വരാനിരിക്കുന്ന ടി20 ലോകകപ്പിൽ മികച്ച പ്രകടനം നടത്താൻ ഇന്ത്യൻ ക്രിക്കറ്റ് ടീം നായകൻ രോഹിത് ശർമ്മയെ പിന്തുണച്ച് മുൻ ഇന്ത്യൻ നായകൻ സൗരവ് ഗാംഗുലി. ഐപിഎൽ 2024 ലെ ഹിറ്റ്മാൻ്റെ മോശം ഫോമിനെക്കുറിച്ചുള്ള ആശങ്കകൾക്കിടയിലാണ് മുൻ ഇന്ത്യൻ നായകന്റെ അഭിപ്രായം.
യുഎസ്എയും കരീബിയൻ ദ്വീപുകളും സഹകരിച്ച് ആതിഥേയത്വം വഹിക്കുന്ന ടൂർണമെൻ്റിൽ വിരാട് കോഹ്‌ലി ഇന്ത്യയ്‌ക്കായി ബാറ്റിംഗ് ഓപ്പൺ ചെയ്യുന്നത് കാണാനുള്ള ആഗ്രഹം ഗാംഗുലി പ്രകടിപ്പിച്ചു.വലിയ ടൂർണമെൻ്റുകളിൽ മികച്ച പ്രകടനം കാഴ്ചവെച്ച ചരിത്രമാണ് രോഹിത് ശർമയ്ക്കുള്ളതെന്ന് പ്രവീൺ ആംരെയുടെ പുസ്തക പ്രകാശന ചടങ്ങിൽ സംസാരിക്കവെ ഗാംഗുലി അഭിപ്രായപ്പെട്ടു. ഒരു വലിയ സ്റ്റേജിൽ കളിക്കുമ്പോൾ ഹിറ്റ്മാൻ നന്നായിരിക്കുമെന്നും ഇന്ത്യ ശക്തമായ ടീമുമായാണ് ലോകകപ്പിന് പോവുന്നതെന്നും ഗാംഗുലി പറഞ്ഞു.
ഐപിഎൽ 2024 ൽ മുംബൈക്ക് വേണ്ടി ഇന്നിംഗ്‌സ് ഓപ്പൺ ചെയ്ത രോഹിത്തിന് 13 മത്സരങ്ങളിൽ നിന്ന് 145.41 സ്‌ട്രൈക്ക് റേറ്റിൽ 349 റൺസ് മാത്രമാണ് നേടാനായത്.“ഇന്ത്യ വളരെ മികച്ച ടീമാണ്. ലോകകപ്പിൽ രോഹിത് നന്നായി കളിക്കും. വലിയ ടൂർണമെൻ്റുകളിൽ അദ്ദേഹം നന്നായി കളിക്കുന്നു” ഗാംഗുലി പറഞ്ഞു.ഇന്ത്യയ്‌ക്കായി ആരാണ് ബാറ്റിംഗ് ഓപ്പൺ ചെയ്യേണ്ടത് എന്നതിനെക്കുറിച്ചും ഗാംഗുലി പറഞ്ഞു.
ഐപിഎൽ 2024 ലെ വിരാട് കോഹ്‌ലിയുടെ മികച്ച ഫോം ടി20 ലോകകപ്പിൽ ഇന്ത്യയ്‌ക്കായി ഇന്നിംഗ്‌സ് ആരംഭിക്കാൻ ഗാംഗുലിയെ പിന്തുണയ്‌ക്കാൻ പ്രേരിപ്പിച്ചു. ഐപിഎൽ 2024ൽ 66.10 ശരാശരിയിൽ 661 റൺസ് നേടിയ റൺ-മാസ്ട്രോ നിലവിൽ ഏറ്റവും കൂടുതൽ റൺസ് നേടുന്നയാളാണ്.”ടി20 ലോകകപ്പിൽ വിരാട് കോഹ്‌ലി ഇന്ത്യക്കായി ഓപ്പൺ ചെയ്യണമെന്ന് ഞാൻ കരുതുന്നു,” അദ്ദേഹം കൂട്ടിച്ചേർത്തു.