‘തുടർച്ചയായ ഗോളുകൾ’ : ഗോളടിയിൽ ദിമിക്കൊപ്പമെത്തി ബ്ലാസ്റ്റേഴ്‌സ് സ്‌ട്രൈക്കർ ജീസസ് ജിമെനെസ് | Kerala Blasters

ഇന്ത്യൻ സൂപ്പർ ലീഗിൽ 7 മത്സരങ്ങളിൽ നിന്ന് 5 ഗോളുകളുമായി കേരള ബ്ലാസ്റ്റേഴ്സിൽ ജീസസ് ജിമെനെസ് മികച്ച തുടക്കം കുറിച്ചു. മുൻ ബ്ലാസ്റ്റേഴ്‌സ് സ്‌ട്രൈക്കറായ ദിമിട്രിയോസ് ഡയമൻ്റകോസിനു ഒപ്പം എത്തിയിരിക്കുകയാണ് സ്‌പെയിൻകാരൻ. ജീസസ് ജിമിനാസ് ഓരോ മത്സരം കഴിയുമ്പോഴും തന്റെ വ്യക്തിഗത മികവ് മെച്ചപ്പെടുത്തുന്നത് തുടർന്നുകൊണ്ടിരിക്കുകയാണ്. ഇപ്പോൾ, ഹൈദരാബാദിനെതിരായ മത്സരത്തിൽ ഗോൾ നേടിയതോടെ, ക്ലബ്ബ് റെക്കോർഡ് പുസ്തകത്തിൽ തന്റെ പേര് ചേർത്തിരിക്കുകയാണ്.

പ്രീ സീസൺ പോലും കളിക്കാതെയാണ് ജീസസ് ജിമിനസ് കേരള ബ്ലാസ്റ്റേഴ്‌സ് ടീമിനൊപ്പം ഇറങ്ങാൻ തുടങ്ങിയത്. എന്നാൽ അതിന്റെ യാതൊരു കുറവും ഇതുവരെയുള്ള പ്രകടനത്തിൽ താരം കാണിച്ചിട്ടില്ല. ടീമിനൊപ്പം മികച്ച രീതിയിൽ ഇണങ്ങിച്ചേരാൻ ജിമിനസിനു കഴിഞ്ഞു.കേരള ബ്ലാസ്റ്റേഴ്‌സിൽ കഴിഞ്ഞ നാല് സീസണുകളിൽ ഒരു സ്‌ട്രൈക്കർക്ക് ലഭിച്ച ഏറ്റവും മികച്ച തുടക്കങ്ങളിൽ ഒന്നുകൂടിയാണ് ജീസസ് ജിമിനസിന്റേത്.

ഹൈദെരാബാദിനെതിരെ നേടിയ ഗോളോടെ തുടർച്ചയായ അഞ്ചാമത്തെ മത്സരത്തിലും ജിമിനാസ് ഗോൾ നേടിയിരിക്കുകയാണ്. കേരള ബ്ലാസ്റ്റേഴ്സിന് വേണ്ടി ഏറ്റവും കൂടുതൽ തുടർച്ചയായ മത്സരങ്ങളിൽ ഗോൾ നേടുന്ന കളിക്കാരനായി ദിമിത്രിയോസ് ഡയമന്റകോസിനൊപ്പം തന്റെ പേര് എഴുതി ചേർത്തിരിക്കുകയാണ് ജീസസ് . ഡയമന്റകോസ് 2022 നവംബർ – ഡിസംബർ സമയത്താണ് തുടർച്ചയായി അഞ്ച് മത്സരങ്ങളിൽ ഗോൾ സ്കോർ ചെയ്തത്. കൂടാതെ, 2023 ഡിസംബർ – 2024 ഫെബ്രുവരി കാലയളവിൽ ഗ്രീക്ക് സ്ട്രൈക്കർ കേരള ബ്ലാസ്റ്റേഴ്സിന് വേണ്ടി തുടർച്ചയായി 4 മത്സരങ്ങളിൽ ഗോൾ നേടിയിട്ടുണ്ട്. ഇദ്ദേഹത്തെ കൂടാതെ, കേരള ബ്ലാസ്റ്റേഴ്സിന്റെ മുൻ ഇംഗ്ലീഷ് സ്ട്രൈക്കർ അന്റോണിയോ ജർമ്മനും തുടർച്ചയായ നാല് മത്സരങ്ങളിൽ മഞ്ഞ ജഴ്സിയിൽ ഗോൾ നേടിയിട്ടുണ്ട്.

സ്പാനിഷ് താരം ഇതുവരെ 8 മത്സരങ്ങൾ കളിച്ച താരം 6 ഗോളുകൾ നേടുകയും ഒരു ഗോളിന് വഴിയൊരുക്കുകയും ചെയ്‌തു. അടുത്ത മത്സരത്തിലും ജീസസ് ജിമിനാസിന് ഗോൾ നേടാൻ സാധിച്ചാൽ, ഏറ്റവും കൂടുതൽ തുടർച്ചയായ മത്സരങ്ങളിൽ ഗോൾ നേടുന്ന കേരള ബ്ലാസ്റ്റേഴ്സ് താരം എന്ന പുതിയ റെക്കോർഡ് ജീസസ് ജിമിനാസ് സ്വന്തമാക്കും.