മോശം ഫോമിൻ്റെ പേരിൽ കുറച്ചു നാളുകളായി ഇന്ത്യൻ ക്യാപ്റ്റൻ രോഹിത് ശർമ്മ വിമർശനത്തിന് വിധേയനായിരുന്നു. ഓസ്‌ട്രേലിയയ്‌ക്കെതിരായ 1-3 തോൽവി അദ്ദേഹത്തെ കൂടുതൽ കുഴപ്പത്തിലാക്കുകയും വിരമിക്കൽ ചർച്ചകൾ ശക്തമാവുകയും ചെയ്തു. എന്നാൽ ഈ ഊഹാപോഹങ്ങൾ മാറ്റിവെച്ച് വലിയൊരു തീരുമാനമെടുത്തിരിക്കുകയാണ് ഹിറ്റ്മാൻ.
എട്ട് വർഷത്തിന് ശേഷം ക്യാപ്റ്റൻ രോഹിത് ശർമ്മ ആഭ്യന്തര ടൂർണമെൻ്റിലേക്ക് തിരിച്ചെത്തും. ഹിറ്റ്മാൻ തൻ്റെ ടീമായ മുംബൈയ്‌ക്കൊപ്പം പരിശീലനം നടത്തി.ജമ്മു കശ്മീരിനെതിരായ മുംബൈയുടെ വരാനിരിക്കുന്ന മത്സരത്തിൽ രോഹിത് കളിക്കുമോ എന്ന് ഉറപ്പില്ല.ഇന്ത്യൻ ടീമിലെ താരങ്ങളോട് ആഭ്യന്തര കളിക്കാൻ ബിസിസിഐ കർശന നിർദേശം നൽകിയിരുന്നു. ഓസ്‌ട്രേലിയയ്‌ക്കെതിരായ അടുത്തിടെ സമാപിച്ച പരമ്പരയിൽ, രോഹിത് ശർമ്മ ഉൾപ്പെടെയുള്ള ഇന്ത്യയുടെ മുൻനിര ബാറ്റ്‌സ്മാൻമാർക്ക് കാര്യമായ പ്രകടനം കാഴ്ചവയ്ക്കാൻ കഴിഞ്ഞില്ല. മൂന്ന് ടെസ്റ്റുകളിൽ നിന്ന് അഞ്ച് ഇന്നിംഗ്‌സുകളിൽ നിന്ന് രോഹിത്തിന് 31 റൺസ് മാത്രമേ നേടാനായുള്ളൂ, പരമ്പരയിലെ അദ്ദേഹത്തിന്റെ ഉയർന്ന സ്‌കോർ 10 റൺസാണ്.
ബികെസിയിൽ മുംബൈ ടീമിനൊപ്പം രോഹിത് ശർമ പരിശീലനം നടത്തി. അജിങ്ക്യ രഹാനെ, ശ്രേയസ് അയ്യർ തുടങ്ങിയ താരങ്ങളും അദ്ദേഹത്തിൻ്റെ ടീമിലുണ്ട്. “ഇപ്പോൾ, ജമ്മു കശ്മീരിനെതിരായ മത്സരം കളിക്കാൻ അദ്ദേഹത്തിന് താൽപ്പര്യമുണ്ടെന്നാണ് എല്ലാ സൂചനകളും” . പരിക്ക് കാരണം സർഫറാസ് ഖാൻ ഈ മത്സരത്തിൻ്റെ ഭാഗമാകില്ല. ഒരു പ്രധാന ബാറ്റ്‌സ്മാനായി കണക്കാക്കപ്പെടുന്ന വിരാട് കോഹ്‌ലി, ടീം ഇന്ത്യയ്ക്കായി ടെസ്റ്റ് ക്രിക്കറ്റിൽ ഫോം കണ്ടെത്താൻ പാടുപെട്ടു. പെർത്തിൽ ആദ്യ ടെസ്റ്റിന്റെ രണ്ടാം ഇന്നിംഗ്‌സിൽ സെഞ്ച്വറിയോടെ ശക്തമായ തുടക്കം കുറിച്ച 36 കാരനായ ബാറ്റ്‌സ്മാൻ പരമ്പരയിലുടനീളം 190 റൺസ് മാത്രമേ നേടിയിട്ടുള്ളൂ. ഓഫ്-സ്റ്റമ്പിന് പുറത്തുള്ള പന്തുകൾക്കെതിരെ അദ്ദേഹം നടത്തിയ പോരാട്ടങ്ങൾ പ്രകടമായിരുന്നു, ഇത് വ്യാപകമായ വിമർശനങ്ങൾക്ക് കാരണമായി.
