തകർത്തടിച്ച് അഭിഷേക് ശർമ്മ , ആദ്യ ടി20യിൽ തകർപ്പൻ ജയവുമായി ഇന്ത്യ | India | England

ഇംഗ്ലണ്ടിനെതിരെയുള്ള ആദ്യ ടി20 യിൽ 7 വിക്കറ്റിന്റെ തകർപ്പൻ ജയം സ്വന്തമാക്കി ഇന്ത്യ. ഇംഗ്ലണ്ട് ഉയർത്തിയ 133 റൺസ് വിജയ ലക്ഷ്യം 3 വിക്കറ്റ് നഷ്ടത്തിൽ ഇന്ത്യ മറികടന്നു. ഇന്ത്യക്ക് വേണ്ടി ഓപ്പണർ അഭിഷേക് ശർമ 34 പന്തിൽ നിന്നും 79 റൺസ് നേടി പുറത്തായി. 5 ബൗണ്ടറിയും 8 സിക്‌സും അടങ്ങുന്നതായിരുന്നു അദ്ദേഹത്തിന്റെ ഇന്നിംഗ്സ്. സഞ്ജു സാംസൺ 20 പന്തിൽ നിന്നും 26 റൺസ് നേടി .

133 റൺസ് വിജയ ലക്ഷ്യവുമായി ഇറങ്ങിയ ഇന്ത്യക്ക് മികച്ച തുടക്കമാണ് സഞ്ജുവും അഭിഷേക് ശർമയും ചേർന്ന് നൽകിയത്. ഗുസ് അറ്റ്കിന്‍സൺ എറിഞ്ഞ രണ്ടാം ഓവറില്‍ ഒരു സിക്സും നാലു ഫോറും അടക്കം 22 റണ്‍സടിച്ച സഞ്ജു തുടക്കം ഗംഭീരമാക്കി. ജോഫ്ര ആര്‍ച്ചറെ സിക്സിനും ഫോറിനും പറത്തിയ അഭിഷേക് ശര്‍മയും സഞ്ജുവിനൊപ്പം ചേർന്നു.ജോഫ്ര ആര്‍ച്ചറുടെ ഓവറില്‍ പുള്‍ ഷോട്ടിന് ശ്രമിച്ച് ബൗണ്ടറിയില്‍ അറ്റ്കിന്‍സണ് ക്യാച്ച് നല്‍കി മടങ്ങുകയും ചെയ്തു.

20 പന്തില്‍ 26 റണ്‍സായിരുന്നു സഞ്ജുവിന്‍റെ സമ്പാദ്യം. രണ്ട് പന്തുകള്‍ക്ക് ശേഷം മൂന്നാമനായി ഇറങ്ങിയ സൂര്യകുമാര്‍ യാദവിനെകൂടി ആര്‍ച്ചര്‍ മടക്കി അയച്ചു. എന്നാൽ തകർത്തടിച്ച അഭിഷേക് 20 പന്തിൽ നിന്നും അർദ്ധ സെഞ്ച്വറി പൂർത്തിയാക്കി.10 ഓവറിൽ 100 റൺസ് തികക്കുകയും ചെയ്തു.തിലക് വർമയും അഭിഷേക് ശർമയും 50 റൺസ് കൂട്ടുകെട്ട് പടുത്തുയർത്തുകയും ചെയ്തു.അഭിഷേക് ശർമ 34 പന്തിൽ നിന്നും 79 റൺസ് നേടി പുറത്തായി. 5 ബൗണ്ടറിയും 8 സിക്‌സും അടങ്ങുന്നതായിരുന്നു അദ്ദേഹത്തിന്റെ ഇന്നിംഗ്സ്.

