‘രക്ഷകൻ’ : ടെസ്റ്റ് ക്രിക്കറ്റിൽ തൻ്റെ ആദ്യ സെഞ്ച്വറി നേടി സർഫറാസ് ഖാൻ | Sarfaraz Khan

ന്യൂസിലൻഡിനെതിരായ ആദ്യ ടെസ്റ്റ് മത്സരത്തിൽ, ഇന്ത്യൻ ടീമിൻ്റെ സ്റ്റാർ ബാറ്റ്‌സ്മാൻ സർഫറാസ് ഖാൻ തൻ്റെ ബാറ്റിംഗിലൂടെ ഏവരുടെയും ഹൃദയം കീഴടക്കി. ആദ്യ ഇന്നിംഗ്‌സിൽ അക്കൗണ്ട് തുറക്കാൻ പോലും കഴിയാതിരുന്ന സർഫറാസ് ഖാൻ രണ്ടാം ഇന്നിംഗ്‌സിൽ വലിയ തിരിച്ചുവരവ് നടത്തിയത് ഏവരെയും അത്ഭുതപ്പെടുത്തുന്നു.

ഇന്ത്യക്കായി ടെസ്റ്റ് ക്രിക്കറ്റിൽ തൻ്റെ ആദ്യ സെഞ്ച്വറി നേടിയിരിക്കുകയാണ് സർഫറാസ്. അദ്ദേഹത്തിൻ്റെ സെഞ്ചുറിക്ക് നന്ദി, ന്യൂസിലൻഡിനെതിരായ ആദ്യ ടെസ്റ്റിൽ ഇന്ത്യൻ ടീം ശക്തമായ തിരിച്ചുവരവ് നടത്തി.70 റൺസുമായി ബാറ്റിംഗ് ആരംഭിച്ച സർഫറാസ് റിഷാബ് പന്തുമായി ചേർന്ന് വേഗത്തിൽ സ്കോർ ചെയ്തു. 111 പന്തിൽ നിന്നും തന്റെ ആദ്യ സെഞ്ച്വറി പൂർത്തിയാക്കി.തന്റെ ഇന്നിഗ്‌സിൽ സർഫറാസ് 13 ഫോറും മൂന്ന് സിക്‌സറും പറത്തി.

താരത്തിന്റെ ഏഴാമത്തെ ഇന്നിങ്സിൽ നിന്നാണ് ആദ്യ സെഞ്ച്വറി പിറന്നത്. കഴുത്തിനു പരിക്കേറ്റ ശുഭ്മാൻ ഗില്ലിന് പകരമായാണ് സർഫറാസ് ടീമിൽത്തിയത്. ഈ മാസം ആദ്യം റെസ്റ്റ് ഓഫ് ഇന്ത്യയ്‌ക്കെതിരെ മുംബൈയ്‌ക്കായി ഇറാനി കപ്പിൽ ഇരട്ട സെഞ്ച്വറി നേടിയതിന് ശേഷമാണ് സർഫറാസ് വരുന്നത്. ഫസ്റ്റ് ക്ലാസ് ക്രിക്കറ്റിൽ 15 സെഞ്ച്വറികൾ നേടിയിട്ടുണ്ട്.ഈ വർഷം മികച്ച ഫോമിലാണ് സർഫറാസ് ഖാൻ. ഇംഗ്ലണ്ടിനെതിരെ ഇന്ത്യൻ ടീമിനായി അദ്ദേഹം ആദ്യമായി അരങ്ങേറ്റം കുറിച്ചു, അവിടെയും മുഴുവൻ പരമ്പരയിലും അദ്ദേഹം മികച്ച പ്രകടനം പുറത്തെടുത്തു.

ഇതിന് ശേഷം ബംഗ്ലാദേശ് ടെസ്റ്റിൽ കളിക്കാൻ അവസരം ലഭിച്ചില്ല. അത്തരമൊരു സാഹചര്യത്തിലാണ് അദ്ദേഹം ഇറാനി കപ്പ് കളിച്ച് 200 റൺസ് നേടിയത്. ഇതിനുശേഷം, ന്യൂസിലൻഡിനെതിരായ ആദ്യ ടെസ്റ്റിൽ ശുഭ്മാൻ ഗില്ലിന് പകരം അദ്ദേഹം ഇടം നേടി, ഈ അവസരം അദ്ദേഹം പൂർണ്ണമായും മുതലെടുത്തു.