ലയണൽ മെസ്സിയുടെ തകർക്കാൻ കഴിയാത്ത റെക്കോർഡുകൾ |Lionel Messi

ലോകഫുട്ബോളിലെ ഏറ്റവും മികച്ച കളിക്കാരനായി അർജന്റീനിയൻ സൂപ്പർ താരം ലയണൽ മെസ്സി പരിഗണിക്കപ്പെടുന്നതിന് നിരവധി കാരണങ്ങളുണ്ട്. ആ കാരണങ്ങളിൽ ഏറ്റവും പ്രധാനപ്പെട്ട ഒന്നാണ് ലയണൽ മെസ്സി തന്റെ കരിയറിൽ നേടിയ റെക്കോർഡുകൾ.മറ്റൊരു കളിക്കാരനും വേഗത്തിൽ മറികടക്കാൻ കഴിയാത്തതാണ് ഈ റെക്കോർഡുകൾ.

ലയണൽ മെസ്സിയുടെ കരിയറിലെ റെക്കോർഡുകൾ പരിശോധിച്ചാൽ അവ എന്നെങ്കിലും തകർക്കപെടുമോ എന്ന സംശയമുണ്ട്.മെസ്സിയുടെ കരിയറിലെ ഏറ്റവും പ്രധാനപ്പെട്ട ചില റെക്കോർഡുകൾ നോക്കാം.ലോക ഫുട്ബോളിൽ ഏറ്റവും കൂടുതൽ ഗോൾ സംഭാവന നൽകിയ താരമാണ് മെസ്സി. ബ്രസീലിയൻ ഫുട്ബോൾ ഇതിഹാസം പെലെയുടെ റെക്കോർഡ് മറികടന്ന് മെസ്സി തന്റെ കരിയറിൽ ഇതിനകം 1123 ഗോൾ സംഭാവനകൾ നൽകി. ഒരു കലണ്ടർ വർഷത്തിൽ ഏറ്റവും കൂടുതൽ ഗോളുകൾ നേടിയ താരം കൂടിയാണ് മെസ്സി. 2012 കലണ്ടർ വർഷത്തിൽ 91 ഗോളുകളാണ് മെസ്സി നേടിയത്.

ഒരു സീസണിൽ ഏറ്റവും കൂടുതൽ ഗോളുകൾ നേടുന്ന താരമെന്ന റെക്കോർഡും ലയണൽ മെസ്സിയുടെ പേരിലാണ്. 2011/12 സീസണിൽ 82 ഗോളുകളാണ് മെസ്സി നേടിയത്. ഫൈനലിൽ ഏറ്റവും കൂടുതൽ ഗോളുകൾ നേടിയ താരമാണ് ലയണൽ മെസ്സി. അന്താരാഷ്ട്ര, ക്ലബ് ഫൈനലുകളിൽ 32 ഗോളുകൾ മെസ്സി നേടിയിട്ടുണ്ട്. ഏറ്റവും കൂടുതൽ ഗോളുകൾ നേടിയതിന് ഏറ്റവും കൂടുതൽ തവണ (6) ഗോൾഡൻ ബൂട്ട് നേടിയതും മെസ്സിയാണ്.

ലോക ഫുട്ബോളിൽ ഏറ്റവും കൂടുതൽ അസിസ്റ്റ് നേടിയ താരം കൂടിയാണ് അർജന്റീന ക്യാപ്റ്റൻ. തന്റെ കരിയറിൽ ഇതുവരെ 341 അസിസ്റ്റുകളാണ് ലയണൽ മെസ്സി നൽകിയത്. 2011 കലണ്ടർ വർഷത്തിൽ മെസ്സിയുടെ 36 അസിസ്റ്റുകൾ ഒരു കലണ്ടർ വർഷത്തിൽ ഒരു കളിക്കാരന്റെ ഏറ്റവും കൂടുതൽ അസിസ്റ്റുകൾ എന്ന റെക്കോർഡാണ്. ഈ വർഷത്തെ മികച്ച ഫുട്ബോൾ താരത്തെ തിരഞ്ഞെടുക്കുന്ന ഫ്രഞ്ച് വാർത്താ മാസികയായ ഫ്രാൻസ് ഫുട്ബോൾ നൽകുന്ന ബാലൺ ഡി ഓർ ഏറ്റവും കൂടുതൽ തവണ (7) നേടിയത് ലയണൽ മെസ്സിയാണ്.