സിംബാബ്‌വെയ്‌ക്കെതിരായ അവസാന ടി20യിൽ സഞ്ജു സാംസൺ ബാറ്റുകൊണ്ട് മികച്ച പ്രകടനമാണ് പുറത്തെടുത്തത്. 45 പന്തിൽ നാല് സിക്‌സറുകളും ഒരു ബൗണ്ടറിയും സഹിതം 58 റൺസെടുത്ത അദ്ദേഹം തൻ്റെ രണ്ടാം അന്താരാഷ്ട്ര ടി20 അർദ്ധ സെഞ്ച്വറി നേടി.
തൻ്റെ ഇന്നിംഗ്‌സിനിടെ, റിയാൻ പരാഗിനൊപ്പം (22) 65 റൺസ് കൂട്ടുകെട്ട് സൃഷ്ടിച്ചപ്പോൾ,സഞ്ജു സ്പിന്നർമാർക്കെതിരെ ആക്രമിച്ച് കളിച്ചു. ലെഗ്ഗി ബ്രാൻഡൻ മാവൂട്ടയെ 110 മീറ്റർ സിക്‌സറിന് അദ്ദേഹം പറത്തി. അതേ ഓവറിൽ മറ്റൊരു സിക്‌സ് കൂടി കവറിലേക്ക് അയാൾ അടിച്ചു. ഞായറാഴ്ചത്തെ 58 റൺസിന് ശേഷം, സഞ്ജു സാംസൺ ഇപ്പോൾ 28 ടി20 ഐ മത്സരങ്ങളിൽ നിന്ന് 133.33 സ്‌ട്രൈക്ക് റേറ്റിൽ 444 റൺസ് നേടിയിട്ടുണ്ട്.
എട്ട് വർഷത്തിലേറെയായി ഇന്ത്യക്കായി അന്താരാഷ്ട്ര ക്രിക്കറ്റ് കളിച്ചിട്ടും അദ്ദേഹത്തിൻ്റെ ശരാശരി 21.14 ആണ്. ഇതോടെ, സഞ്ജു തൻ്റെ അവസരങ്ങൾ വളരെ കുറച്ച് മാത്രമേ ഉപയോഗിച്ചുള്ളൂ,സ്ഥിരത അദ്ദേഹത്തിൻ്റെ ഗെയിമിൽ ഒരു പ്രധാന പ്രശ്നമായിരുന്നു എന്നും മുൻ ഇന്ത്യൻ താരം അഭിനവ് മുകുന്ദ് ചൂണ്ടിക്കാണിച്ചു. ഇന്ത്യയുടെ പരമ്പര വിജയത്തിന് ശേഷം സംസാരിച്ച മുൻ ഇന്ത്യൻ ക്രിക്കറ്റ് താരം അഭിനവ് മുകുന്ദ് സഞ്ജുവിൻ്റെ ഇന്നിംഗ്‌സിനെ പ്രശംസിക്കുകയും, അതോടൊപ്പം ചില വിമർശനങ്ങൾ ഉന്നയിക്കുകയും ചെയ്തു.
“എല്ലാ കഴിവുകളും ഉള്ള സഞ്ജു സാംസൺ ഇന്ത്യൻ ക്രിക്കറ്റിൽ വളരെ ബുദ്ധിമുട്ടുള്ള നിലയിലാണ് ഇപ്പോൾ, കാരണം ചിലപ്പോൾ നിങ്ങളെ നിരാശപ്പെടുത്താൻ അദ്ദേഹം ശ്രമിക്കുന്നു, അദ്ദേഹം പക്വത കാണിക്കുന്നില്ല.എനിക്ക് തോന്നുന്നു, അവിടെയാണ് അദ്ദേഹം എന്നോട് നേരത്തെ പറഞ്ഞത് പോലെ, ഐപിഎല്ലിലെ ക്യാപ്റ്റൻസി അദ്ദേഹത്തിന് സഹായകമാകുന്നത്. സൂപ്പർ താരങ്ങൾക്കൊപ്പം കളിക്കുന്നതാണ് (രാജസ്ഥാൻ റോയല്സിൽ) അദ്ദേഹത്തെ സഹായിച്ചത്, എന്നാൽ റിയാൻ പരാഗ്, യശസ്വി ജയ്‌സ്വാൾ എന്നിവരെപ്പോലുള്ള യുവതാരങ്ങളുമായും അദ്ദേഹം ഇടപെടുന്നു,” സോണി സ്‌പോർട്‌സ് നെറ്റ്‌വർക്കിൽ മുകുന്ദ് പറഞ്ഞു. എന്നിരുന്നാലും, ഈ തിരിച്ചടികൾക്ക് ഇടയിലും ടി20യിൽ ഇന്ത്യക്കായി വിക്കറ്റ് കീപ്പർ-ബാറ്ററുടെ സ്ഥാനത്തിനായി സഞ്ജു സാംസൺ മികച്ച മത്സരാർത്ഥിയാണെന്ന് മുൻ ഇന്ത്യൻ ക്രിക്കറ്റ് താരം കൂട്ടിച്ചേർത്തു.