❝ഫുട്‌ബോള്‍ താരങ്ങളുടെ വിരമിക്കല്‍ ജീവിതം ഞെട്ടിപ്പിക്കുന്നത്‌❞ ; അനുഭവ കുറിപ്പുമായി ലിവർപൂൾ ഇതിഹാസം

തൊണ്ണൂറുകളുടെ അവസാനത്തില്‍ ലിവര്‍പൂളിലെത്തിയ ഇംഗ്ലീഷ് സെന്‍ട്രല്‍ മിഡ്ഫീല്‍ഡറെ മാഞ്ചസ്റ്റര്‍ യുനൈറ്റഡിന് ഭയമായിരുന്നു. ഓള്‍ഡ് ട്രഫോര്‍ഡില്‍ നാട്ടുകാരുടെ സര്‍വ പിന്തുണയോടെ ലിവര്‍പൂളിനെ നേരിട്ടപ്പോള്‍ മൂന്ന് തവണയാണ് ആ സെന്‍ട്രല്‍ മിഡ്ഫീല്‍ഡര്‍ വിജയഗോള്‍ നേടിയത്. 2001 ല്‍ ലിവര്‍പൂള്‍ ലീഗ് കപ്പും എഫ് എ കപ്പും യുവേഫ കപ്പും നേടിയപ്പോള്‍ ആ ടീമിലുണ്ടായിരുന്നു ഈ താരം പേര് ഡാനി മർഫി .

ക്രീവ് അലക്‌സാന്‍ഡ്ര ക്ലബ്ബിലൂടെ കരിയര്‍ തുടങ്ങിയ ഡാനി മർഫി ചാൾട്ടൻ അത്‌ലറ്റിക്, ടോട്ടനം ഹോസ്പര്‍, ഫുള്‍ഹാം, ബ്ലാക്‌ബേണ്‍ റോവേഴ്‌സ് ക്ലബ്ബുകള്‍ക്കായും ബൂട്ടുകെട്ടി. രണ്ട് ദശകം നീണ്ടു നിന്ന ഫുട്‌ബോള്‍ കരിയറിന് ശേഷം, ബി ബി സിയുടെ ഫുട്‌ബോള്‍ വിശകലന വിദഗ്ധനായി ജോലി ചെയ്യുകയാണ് മർഫി. ഫുട്‌ബോള്‍ ഡാനി മർഫിക്കെന്ത് സമ്മാനിച്ചു എന്ന് ചോദിച്ചാല്‍, ഡിപ്രഷനും കടവും എന്നാകും മറുപടി. ചാനലില്‍ മർഫി അടുത്തിടെ നടത്തിയ വെളിപ്പെടുത്തല്‍ ഫുട്‌ബോള്‍ ലോകത്തെ ഞെട്ടിക്കുന്നതായിരുന്നു.

നല്ല ഫോമില്‍ കളിച്ചു കൊണ്ടിരിക്കുമ്പോള്‍ ഫുട്‌ബോള്‍ താരങ്ങള്‍ കരുതുക, തന്റെ കരിയര്‍ ഒരിക്കലും അവസാനിക്കില്ലെന്നായിരിക്കും. ഞാനങ്ങനെ കരുതിയ വ്യക്തിയാണ്. ഫുട്‌ബോള്‍ മാത്രമായിരിക്കും ജീവിതം എന്ന് കരുതി. പക്ഷേ, യാഥാര്‍ഥ്യം അതല്ല. ഫുട്‌ബോള്‍ പ്ലെയിംഗ് കരിയറിന് ശേഷമൊരു ജീവിതമുണ്ട്, അത് വളരെ പ്രധാനമാണ്. ക്ലബ്ബുകള്‍ക്ക് കളിച്ചിരുന്ന കാലത്ത് ലഭിച്ച പണം നല്ല രീതിയില്‍ നിക്ഷേപിച്ചിട്ടില്ലെങ്കില്‍ ശിഷ്ടകാലം ദുരിതത്തിലാകും – മുര്‍ഫി പറയുന്നു. 2013 ല്‍ വിരമിച്ച മുര്‍ഫിയെ വഴിതെറ്റിച്ചത് മാനസിക-ശാരീരിക പ്രശ്‌നങ്ങളാണ്.

