❝ ചാമ്പ്യൻസ് ലീഗ് 🏆😍 ഇനി പുതിയ രൂപത്തിലും,
ഭാവത്തിലും.⚽🗣 വിവരങ്ങൾ പുറത്ത്‌ വിട്ട് യുവേഫ ❞

യൂറോപ്യൻ സൂപ്പർ ലീഗുമായി മുന്നോട്ടു പോകുമെന്ന് ഔദ്യോഗിക തീരുമാനം വന്നതോടെ അടുത്ത സീസണിലെ ചാമ്പ്യൻസ് ലീഗിലും യൂറോപ്പ ലീഗിലും വലിയ രീതിയിലുള്ള മാറ്റങ്ങൾ സംഭവിക്കുമെന്ന കാര്യം ഉറപ്പായിക്കഴിഞ്ഞു.യുവേഫ ചാമ്പ്യൻസ് ലീഗും യൂറോപ്പ ലീഗും സെമി ഫൈനൽ വരെയെത്തി നിൽക്കെ ചാമ്പ്യൻസ് ലീഗ് സെമി ഫൈനൽ കളിക്കുന്ന നാലിൽ മൂന്നു ടീമും സൂപ്പർ ലീഗിൽ പങ്കെടുക്കുമെന്ന് വ്യക്തമാക്കിയിട്ടുണ്ട്. പിഎസ്‌ജി മാത്രമാണ് ഇതിൽ വിട്ടു നിൽക്കുന്നത്. ഇതിനു പുറമെ യൂറോപ്പ ലീഗ് സെമിയിലെത്തിയ ടീമുകളിൽ ആഴ്‌സണലും മാഞ്ചസ്റ്റർ യുണൈറ്റഡും പുതിയ ടൂർണമെന്റിനോട് സഹകരിക്കും.

യൂറോപ്യൻ ഫുട്ബോളിൽ യൂറോപ്യൻ സൂപ്പർ ലീഗിന്റെ വിവാദങ്ങൾ അലയടിക്കുന്നതിനിടെ പുതിയ രൂപത്തിലുള്ള ചാമ്പ്യൻസ് ലീഗിന്റെ വിവരങ്ങൾ പുറത്ത്‌വിട്ടു യുവേഫ.2024-25 സീസണിന്റെ തുടക്കത്തിൽ ചാമ്പ്യൻസ് ലീഗിനെ നിലവിലെ ഫോർമാറ്റിൽ നിന്ന് വീണ്ടും രൂപപ്പെടുത്തിയ ടൂർണമെന്റിലേക്ക് വികസിപ്പിക്കാനുള്ള പ്രമേയം സ്വിറ്റ്സർലൻഡിലെ മോൺ‌ട്രിയൂക്സിൽ നടന്ന വോട്ടെടുപ്പിൽ എക്സിക്യൂട്ടീവ് കമ്മിറ്റി പാസാക്കി.


36 ടീമുകളെ ഉൾപ്പെടുത്തിയിട്ടുള്ള പുതിയ രീതിയാണ് യുവേഫ പുറത്തുവിട്ടത്. നേരത്തെ 32 ടീമുകളാണ് ചാമ്പ്യൻസ് ലീഗിൽ ഉണ്ടായിരുന്നത്. പുതിയ രീതി പ്രകാരം ഒരെറ്റ ലീഗ് ഫോർമാറ്റിലാണ് മത്സരങ്ങൾ നടക്കുക. 2024 മുതലാവും പുതിയ രീതിയിലുള്ള ചാമ്പ്യൻസ് ലീഗ് നടപ്പിൽ വരുക. നേരത്തെ മത്സരങ്ങൾ നടന്നിരുന്നു ചൊവ്വാഴ്ചയും ബുധനാഴ്ചയും കൂടാതെ വ്യാഴാഴ്‌ചയും 2024 മുതൽ ചാമ്പ്യൻസ് ലീഗ് മത്സരങ്ങൾ നടക്കും. പുതിയ രീതിയുള്ള ഈ ഫോർമാറ്റ് ഏത് ടീമിനും യൂറോപ്പിൽ കളിക്കാനുള്ള അവസരം ഒരുക്കുമെന്ന് യുവേഫ പ്രസിഡന്റ് അലക്‌സാണ്ടർ സെഫെറിൻ പറഞ്ഞു.

ചാമ്പ്യൻസ് ലീഗിൽ കളിക്കുന്ന എല്ലാ ടീമും 10 മത്സരങ്ങൾ വീതം കളിക്കും. ഇതിൽ ഏറ്റവും കൂടുതൽ പോയിന്റ് നേടുന്ന 8 ടീമുകൾ പ്രീ ക്വാർട്ടറിന് നേരിട്ട് യോഗ്യത നേടുകയും ചെയ്യും. തുടർന്ന് ഒൻപതാം സ്ഥാനം മുതൽ 24ആം സ്ഥാനം വരെയുള്ള ടീമുകൾ രണ്ട് ലെഗുകൾ ഉള്ള പ്ലേ ഓഫ് കളിച്ചതിന് ശേഷമാവും നോക്ക് ഔട്ട് ഘട്ടത്തിൽ ആരൊക്കെ എത്തുമെന്ന് തീരുമാനിക്കുക. 24ആം സ്ഥാനത്തിന് ശേഷം ഉള്ള ടീമുകൾ ചാമ്പ്യൻസ് ലീഗിൽ നിന്ന് പുറത്താവുകയും തുടർന്ന് നിലവിൽ നടക്കുന്ന ചാമ്പ്യൻസ് ലീഗ് രീതിയിൽ തന്നെ ബാക്കി മത്സരങ്ങൾ നടക്കുകയും ചെയ്യും. എന്നാൽ യൂറോപ്പിലെ വമ്പന്മാരായ 12 ടീമുകൾ യൂറോപ്യൻ സൂപ്പർ ലീഗ് എന്ന പുതിയ ലീഗിന് തുടക്കം കുറക്കുന്നതോടെ ചാമ്പ്യൻസ് ലീഗിന്റെ ഭാവിയെച്ചൊല്ലി ചോദ്യങ്ങൾ ഉയരും.

അതേസമയം സൂപ്പർ ലീഗിൽ പങ്കെടുത്താൽ ആഭ്യന്തര ലീഗുകൾ, യൂറോപ്യൻ പോരാട്ടങ്ങൾ എന്നിവയിൽ നിന്നും ക്ലബുകളെ വിലക്കുമെന്നാണ് യുവേഫ ഇന്നലെ നടത്തിയ പ്രസ്താവന വ്യക്തമാക്കുന്നത്. അങ്ങനെ സംഭവിച്ചാൽ പ്രീമിയർ ലീഗ്, ലാ ലിഗ, സീരി എ എന്നീ ലീഗുകളിൽ മുൻനിരയിൽ നിൽക്കുന്ന ക്ലബുകൾ അടുത്ത സീസണിൽ യൂറോപ്യൻ പോരാട്ടങ്ങൾക്കുണ്ടാകില്ല.