‘ഇത് എനിക്ക് നാണക്കേടുണ്ടാക്കി’ : തന്നെ ‘കിംഗ്’ എന്ന് വിളിക്കുന്നത് നിർത്താൻ ആരാധകരോട് ആവശ്യപ്പെട്ട് വിരാട് കോഹ്‌ലി | Virat Kohli

റോയൽ ചലഞ്ചേഴ്‌സ് ബാംഗ്ലൂർ (ആർസിബി)-ഇപ്പോൾ റോയൽ ചലഞ്ചേഴ്‌സ് ബംഗളൂരു എന്ന് പുനർനാമകരണം ചെയ്യപ്പെട്ടിരിക്കുകയാണ്.ബംഗളുരുവിലെ ചിന്നസ്വാമി സ്റ്റേഡിയത്തിൽ ഒരു അൺബോക്‌സ് ഇവൻ്റോടെ ഒരു പുതിയ സീസണിന് അവർ തുടക്കം കുറിച്ചിരിക്കുകയാണ്.ഐപിഎൽ 2024 ന് മുന്നോടിയായി ഫ്രാഞ്ചൈസി ഒരു പുതിയ ലോഗോയും പുതിയ ജേഴ്‌സിയും അവതരിപ്പിച്ചു.

അൺബോക്‌സ് ഇവൻ്റിൻ്റെ അവസാനം വിരാട് കോഹ്‌ലി തൻ്റെ ആരാധകരോട് ഒരു അഭ്യർത്ഥന നടത്തി.തന്നെ ‘കിംഗ് ‘ എന്ന് അഭിസംബോധന ചെയ്യുന്നതിൽ നിന്ന് വിട്ടുനിൽക്കണമെന്ന് വിരാട് കോഹ്‌ലി ആരാധകരോട് അഭ്യർത്ഥിച്ചു. ഇന്ത്യൻ ബാറ്റിംഗ് ഇതിഹാസം ആ പേര് വിളിക്കുന്നതിൽ അസ്വസ്ഥത പ്രകടിപ്പിച്ചു, ഇത് തനിക്ക് നാണക്കേടുണ്ടാക്കിയതായി പ്രസ്താവിച്ചു. തന്നെ പേര് പരാമർശിക്കുമ്പോൾ ‘കിംഗ്’ എന്ന പദം ഉപയോഗിക്കുന്നത് നിർത്തണമെന്ന് 35 കാരനായ സ്റ്റാർ ക്രിക്കറ്റ് താരം തൻ്റെ ആരാധകരോട് താഴ്മയോടെ അഭ്യർത്ഥിച്ചു.

“ആദ്യം, നിങ്ങൾ എന്നെ ആ വാക്ക് (king) വിളിക്കുന്നത് നിർത്തണം, ദയവായി എന്നെ വിരാട് എന്ന് വിളിക്കുക, എന്നെ ആ വാക്ക് (king) എന്ന് വിളിക്കരുത്.ഞാൻ ഫാഫ് ഡു പ്ലെസിസിനോട് പറയുകയായിരുന്നു, എല്ലാ വർഷവും നിങ്ങൾ എന്നെ ആ വാക്ക് വിളിക്കുമ്പോൾ എനിക്ക് ലജ്ജ തോന്നുന്നു. അതുകൊണ്ട് ഇനി മുതൽ എന്നെ വിരാട് എന്ന് വിളിക്കൂ; ആ വാക്ക് ഉപയോഗിക്കരുത്. ഇത് എന്നെ സംബന്ധിച്ചിടത്തോളം വളരെ ലജ്ജാകരമാണ്,” വിരാട് പറഞ്ഞു.

മാർച്ച് 22 ന് ചെന്നൈയിലെ എംഎ ചിദംബരം സ്റ്റേഡിയത്തിൽ നിലവിലെ ചാമ്പ്യൻമാരായ ചെന്നൈ സൂപ്പർ കിംഗ്‌സിനെതിരെ ടൂർണമെൻ്റ് ഉദ്ഘാടന മത്സരത്തിൽ RCB അവരുടെ IPL 2024 പ്രചാരണത്തിന് തുടക്കം കുറിക്കും.2008ൽ ടൂർണമെൻ്റ് ആരംഭിച്ചതിന് ശേഷം ഇതുവരെ ഒരു ഐപിഎൽ കിരീടം ആർസിബിക്ക് ലഭിച്ചിട്ടില്ല. ആദ്യ കിരീടം നേടുക എന്ന ലക്ഷ്യത്തോടെയാണ് കോലി ഇത്തവണ ഇറങ്ങുന്നത്.