ഫുട്‌ബോള്‍ നല്‍കിയ ആനന്ദം മർഫിക്ക് അത്രമേല്‍ വലുതായിരുന്നു. വിരമിച്ച് രണ്ട് വര്‍ഷം പിന്നിടുമ്പോഴാണ് മുര്‍ഫി വിഷാദരോഗത്തിനടിപ്പെടാന്‍ തുടങ്ങിയത്. അതില്‍ നിന്ന് രക്ഷപ്പെടാനുള്ള ശ്രമങ്ങള്‍ മദ്യപാനത്തിലും വാതുവെപ്പിലും മയക്ക് മരുന്ന് ഉപയോഗത്തിലുമെത്തിച്ചു! ഒരു മനുഷ്യ ശരീരത്തില്‍ ഡോപ്പമൈന്‍ എര്‍ഡോര്‍ഫിന്‍സ് ഹോര്‍മോണുകള്‍ നിര്‍ണായക റോള്‍ വഹിക്കുന്നുണ്ട്. ഫുട്‌ബോള്‍ താരങ്ങളില്‍ ഇതിന്റെ പ്രവര്‍ത്തനം അല്പം കൂടി ഉയര്‍ന്ന തോതിലാകും. ഒരു ഗോളടിച്ചാല്‍, മത്സരം ജയിച്ചാല്‍ ഫുട്‌ബോള്‍ താരങ്ങള്‍ നടത്തുന്ന ആഹ്ലാദപ്രകടനം ഡോപമൈനിന്റെ പിന്‍ബലത്തിലാണ്. മസ്തിഷ്‌കത്തില്‍ നിന്ന് വരുന്ന വസ്തുവാണിത്.


വേദനയും സമ്മര്‍ദവും നേരിടാന്‍ സഹായിക്കുന്ന പിറ്റിയൂട്ടറിഗ്രന്‍ഥിയില്‍ ഉല്‍പ്പാദിപ്പിക്കപ്പെടുന്ന ഹോര്‍മോണാണ് എന്‍ഡോര്‍ഫിന്‍സ്. കളിയില്‍ നിന്നുള്ള ആനന്ദം നിലച്ചതോടെ മുര്‍ഫിയുടെ ശരീരത്തില്‍ സന്തോഷത്തിന്റെ ഹോര്‍മോണും നിലച്ചു. ഇത് വിഷാദത്തിലേക്കാണ് നയിച്ചത്. ഇത് പല ഫുട്‌ബോള്‍ താരങ്ങളുടെയും വിരമിക്കല്‍ ജീവിതം തകിടം മറിച്ചിട്ടുണ്ട്. . അതുകൊണ്ട് തന്നെ വിരമിക്കലിന്റെ പടിവാതില്‍ക്കല്‍ നില്‍ക്കുന്നവരോടും ഏതാനും വര്‍ഷങ്ങള്‍കൂടി കരിയര്‍ ബാക്കിയുള്ളവരോടും മുര്‍ഫി പറയുന്നു, മാനസികമായി സജ്ജമാകണമെന്ന്. യുവതലമുറയോട് പറയാനുള്ളത് നല്ല റിട്ടയര്‍മെന്റ് നിക്ഷേപ പദ്ധതികളില്‍ ചേരുക.

പല ഏജന്റുകളും സമീപിക്കും, ആകര്‍ഷകമായ നിക്ഷേപപദ്ധതികളില്‍ വീഴ്ത്തും. പില്‍ക്കാലത്ത് പോലീസ് കേസ് മാത്രമാകും ബാക്കിയുണ്ടാവുക. തട്ടിപ്പില്‍ പെടാതെയും സൂക്ഷിക്കണം. ഇതിലെല്ലാം പെട്ടുപോയ ഒരു മനുഷ്യനാണ് ഡാനി മുര്‍ഫി. വിഷാദരോഗ ചികിത്സക്ക് ശേഷമാണ് ലഹരി ഉപയോഗങ്ങളില്‍ നിന്ന് വിടുതല്‍ നേടിയത്. ഇതോടെ, നഷ്ടപ്പെട്ട കുടുംബബന്ധം വീണ്ടെടുക്കാന്‍ മുര്‍ഫിക്ക് സാധിച്ചു. കുട്ടികള്‍ക്കൊപ്പം നല്ല സമയം ചെലവഴിക്കുന്നു. ഫുട്‌ബോള്‍ കളിയില്ലെങ്കിലും കളിയെ കുറിച്ച് ചാനലുകളില്‍ ചര്‍ച്ചക്കിരിക്കുന്നത് മർഫിക്ക് മാനസിക ഉല്ലാസം നല്‍കുന്നു.

ഓരോ സീസണിലും നൂറ് കണക്കിന് താരങ്ങളാണ് വിരമിക്കുന്നത്. അതോടെ, ക്ലബ്ബുകളില്‍ നിന്ന് ലഭിച്ചു കൊണ്ടിരുന്ന എല്ലാ ആനുകൂല്യങ്ങളും അവര്‍ക്ക് നഷ്ടമാകും. സാധാരണ കുടുംബത്തില്‍ നിന്നുള്ളവരാണ് ഫുട്‌ബോള്‍ താരങ്ങളില്‍ ഏറെയും. അവര്‍ക്ക് പ്രശസ്തിയും സമ്പാദ്യവും കൈകാര്യം ചെയ്യാനുള്ള പ്രാഗല്‍ഭ്യവും കുറയുമെന്ന് മുര്‍ഫി തന്റെ അനുഭവത്തിലും സുഹൃത്തുക്കളായ നിരവധി താരങ്ങളുടെ റിട്ടയര്‍മെന്റ് ജീവിതത്തിന്റെയും പശ്ചാത്തലത്തിലും പറയുന്നു.

കടപ്പാട് -ms