മത്സരത്തിൽ ടോസ് നേടിയ ഇന്ത്യ ബൗളിംഗ് തെരഞ്ഞെടുക്കുകയായിരുന്നു. ഇന്ത്യക്ക് മികച്ച തുടക്കമാണ് ഇടം കയ്യൻ പേസർ അർഷ്ദീപ് സിംഗ് നൽകിയത്.ഇംഗ്ലണ്ട് ഓപ്പണര്‍മാരായ ഫില്‍ സാള്‍ട്ടിനെയും(0), ബെന്‍ ഡക്കറ്റിനെയും(4) മടക്കിയ അര്‍ഷ്ദീപ് സിംഗാണ് ഇംഗ്ലണ്ടിനെ ഞെട്ടിച്ചത്.ആദ്യ ഓവറിലെ മൂന്നാം പന്തില്‍ തന്നെ ഓപ്പണര്‍ ഫില്‍ സാള്‍ട്ടിനെ വീഴ്ത്തിയ അര്‍ഷ്ദീന് ഇംഗ്ലണ്ടിനെ ഞെട്ടിച്ചു.

അര്‍ഷ്ദീപ് സിംഗിന്‍റെ പന്തില്‍ സാള്‍ട്ടിനെ വിക്കറ്റിന് പിന്നില്‍ സഞ്ജു കൈയിലൊതുക്കുകയായിരുന്നു. തന്‍റെ രണ്ടാം ഓവറില്‍ മറ്റൊരു ഓപ്പണറായ ബെന്‍ ഡക്കറ്റിനെ കൂടി പുറത്താക്കിയ അര്‍ഷ്ദീപ് സിംഗ് ഇംഗ്ലണ്ടിന് ഇരട്ടപ്രഹരമേല്‍പ്പിച്ചു. എന്നാൽ തകർത്തടിച്ച ജോസ് ബട്ട്ലർ ഇംഗ്ലണ്ടിനെ മത്സരത്തിലേക്ക് തിരികെ കൊണ്ടുവന്നു. ഏഴാം ഓവറിൽ ഇംഗ്ലണ്ട് സ്കോർ 50 കടന്നു. എന്നാൽ എട്ടാം ഓവറിൽ വരുൺ ചക്രവർത്തി ഇംഗ്ലണ്ടിന് ഇരട്ട പ്രഹരം ഏൽപ്പിച്ചു. 17 റൺസ് നേടിയ ഹാരി ബ്രൂക്കിനെയും പൂജ്യത്തിന് ലിയാം ലിവിങ്‌സ്റ്റണിനെയും വരുൺ ചക്രവർത്തി പുറത്താക്കി. 12 ആം ഓവറിൽ 34 പന്തിൽ നിന്നും ജോസ് ബട്ട്ലർ അർദ്ധ സെഞ്ച്വറി പൂർത്തിയാക്കി.

സ്കോർ 83 ആയപ്പോൾ ഇംഗ്ലണ്ടിന് അഞ്ചാം വിക്കറ്റ് നഷ്ടമായി. 7 റൺസ് നേടിയ ജേക്കബ് ബെഥേലിനെ ഹർദിക് പാണ്ട്യ പുറത്താക്കി. സ്കോർ 95 ലെത്തിയപ്പോൾ ആറാം വിക്കറ്റും ഇംഗ്ലണ്ടിന് നഷ്ടമായി. 2 റൺസ് നേടിയ ജാമി ഓവർട്ടണെ അക്‌സർ പട്ടേൽ പുറത്താക്കി. ഇംഗ്ലണ്ട് സ്കോർ 100 കടന്നതിനു പിന്നാലെ ഏഴാം വിക്കറ്റും നഷ്ടമായി. അടുത്ത ഓവറിൽ പൊരുതി നിന്ന ജോസ് ബട്ട്ലറെയും ഇംഗ്ലണ്ടിന് നഷ്ടമായി. 44 പന്തിൽ നിന്നും 8 ബൗണ്ടറിയും 2 സിക്‌സും അടക്കം 68 റൺസ് നേടിയ ബട്ട്ലറെ ചക്രവർത്തി പുറത്താക്കി. നിശ്ചിത 132 റൺസാണ് ഇംഗ്ലണ്ട് നേടിയത്.