Prime Volleyball : ” ഇന്ത്യൻ വോളിബോൾ മെച്ചപ്പെടുത്താൻ ഒരു പ്രൊഫഷണൽ ലീഗ് ആവശ്യമായിരുന്നു”

ഇന്ന് ഹൈദരാബാദിലെ ഗച്ചിബൗളി ഇൻഡോർ സ്റ്റേഡിയത്തിൽ നടക്കുന്ന റുപേ പ്രൈം വോളിബോൾ ലീഗിന്റെ അഞ്ചാം മത്സരത്തിൽ കാലിക്കറ്റ് ഹീറോസ് അഹമ്മദാബാദ് ഡിഫൻഡേഴ്സിനെ നേരിടും. ആദ്യ മത്സരത്തിൽ കൊൽക്കത്ത തണ്ടർബോൾട്ടിനോടേറ്റ തോൽ‌വിയിൽ നിന്നും ജയത്തോടെ തിരിച്ചു വരാനുള്ള ഒരുക്കത്തിലാണ് ഹീറോസ്. ആവേശം നിറഞ്ഞ പോരാട്ടത്തിനൊടുവിലാണ് കാലിക്കറ്റ് കൊൽക്കത്തക്കെതിരെ പൊരുതി വീണത് . കരുത്തരായ ചെന്നൈയെ പരാജയപെടുത്തിയാണ് അഹെമ്മദാബാദ് എത്തുന്നത്.

“തിങ്കളാഴ്‌ച കൊൽക്കത്ത തണ്ടർബോൾട്ടിനെതിരായ മത്സരം ഞങ്ങൾക്ക് ഒരു തുടക്കം മാത്രമായിരുന്നു. ഞങ്ങൾ നന്നായി കളിച്ചു, പക്ഷേ നിർഭാഗ്യവശാൽ ഞങ്ങൾ കളി തോറ്റു. അഹമ്മദാബാദ് ഡിഫൻഡേഴ്സിനെതിരായ ഞങ്ങളുടെ അടുത്ത മത്സരത്തിനായി ഞങ്ങൾ ഞങ്ങളുടെ തന്ത്രങ്ങൾ ആസൂത്രണം ചെയ്യും. ഞങ്ങളുടെ അടുത്ത എതിരാളികളെ നേരിടാൻ ടീമിന് ആത്മവിശ്വാസമുണ്ട്”അഹമ്മദാബാദ് ഡിഫൻഡേഴ്സിനെതിരായ മത്സരത്തിന് മുന്നോടിയായി സംസാരിച്ച കാലിക്കറ്റ് ഹീറോസിന്റെ സെറ്റർ ജിതിൻ എൻ പറഞ്ഞു.

“എന്റെ അച്ഛൻ റേഷൻ കടയുടമയും അമ്മ വീട്ടമ്മയുമാണ്. എന്റെ വോളിബോൾ കരിയറിന്റെ ആദ്യ നാളുകളിൽ ഷൂസ് പോലുള്ള ചില കാര്യങ്ങൾ സ്വന്തമാക്കുന്നത് ബുദ്ധിമുട്ടായിരുന്നു, പക്ഷേ എന്റെ അച്ഛൻ എന്നെ വളരെയധികം പിന്തുണച്ചു, കൂടാതെ ധാരാളം മുതിർന്ന കളിക്കാരും എന്നെ സഹായിച്ചിട്ടുണ്ട്” കുടുംബ പശ്ചാത്തലത്തെ കുറിച്ച് ചോദിച്ചപ്പോൾ ജിതിൻ പറഞ്ഞു.

