടനില്‍ ലോണില്‍ കളിച്ചു. പക്ഷേ, ജോ നിരാശപ്പെടുത്തി. 24 മത്സരങ്ങളില്‍ രണ്ട് ഗോളുകള്‍ മാത്രം. ക്രിസ്മസിന് ചോദിക്കാതെ നാട്ടിലേക്ക് പോയതോടെ കോച്ച് മോയസിന് ജോയിലുള്ള താത്പര്യവും നഷ്ടമായി. ഈ കാലത്ത് ദിവസവും മദ്യപിക്കുന്ന ശീലമുണ്ടായിരുന്നു താരത്തിന്.

മാഞ്ചസ്റ്റര്‍ സിറ്റി കരാര്‍ അവസാനിപ്പിച്ചതോടെ തുര്‍ക്കി ക്ലബ്ബ് ഗലാത്സരേയിലേക്കാണ് ജോ ചേക്കേറിയത്. അവിടെയും നിരാശപ്പെടുത്തി. ഇന്റര്‍നാഷണലിലൂടെ ബ്രസീലിലേക്ക് മടക്കം. അത്‌ലറ്റികോ മിനെയ്‌റോയില്‍ 2012-15 കാലയളവില്‍ പ്രതീക്ഷ നല്‍കുന്ന പ്രകടനം കാഴ്ചവെച്ചു. കിരീട വിജയങ്ങളിലും പങ്കാളിയായി. യു എ ഇയില്‍ അല്‍ ഷബാബ്, ചൈനയില്‍ ജിയാംഗ്‌സു സുനിംഗ് ക്ലബ്ബിനായും കളിച്ച ജോ 2017 ല്‍ കോറിന്ത്യന്‍സിലേക്ക് തിരിച്ചെത്തിയതോടെയാണ് കരിയറില്‍ പുതിയ പ്രകാശം കണ്ടത്. 61 മത്സരങ്ങളില്‍ 25 ഗോളുകള്‍. അടുത്ത സീസണില്‍ ജാപനീസ് ലീഗിലേക്ക്. നഗോയ ഗ്രാംപസിനായി 33 ലീഗ് മത്സരങ്ങളില്‍ നിന്ന് 24 ഗോളുകള്‍!

2016 ല്‍ കോറിന്ത്യന്‍സ് സീരി എ കിരീടം നേടിയ ആഘോഷരാവില്‍ മദ്യം കൈ കൊണ്ട് തൊട്ടില്ല ജോ. രാവിലെ ഒഴി തുടങ്ങുന്ന ആളാണ് ഇങ്ങനെ ഡീസന്റായത്. എന്റെ തെറ്റുകള്‍ ഞാന്‍ തിരിച്ചറിയാന്‍ തുടങ്ങിയിരുന്നു. ചെറിയ വീഴ്ചകള്‍ക്ക് ആല്‍ക്കഹോളിനെ കൂട്ടുപിടിച്ചതാണ് ഞാന്‍ എന്നോട് ചെയ്ത വലിയ ചതി. ഇപ്പോള്‍ എനിക്ക് സമാധാനമുണ്ട്, സന്തോഷം തിരിച്ചെത്തിയിരിക്കുന്നു – കോറിന്ത്യന്‍സ് താരമായ ജോ പറയുന്നു. 2007 മുതല്‍ 2014 വരെ ബ്രസീല്‍ദേശീയ ടീമിനായി കളിച്ച ജോ ലോകകപ്പിലും കോണ്‍ഫെഡറേഷന്‍സ് കപ്പിലും മഞ്ഞക്കുപ്പായമണിഞ്ഞു.

കടപ്പാട്