പെനാൽറ്റി പാഴാക്കി വിനീഷ്യസ് ,വെനസ്വേലയോട് സമനില വഴങ്ങി ബ്രസീൽ | Brazil | Vinicius Jr

ലോകകപ്പ് യോഗ്യതാ മത്സരത്തിൽ ബ്രസീലിനെ സമനിലയിൽ തളച്ച് വെനസ്വേല. ഇരു ടീമുകളും ഓരോ ഗോളുകളാണ് മത്സരത്തിൽ നേടിയത്.മത്സരത്തിൽ ബ്രസീലിയൻ സൂപ്പർ താരം വിനീഷ്യസ് ജൂനിയർ പെനാൽറ്റി നഷ്ടപ്പെടുത്തുകയും ചെയ്തു.

ഗബ്രിയേൽ മാർട്ടിനെല്ലിയുടെയും വിനീഷ്യസിൻ്റെയും മുഖത്ത് തുടർച്ചയായി തട്ടിയതിന് പകരക്കാരനായ അലക്‌സാണ്ടർ ഗോൺസാലസ് ചുവപ്പ് കാർഡ് കണ്ട് പുറത്തായതിനെത്തുടർന്ന് കളിയുടെ അവസാന മിനിറ്റുകൾ 10 പേരായി ചുരുങ്ങി കളിച്ച വെനസ്വേലയ്‌ക്കെതിരെ പെനാൽറ്റിയിലൂടെ ബ്രസീലിന് വിജയം നേടാനുള്ള അവസരം വിനീഷ്യസ് ജൂനിയർ നഷ്ടപ്പെടുത്തി.അഞ്ച് തവണ ലോകകപ്പ് ചാമ്പ്യൻമാരായ ബ്രസീൽ 17 പോയിൻ്റുമായി മൂന്നാം സ്ഥാനത്താണ്.22 പോയന്റുമായി അർജന്റീനയാണ് ഒന്നാം സ്ഥാനത്ത്. 19 പോയന്റുള്ള കൊളംബിയ രണ്ടാമതുണ്ട്.വെനസ്വേല 12 പോയിൻ്റുമായി ഏഴാം സ്ഥാനത്തുമാണ്.

ഉയർന്ന വേഗതയിൽ നടന്ന മത്സരത്തിൽ 11 ഗോൾ ശ്രമങ്ങൾ വീതം നേടിയ ഇരുടീമുകളും നിരവധി അവസരങ്ങൾ സൃഷ്ടിച്ചു.ബ്രസീൽ 60% പൊസഷൻ ആസ്വദിച്ചെങ്കിലും അവരുടെ ആധിപത്യം ഗോളാക്കി മാറ്റുന്നതിൽ പരാജയപ്പെടുകയും പലപ്പോഴും പ്രത്യാക്രമണങ്ങൾക്ക് വിധേയമാകുകയും ചെയ്തു.43-ാം മിനിറ്റിൽ ബോക്‌സിൻ്റെ അരികിൽ ലഭിച്ച ഫ്രീകിക്കിൽ നിന്ന് റാഫിൻഹ ബ്രസീലിന് ലീഡ് നൽകി.2005ൽ വെനസ്വേലയ്‌ക്കെതിരെ മുൻ റയൽ മാഡ്രിഡ് ഫുൾബാക്ക് റോബർട്ടോ കാർലോസ് സ്‌കോർ ചെയ്തതിന് ശേഷം 19 വർഷത്തിനിടെ ലോകകപ്പ് യോഗ്യതാ റൗണ്ടിൽ ബ്രസീലിൻ്റെ ഫ്രീകിക്കിൽ നിന്നുള്ള ആദ്യ ഗോളാണിത്.

എന്നാൽ രണ്ടാം പകുതിയിൽ വെനസ്വേല സമനില പിടിച്ചു.പകരക്കാരനായി രണ്ടാം പകുതിയുടെ തുടക്കംമുതൽ കളത്തിലെത്തിയ ടെലാസ്കോ സെഗോവിയയായിരുന്നു സ്കോറർ. ഗോളി റോമോ വിനീഷ്യസിനെ ഫൗൾ ചെയ്ത് വീഴ്ത്തിയതിന് ബ്രസീലിന് അനുകൂലമായി പെനാൽറ്റി ലഭിച്ചു. എന്നാൽ റയൽ മാഡ്രിഡ് താരത്തിന്റെ കിക്ക് റോമോ തടുത്തിട്ടു.89-ാം മിനിറ്റിൽ അലക്‌സാണ്ടർ ഗോൺസാലസ് ചുവപ്പ് കാർഡ് കണ്ടതിനെത്തുടർന്ന് വെനസ്വേലയുടെ അവസാന നിമിഷങ്ങൾ 10 പേരായി ചുരുങ്ങി.ചൊവ്വാഴ്ച സാൽവഡോറിൽ ബ്രസീൽ ഉറുഗ്വെയെ നേരിടും, വെനസ്വേല ചിലിയിൽ കളിക്കും.