ഇന്ത്യൻ വോളിബോൾ സർക്യൂട്ട് മെച്ചപ്പെടാൻ ഒരു പ്രൊഫഷണൽ ലീഗ് ആവശ്യമാണെന്ന് കോഴിക്കോട് ജില്ലയിൽ നിന്നുള്ള 28 കാരൻ പറഞ്ഞു.“റുപേ പ്രൈം വോളിബോൾ ലീഗ് ഇന്ത്യൻ വോളിബോൾ കളിക്കാരെ വളരെയധികം സഹായിക്കുമെന്ന് എനിക്ക് തോന്നുന്നു.അത്ലറ്റുകൾക്ക് മികച്ച കളിക്കാരാകാനുള്ള അവസരമുണ്ട്. അവർക്ക് വിദേശ കളിക്കാരുമായി ഒരുമിച്ച് നിൽക്കാൻ ആകും. ഇന്ത്യൻ വോളിബോൾ മെച്ചപ്പെടുത്താൻ ഇതുപോലൊരു പ്രൊഫഷണൽ ലീഗ് ആവശ്യമായിരുന്നു.”

അഹമ്മദാബാദ് ഡിഫൻഡേഴ്സിന്റെ മലയാളി ഷോൺ ടി ജോൺ തന്റെ ടീം അവരുടെ മികച്ച ഫോം തുടരാൻ നോക്കുമെന്ന് പറഞ്ഞു,“ഞായറാഴ്ച ചെന്നൈ ബ്ലിറ്റ്സിനെതിരെ എന്റെ ആദ്യത്തെ റുപേ പ്രൈം വോളിബോൾ ലീഗ് മത്സരം കളിക്കുന്നത് വളരെ ആവേശകരമായിരുന്നു. പരിശീലകരിൽ നിന്നും മാനേജ്‌മെന്റിൽ നിന്നും ഞങ്ങൾക്ക് വളരെയധികം പിന്തുണ ലഭിക്കുന്നു, ഞങ്ങളുടെ അടുത്ത മത്സരത്തിലും ഞങ്ങൾ നന്നായി കളിക്കാൻ നോക്കും. ടീമിൽ എല്ലാവരുടെയും ആത്മവിശ്വാസം ഉയർന്നതാണ്. ഞങ്ങൾ ഒരു നല്ല കളി കളിക്കുകയും ഞങ്ങളുടെ ടീമിനെ വിജയത്തിലെത്തിക്കുകയും ചെയ്യും” കെസ്ഇബി താരം പറഞ്ഞു.

തന്റെ കുടുംബ പശ്ചാത്തലത്തെക്കുറിച്ചും വോളിബോൾ യാത്രയെക്കുറിച്ചും ഷോൺ പറഞ്ഞു.“രണ്ട് വർഷം മുമ്പ് എന്റെ അച്ഛൻ മരിച്ചു. ഞാൻ എന്റെ അമ്മയ്ക്കും മുത്തശ്ശിമാർക്കും ഒപ്പമാണ് താമസിക്കുന്നത്. എന്റെ അമ്മ സൗദി അറേബ്യയിൽ നഴ്‌സായി ജോലി ചെയ്തു, ഇപ്പോൾ വിരമിച്ചു. എന്റെ കുടുംബം എന്നെ ആശ്രയിച്ചാണ് കഴിയുന്നത്. എന്റെ ഗ്രാമത്തിൽ ധാരാളം പരിശീലന ക്യാമ്പുകൾ ഉണ്ടായിരുന്നില്ല. എന്നാൽ മുൻ താരം ഷാംജി എന്നെ വളരെയധികം സഹായിച്ചത്.അദ്ദേഹം എന്നെ വോളിബോളിന്റെ സാങ്കേതിക വിദ്യകൾ പഠിപ്പിച്ചു, പ്രാദേശിക മത്സരങ്ങൾക്ക് എന്നെ കൊണ്ടുപോയി. കുറച്ച് അനുഭവങ്ങൾ നേടിയ ശേഷം, ഞാൻ വളരെയധികം ആത്മവിശ്വാസം നേടുകയും എന്റെ കരിയറിൽ വലിയ മുന്നേറ്റം നടത്താൻ സഹായിക്കുകയും ചെയ്തു”.