രോഹിത് ശർമ്മയും വിരാട് കോഹ്‌ലിയും ടെസ്റ്റിൽ മോശം പ്രകടനം കാഴ്ചവയ്ക്കുന്നതിനാൽ, ലോകമെമ്പാടുമുള്ള ആരാധകരും ക്രിക്കറ്റ് വിദഗ്ധരും സ്റ്റാർ ബാറ്റ്‌സ്മാന്മാർ ആഭ്യന്തര ക്രിക്കറ്റിലേക്ക്, പ്രത്യേകിച്ച് രഞ്ജി ട്രോഫിയിലേക്ക് മടങ്ങിവന്ന് ഫോം വീണ്ടെടുക്കണമെന്ന് അഭിപ്രായപെട്ടിരുന്നു.2024-25 രഞ്ജി ട്രോഫിയുടെ അടുത്ത റൗണ്ടിനുള്ള ഡൽഹി ടീമിൽ സ്റ്റാർ ഇന്ത്യ ബാറ്റ്‌സ്മാൻമാരായ വിരാട് കോഹ്‌ലിയെയും റിഷാബ് പന്തിനെയും സാധ്യതാ ടീമിൽ ഉൾപ്പെടുത്തിയിട്ടുണ്ട്.2012 ലാണ് കോഹ്‌ലി അവസാനമായി രഞ്ജി മത്സരം കളിച്ചത്, അതേസമയം പന്ത് 2017 ൽ ഇന്ത്യയുടെ പ്രീമിയർ ഫസ്റ്റ് ക്ലാസ് ടൂർണമെന്റിൽ അവസാനമായി കളിച്ചു.
ഡൽഹി ആൻഡ് ഡിസ്ട്രിക്റ്റ് ക്രിക്കറ്റ് അസോസിയേഷൻ (ഡിഡിസിഎ) സെക്രട്ടറി കൂടിയായ അശോക് ശർമ്മ, ഡൽഹിക്ക് വേണ്ടി ആഭ്യന്തര ക്രിക്കറ്റ് ടൂർണമെന്റുകളിൽ കളിക്കാൻ കോഹ്‌ലിയോട് അടുത്തിടെ ആവശ്യപ്പെട്ടു.2020 മുതൽ ഏറ്റവും ദൈർഘ്യമേറിയ ഫോർമാറ്റിൽ കോഹ്‌ലിയുടെ പ്രകടനം നിരന്തരം കുറഞ്ഞുവരികയാണ്. 39 മത്സരങ്ങളിൽ നിന്ന് (69 ഇന്നിംഗ്‌സുകൾ) 30.72 ശരാശരിയിൽ 2028 റൺസ് മാത്രമാണ് അദ്ദേഹം നേടിയത്, മൂന്ന് സെഞ്ച്വറികളും ഒമ്പത് അർദ്ധസെഞ്ച്വറികളും ഉൾപ്പെടെ. ദീർഘകാലത്തെ മോശം പ്രകടനം കാരണം, ടെസ്റ്റ് ശരാശരി 2019 ൽ 54.97 ആയിരുന്നത് നിലവിൽ 46.85 ആയി കുറഞ്ഞു.