വാഷിംഗ്ടൺ സുന്ദറിന് ഏഴു വിക്കറ്റ് , ന്യൂസിലൻഡിന്റെ ആദ്യ ഇന്നിംഗ്സ് 259 ൽ അവസാനിച്ചു | WASHINGTON SUNDAR
പുണെ ടെസ്റ്റിൽ ആദ്യം ബാറ്റ് ചെയ്ത ന്യൂസീലൻഡ് 259 റൺസിന്‌ പുറത്ത്. 7 വിക്കറ്റ് നേടിയ വാഷിംഗ്ടൺ സുന്ദറിന്റെ മിന്നുന്ന ബൗളിങ്ങിന് മുന്നിൽ കിവീസ് ബാറ്റർമാർ കീഴടങ്ങുകകയിരുന്നു. ഇന്ത്യക്കായി അശ്വിൻ മൂന്നു വിക്കറ്റ് നേടി. ന്യൂസീലൻഡിനായി കോൺവെ 76 റൺസും രചിൻ രവീന്ദ്ര 65 റൺസ് നേടി.
മത്സരത്തിൽ ടോസ് നേടിയ ന്യൂസീലൻഡ് നായകൻ ടോം ലാതം ബാറ്റിംഗ് തെരഞ്ഞെടുക്കുകയായിരുന്നു. സ്പിൻ സൗഹൃദ പിച്ചിൽ കിവീസ് ബാറ്റർമാർക്ക് മികച്ച തുടക്കമാണ് ലഭിച്ചത്.എന്നാൽ സ്കോർ 30 ൽ ആയപ്പോൾ ആദ്യ ബൗളിംഗ് ചേഞ്ച് ആയി എത്തിയ അശ്വിൻ ടോം ലാതത്തെ പുറത്താക്കി. 15 റൺ നേടിയ കിവീസ് നായകനെ അശ്വിൻ വിക്കറ്റിന് മുന്നിൽ കുടുക്കി. രണ്ടാം വിക്കറ്റിൽ ഒത്തുചെർന്ന യങ് – കോൺവേ സഖ്യം അനായാസം റൺ സ്കോർ ചെയ്തു.
സ്കോർ 76 ലെത്തിയപ്പോൾ അശ്വിൻ ഈ കൂട്ടുകെട്ട് പൊളിച്ചു. 18 റൺസ് നേടിയ യങ്ങിനെ പന്ത് പിടിച്ചു പുറത്താക്കി. ലഞ്ചിന്‌ പിന്നാലെ കോൺവെ അർധസെഞ്ചുറി പൂർത്തിയാക്കുകയും കിവീസ് സ്കോർ 100 കടക്കുകയും ചെയ്തു. സ്കോർ 138 ലെത്തിയപ്പോൾ കിവീസിന് മൂന്നാം വിക്കറ്റും നഷ്ടമായി. 141 പന്തിൽ നിന്നും 76 റൺസ് നേടിയ ഓപ്പണർ കോൺവെയെ അശ്വിൻ പുറത്താക്കി ഇന്ത്യയെ കളിയിലേക്ക് തിരികെകൊണ്ടുവന്നു.ടെസ്റ്റിലെ അശ്വിന്റെ 531 ആം വിക്കറ്റായിരുന്നു ഇത്. സ്കോർ 197 ആയപ്പോൾ അർദ്ധ സെഞ്ച്വറി നേടിയ രചിൻ രവീന്ദ്രയെ കിവീസിന് നഷ്ടമായി.
65 റൺസ് നേടിയ താരത്തെ വാഷിംഗ്ടൺ സുന്ദർ ക്ലീൻ ബൗൾഡ് ചെയ്തു. സ്കോർ 201 ൽ നിൽക്കെ ന്യൂസിലാൻഡിനു നാലാം വിക്കറ്റ് നഷ്ടമായി. 3 റൺസ് നേടിയ ടോം ബ്ലാണ്ടലിനെയും വാഷിങ്ടൺ ക്ലീൻ ബൗൾഡ് ചെയ്തു. ചായയ്ക്ക് ശേഷം മൂന്നു റൺസ് കൂടി കൂട്ടിച്ചേർക്കുന്നതിനിടയിൽ കിവീസിന് ആറാം വിക്കറ്റും നഷ്ടമായി. 18 റൺസ് നേടിയ ഡാരിൽ മിച്ചലിനെ വാഷിംഗ്ടൺ വിക്കറ്റിന് മുന്നിൽ കുടുക്കി. സ്കോർ 236 ൽ നിൽക്കെ 9 റൺസ് നേടിയ ഗ്ലെൻ ഫിലിപ്സിനെ വാഷിംഗ്ടൺ സുന്ദർ പുറത്താക്കി.
പിന്നാലെ ഠിം സൗത്തീയെ ക്‌ളീൻ ബൗൾഡ് ചെയ്ത് വാഷിംഗ്ടൺ സുന്ദർ അഞ്ചാം വിക്കറ്റ് നേട്ടം സ്വന്തമാക്കി. 4 റൺസ് നേടിയ അജാസ് പട്ടേലിനെ പുറത്താക്കി വാഷിംഗ്ടൺ സുന്ദർ ആറാം വിക്കറ്റ് നേടി. 33 റൺസ് നേടിയ മൈക്കിൾ സാന്റ്നറെ പുറത്താക്കി വാഷിംഗ്ടൺ വിക്കറ്റ് നേട്ടം ഏഴാക്കി. കിവീസ് ഇന്നിംഗ്സ് 259 ൽ അവസാനിച്ചു.,
