വിരാട് കോഹ്‌ലിയുടെ 84 റൺസ് ഇന്നിംഗ്‌സിന്റെ ബലത്തിൽ, ചൊവ്വാഴ്ച ദുബായിൽ നടന്ന മത്സരത്തിൽ ഇന്ത്യ ഓസ്‌ട്രേലിയയെ 4 വിക്കറ്റിന് പരാജയപ്പെടുത്തി, 2025 ലെ ചാമ്പ്യൻസ് ട്രോഫിയുടെ ഫൈനലിലേക്ക് പ്രവേശിച്ചു. ടോസ് നേടി ആദ്യം ബാറ്റ് ചെയ്ത ഓസ്ട്രേലിയ 49.3 ഓവറിൽ 264 റൺസിന് ഓൾഔട്ടായി. മറുപടി ബാറ്റിംഗിൽ രോഹിത് ശർമ്മയുടെ നേതൃത്വത്തിലുള്ള ടീം 48.1 ഓവറിൽ ലക്‌ഷ്യം മറികടന്നു.84 റൺസ് നേടിയ വിരാട് കോഹ്‌ലിയാണ് ഏറ്റവും ഉയർന്ന സ്കോർ നേടിയത്. ഈ മത്സരത്തിൽ അദ്ദേഹം സച്ചിൻ ടെണ്ടുൽക്കറുടെ ഒരു വലിയ റെക്കോർഡ് തകർത്തു.
ഐസിസി ഏകദിന ടൂർണമെന്റിൽ (ലോകകപ്പ് അല്ലെങ്കിൽ ചാമ്പ്യൻസ് ട്രോഫി) കോഹ്‌ലി 24-ാം തവണയാണ് 50 അല്ലെങ്കിൽ അതിൽ കൂടുതൽ റൺസ് നേടുന്നത്. ഈ കാര്യത്തിൽ അദ്ദേഹം സച്ചിനെ പിന്നിലാക്കി. ഐസിസി ഏകദിന ടൂർണമെന്റുകളിൽ 58 ഇന്നിംഗ്‌സുകളിൽ നിന്ന് 23 തവണയാണ് സച്ചിൻ 50 അല്ലെങ്കിൽ അതിൽ കൂടുതൽ റൺസ് നേടിയത്. തന്റെ 53-ാം ഇന്നിംഗ്‌സിലാണ് കോഹ്‌ലി ഇത് നേടിയത്. സച്ചിന്റെ നിരവധി റെക്കോർഡുകൾ അദ്ദേഹം തകർത്തു. ഇപ്പോഴിതാ ഈ പട്ടികയിലേക്ക് മറ്റൊരു റെക്കോർഡ് കൂടി എത്തിയിരിക്കുന്നു.
ഐസിസി ഏകദിന ടൂർണമെന്റുകളിൽ ഏറ്റവും കൂടുതൽ 50+ റൺസ് നേടിയ കളിക്കാർ:-
24 – വിരാട് കോഹ്‌ലി (53 ഇന്നിംഗ്‌സ്)
23 – സച്ചിൻ ടെണ്ടുൽക്കർ (58 ഇന്നിംഗ്‌സ്)
18 – രോഹിത് ശർമ്മ (42 ഇന്നിംഗ്‌സ്)
17 – കുമാർ സംഗക്കാര (56 ഇന്നിംഗ്‌സ്)
16 – റിക്കി പോണ്ടിംഗ് (60 ഇന്നിംഗ്‌സ്)
മത്സരത്തിൽ അർദ്ധസെഞ്ച്വറി പൂർത്തിയാക്കിയതോടെ, ഏകദിന റൺ ചേസിൽ 8000 റൺസ് തികച്ച ഇന്ത്യയുടെ സ്റ്റാർ ബാറ്റ്‌സ്മാൻ വിരാട് കോഹ്‌ലി, ഏകദിന റൺ ചേസിൽ 8000 റൺസ് തികയ്ക്കുന്ന ചരിത്രത്തിലെ രണ്ടാമത്തെ മാത്രം കളിക്കാരനായി മാറി. വെറും 170 മത്സരങ്ങളിൽ നിന്നാണ് കോഹ്‌ലി ഈ നാഴികക്കല്ല് പിന്നിട്ടത്, ഏകദിന റൺ ചേസിൽ 8000 റൺസ് കടന്ന ഏക ബാറ്റ്‌സ്മാൻ എന്ന റെക്കോർഡ് സച്ചിൻ ടെണ്ടുൽക്കറിനൊപ്പം ചേർന്നു.242 മത്സരങ്ങളിൽ നിന്ന് 88.4 എന്ന സ്ട്രൈക്ക് റേറ്റിൽ സച്ചിൻ 8720 റൺസ് നേടിയപ്പോൾ, 93.30 എന്ന സ്ട്രൈക്ക് റേറ്റിൽ 64.71 എന്ന ശരാശരിയിൽ കോഹ്‌ലി 8000 റൺസ് നേടിയിട്ടുണ്ട്.
കോഹ്‌ലിയുടെ പേരിൽ മറ്റൊരു വലിയ റെക്കോർഡ് കൂടി പിറന്നു. ചാമ്പ്യൻസ് ട്രോഫി ചരിത്രത്തിൽ ഇന്ത്യയ്ക്കായി ഏറ്റവും കൂടുതൽ റൺസ് നേടിയ കളിക്കാരനായി അദ്ദേഹം മാറി. ഈ കാര്യത്തിൽ വിരാട് തന്റെ മുൻ സഹതാരം ശിഖർ ധവാനെ പിന്നിലാക്കി. ചൊവ്വാഴ്ച ദുബായിൽ ഓസ്‌ട്രേലിയയ്‌ക്കെതിരെ 40-ാം റൺസ് നേടിയപ്പോൾ തന്നെ അദ്ദേഹം ധവാനെ മറികടന്നു. ചാമ്പ്യൻസ് ട്രോഫിയിൽ മുൻ ഇന്ത്യൻ ഓപ്പണർ 701 റൺസ് നേടിയിരുന്നു. 17 മത്സരങ്ങളിൽ നിന്ന് 746 റൺസാണ് വിരാടിന്റെ സമ്പാദ്യം.