ഐപിഎൽ 2024ൽ ഡൽഹി ക്യാപിറ്റൽസ് കോച്ചായി റിക്കി പോണ്ടിംഗിനെ മാറ്റി സൗരവ് ഗാംഗുലി വരണമെന്ന് ഇർഫാൻ പത്താൻ
ഇന്ത്യൻ പ്രീമിയർ ലീഗിന്റെ ഈ സീസണിൽ ഡേവിഡ് വാർണറുടെ നേതൃത്വത്തിലുള്ള ടീം അവസാന സ്ഥാനത്തെത്തുമെന്ന് ഉറപ്പായതോടെ ഡൽഹി ക്യാപിറ്റൽസിന്റെ റോളിൽ മാറ്റം വരുത്തണമെന്ന് മുൻ ഇന്ത്യൻ ഇടംകൈയ്യൻ പേസർ ഇർഫാൻ പത്താൻ ആവശ്യപ്പെട്ടു.12 കളികളിൽ നാല് വിജയങ്ങളുമായി, ഡെൽഹി ടേബിളിന്റെ ഏറ്റവും അവസാന സ്ഥാനത്താണ്, പ്ലേ ഓഫ് മത്സരത്തിൽ നിന്ന് ഇതിനകം തന്നെ പുറത്തായി. ഈ സീസണിൽ രണ്ട് മത്സരങ്ങൾ കളിക്കാനിരിക്കെ, തന്റെ ടീം അടുത്ത സീസണിനായി തയ്യാറെടുക്കുകയാണെന്ന് വാർണർ ഇതിനകം തന്നെ ഊന്നിപ്പറഞ്ഞിട്ടുണ്ട്.
നിരാശാജനകമായ മറ്റൊരു സീസൺ അവസാനിക്കാനിരിക്കെ, റിക്കി പോണ്ടിങ്ങിന് പകരം കോച്ചിന്റെ സ്ഥാനത്ത് നിലവിൽ ഡൽഹി ക്യാപിറ്റൽസിന്റെ ക്രിക്കറ്റ് ഡയറക്ടറായ മുൻ ഇന്ത്യൻ ക്യാപ്റ്റൻ സൗരവ് ഗാംഗുലി ടീമിന്റെ ഉത്തരവാദിത്തം ഏറ്റെടുക്കണമെന്ന് പത്താൻ പറഞ്ഞു.കാരണം ഇന്ത്യൻ കളിക്കാരുടെ മനഃശാസ്ത്രത്തെക്കുറിച്ചുള്ള അദ്ദേഹത്തിന്റെ അറിവ് മുൻ ഓസ്‌ട്രേലിയൻ ക്യാപ്റ്റനെക്കാൾ മികച്ചതാണ്.”ഡൽഹി ഡഗൗട്ടിൽ സൗരവ് ഗാംഗുലിയുടെ സാന്നിധ്യം വലിയ കാര്യമാണ്. പരിശീലകന്റെ ചുമതല കൂടി ദാദയ്ക്ക് നൽകിയാൽ ഈ ടീമിൽ വലിയ മാറ്റമുണ്ടാക്കാൻ കഴിയുമെന്ന് ഞാൻ കരുതുന്നു,” പത്താൻ സ്റ്റാർ സ്‌പോർട്‌സിനോട് പറഞ്ഞു.
“ഇന്ത്യൻ കളിക്കാരുടെ മനഃശാസ്ത്രത്തെക്കുറിച്ച് ദാദയ്ക്ക് അറിവുണ്ട്. ഡ്രസ്സിംഗ് റൂം എങ്ങനെ പ്രവർത്തിപ്പിക്കണമെന്ന് അദ്ദേഹത്തിന് അറിയാം, ഡെൽഹി അത് തീർച്ചയായും പ്രയോജനപ്പെടുത്തണം. ടോസ് സമയത്ത് തന്റെ ടീം ഇപ്പോൾ അടുത്ത സീസണിനുള്ള തയ്യാറെടുപ്പ് ആരംഭിച്ചതായി വാർണർ പറഞ്ഞു. ഈ സാഹചര്യത്തിൽ ഗാംഗുലിയെ പുതിയ വേഷത്തിൽ കാണുന്നത് തെറ്റല്ല. അദ്ദേഹം കൂട്ടിച്ചേർത്തു.
ഇന്ന് പഞ്ചാബ് കിംഗ്‌സിനെതിരെയാണ് ഡൽഹിയുടെ മത്സരം,തുടർന്ന് അവരുടെ സീസണിലെ അവസാന മത്സരം ചെന്നൈ സൂപ്പർ കിംഗ്‌സിനെതിരെ ഡൽഹിയിലെ അരുൺ ജെയ്റ്റ്‌ലി സ്റ്റേഡിയത്തിൽ നടക്കും. അവസാന രണ്ടു മത്സരങ്ങളിൽ വിജയിച്ച് ഐപിഎൽ 2023 അവസാനിപ്പിക്കാനുള്ള ശ്രമത്തിലാണ് ഡൽഹി .
