‘ദുഷ്‌കരമായ സമയങ്ങളിൽ ഇന്ത്യ വിരാട് കോഹ്‌ലിയെ പിന്തുണച്ചു, പക്ഷേ പാകിസ്ഥാൻ ബാബറിനെ ടീമിൽ നിന്നും ഒഴിവാക്കുകയാണ് ‘: സയീദ് അജ്മൽ | Virat Kohli | Saeed Ajmal
2025 ലെ ഐസിസി ചാമ്പ്യൻസ് ട്രോഫിയിൽ പാകിസ്ഥാന്റെ മോശം പ്രകടനത്തിന് ശേഷം ബാബർ അസമിന്റെ വിമർശകരെ സയീദ് അജ്മൽ രൂക്ഷമായി വിമർശിച്ചു. ന്യൂസിലൻഡിനോടും ഇന്ത്യയോടും തോറ്റ മെൻ ഇൻ ഗ്രീൻ ഗ്രൂപ്പ് ഘട്ടത്തിൽ നിന്ന് പുറത്തായി. കിവീസിനെതിരെ 90 പന്തിൽ നിന്ന് 64 റൺസ് നേടിയ ബാബർ, ചിരവൈരികളായ ഇന്ത്യയ്‌ക്കെതിരെ വെറും 23 റൺസ് മാത്രമേ നേടിയുള്ളൂ.
പാകിസ്ഥാൻ ക്രിക്കറ്റിലെ അസ്ഥിരതയെയും സയീദ് അജ്മൽ വിമർശിച്ചു . അന്താരാഷ്ട്ര ക്രിക്കറ്റിലെ ബാബർ അസമിന്റെ മോശം പ്രകടനത്തെയും അദ്ദേഹം വിമർശിച്ചു. വിരാട് കോഹ്‌ലിയുടെ മാന്ദ്യകാലത്ത് ഇന്ത്യൻ സെലക്ടർമാരിൽ നിന്ന് ലഭിച്ച പിന്തുണയുടെ ഉദാഹരണം അജ്മൽ ഉദ്ധരിച്ചു, പാകിസ്ഥാൻ ക്രിക്കറ്റ് ബാബറിന്റെ കാര്യങ്ങൾ കൂടുതൽ വഷളാക്കുന്നുവെന്ന് ആരോപിച്ചു.ബാബർ അസമിനെ പിൻവലിച്ചാൽ പാകിസ്ഥാൻ ക്രിക്കറ്റ് അഭിവൃദ്ധി പ്രാപിക്കാൻ ബുദ്ധിമുട്ടായിരിക്കുമെന്ന് അജ്മൽ പ്രസ്താവിച്ചു.2023-ൽ ഇന്ത്യയിൽ നടന്ന ഏകദിന ലോകകപ്പിൽ ഒമ്പത് മത്സരങ്ങളിൽ നിന്ന് 320 റൺസ് നേടിയ ബാബർ, മോശം പ്രകടനമാണ് നടത്തിയത്.
2024-ലെ ടി20 ലോകകപ്പിൽ അദ്ദേഹത്തിന്റെ പോരാട്ടങ്ങൾ കൂടുതൽ രൂക്ഷമായി. ബാബറിന്റെ നേതൃത്വത്തിൽ പാകിസ്ഥാൻ ഗ്രൂപ്പ് ഘട്ടത്തിൽ തന്നെ പുറത്തായി. ഏകദിന ലോകകപ്പിലെ പരാജയത്തെത്തുടർന്ന് ക്യാപ്റ്റൻ സ്ഥാനം രാജിവച്ച ശേഷം, ടി20 ലോകകപ്പിന് തൊട്ടുമുമ്പ് ബാബർ വീണ്ടും ക്യാപ്റ്റനായി. എന്നിരുന്നാലും, യുഎസ്എയിലും വെസ്റ്റ് ഇൻഡീസിലും, നാല് മത്സരങ്ങളിൽ നിന്ന് 101 സ്ട്രൈക്ക് റേറ്റിൽ 122 റൺസ് മാത്രമാണ് അദ്ദേഹം നേടിയത്.ചാമ്പ്യൻസ് ട്രോഫിയിലും ബാബറിന്റെ ഉയർന്ന മത്സരങ്ങളിൽ പ്രകടനം കാഴ്ചവയ്ക്കുന്നതിൽ പരാജയം തുടർന്നു, രണ്ട് മത്സരങ്ങളിൽ നിന്ന് 87 റൺസ് മാത്രമേ അദ്ദേഹത്തിന് നേടാനായുള്ളൂ. 1996 ന് ശേഷം ആദ്യമായി ഒരു പ്രധാന ഐസിസി ടൂർണമെന്റിന് ആതിഥേയത്വം വഹിക്കുന്ന പാകിസ്ഥാൻ, ഒരു വിജയം പോലും നേടാതെ നേരത്തെ പുറത്തായി. ഇന്ത്യയോടും ന്യൂസിലൻഡിനോടും തോറ്റതിനെത്തുടർന്ന് അവർ ഗ്രൂപ്പ് ഘട്ടത്തിൽ തന്നെ പുറത്തായി.
“ഇന്ത്യ വിരാട് കോഹ്‌ലിയെ പിന്തുണച്ച രീതി നോക്കൂ. അദ്ദേഹത്തിന്റെ മോശം അവസ്ഥ വളരെക്കാലം തുടർന്നു, പക്ഷേ ആരും അദ്ദേഹത്തെ വിരമിക്കാൻ നിർബന്ധിച്ചില്ല.അതേസമയം, പാകിസ്ഥാൻ ക്രിക്കറ്റിലെ ഏറ്റവും വലിയ താരങ്ങളിൽ ഒരാളായ ബാബർ ഒരു മോശം അവസ്ഥയിലൂടയെന്നു കടന്നു പോവുന്നത്. എല്ലാവരും അദ്ദേഹത്തെ താഴെയിറക്കുന്ന തിരക്കിലാണ്,” അജ്മൽ സ്പോർട്സ്‌സ്റ്റാറിനോട് പറഞ്ഞു. ” നിങ്ങൾക്ക് ഒരു താരമേ ഉള്ളൂ നിങ്ങൾ അദ്ദേഹത്തെയും തരംതാഴ്ത്തിയാൽ, നിങ്ങളുടെ ക്രിക്കറ്റ് എങ്ങനെ നിലനിൽക്കും? ഇവയാണ് വലിയ പ്രശ്നങ്ങൾ. നമ്മുടെ മുൻ ക്രിക്കറ്റ് താരങ്ങൾ വായടയ്ക്കണം,” അദ്ദേഹം കൂട്ടിച്ചേർത്തു.
പാകിസ്ഥാൻ ചാമ്പ്യൻസ് ട്രോഫി പരാജയത്തെത്തുടർന്ന്, മുഹമ്മദ് റിസ്‌വാനോടൊപ്പം ന്യൂസിലൻഡ് പര്യടനത്തിനുള്ള ടി20 ടീമിൽ നിന്ന് ബാബർ അസമിനെയും പുറത്താക്കി. എന്നിരുന്നാലും, മാർച്ച് 16 ന് ആരംഭിക്കുന്ന ഏകദിന ടീമിൽ രണ്ട് ബാറ്റ്‌സ്മാന്മാരെയും ഉൾപ്പെടുത്തിയിട്ടുണ്ട്.മികച്ച പ്രകടനം കാഴ്ചവയ്ക്കുമ്പോൾ മാത്രമല്ല, മികച്ച കളിക്കാർക്ക് ബുദ്ധിമുട്ടുകൾ നേരിടുമ്പോൾ പിന്തുണ ആവശ്യമാണെന്ന് അജ്മൽ ഊന്നിപ്പറഞ്ഞു.
“ഒരു ക്രിക്കറ്റ് കളിക്കാരൻ എന്ന നിലയിൽ, മോശം അനുഭവങ്ങൾ ഒരു കളിക്കാരന്റെ കരിയറിന്റെ ഭാഗമാണെന്ന് നമ്മൾ മനസ്സിലാക്കണം. ജീവിതകാലം മുഴുവൻ ഒരേ രീതിയിൽ ക്രിക്കറ്റ് കളിക്കാൻ കഴിയില്ല. സച്ചിൻ ടെണ്ടുൽക്കർക്ക് പോലും എല്ലാ മത്സരങ്ങളിലും 100 റൺസ് നേടാൻ കഴിഞ്ഞില്ല – അദ്ദേഹം പൂജ്യത്തിന് പുറത്തായിട്ടുണ്ട്. അദ്ദേഹം ഒരു ലോകോത്തര കളിക്കാരനാണ്, പക്ഷേ അദ്ദേഹത്തിനും മോശ ഘട്ടങ്ങൾ അനുഭവപ്പെട്ടു” അജ്മൽ പറഞ്ഞു.പാകിസ്ഥാൻ സൂപ്പർ ലീഗ് ആരംഭിക്കുന്നതിന് മുമ്പ് മാർച്ച് 16 മുതൽ ഏപ്രിൽ 5 വരെ ന്യൂസിലൻഡിൽ അഞ്ച് ടി20 മത്സരങ്ങളും മൂന്ന് ഏകദിന മത്സരങ്ങളും പാകിസ്ഥാൻ കളിക്കും.
