‘ക്രിക്കറ്റില്‍ ഇതൊക്കെ സംഭവിക്കുന്ന കാര്യങ്ങളാണ്, എങ്കിലും ഇത്തരം സന്ദര്‍ഭങ്ങള്‍ ഉണ്ടാകുമ്പോള്‍ ഉറപ്പായും നിരാശ തോന്നും’ : റൺ ഔട്ടിനെക്കുറിച്ച് ക്യാപ്റ്റൻ രോഹിത് ശർമ്മ | Rohit Sharma

അഫ്ഗാനിസ്ഥാനെതിരായ ഒന്നാം ടി20 പോരാട്ടത്തില്‍ വിജയം സ്വന്തമാക്കി ഇന്ത്യ. ആറ് വിക്കറ്റിന്റെ വിജയമാണ് ഇന്ത്യ സ്വന്തമാക്കിയത്. അഫ്ഗാന്‍ ഉയര്‍ത്തിയ 159 റണ്‍സെന്ന ലക്ഷ്യം ഇന്ത്യ 17.3 ഓവറില്‍ ഇന്ത്യ സ്വന്തമാക്കി. അര്‍ധസെഞ്ച്വറിയുമായി തിളങ്ങിയ ശിവം ദുബെയാണ് (60) ഇന്ത്യന്‍ വിജയം എളുപ്പമാക്കിയത്. ബൗളിങ്ങില്‍ ഒരു വിക്കറ്റ് വീഴ്ത്തുകയും ചെയ്ത ശിവമാണ് മത്സരത്തിലെ താരവും.

തുടക്കത്തില്‍ തന്നെ രോഹിത് ശര്‍മയേയും ശുഭ്‌മാന്‍ ഗില്ലിനെയും നഷ്‌ടപ്പെട്ട ഇന്ത്യയ്‌ക്കായി നാലാം നമ്പറില്‍ ക്രീസിലെത്തിയ ശിവം ദുബൈ 40 പന്തില്‍ 60 റണ്‍സ് നേടി ഇന്ത്യന്‍ ജയത്തില്‍ നിര്‍ണായക പങ്ക് വഹിക്കുകയായിരുന്നു. അഞ്ച് ഫോറും രണ്ട് സിക്‌സറും അടങ്ങിയതായിരുന്നു ഇടംകയ്യന്‍ ബാറ്ററുടെ തകര്‍പ്പന്‍ ഇന്നിങ്സ്. എന്നാൽ 14 മാസത്തിനുള്ളിൽ തന്റെ ആദ്യ ടി20 ഐ കളിച്ച രോഹിത് ശർമ്മ, സഹ ഓപ്പണർ ശുഭ്മാൻ ഗില്ലുമായുള്ള ആശയ കുഴപ്പത്തിൽ റൺസൊന്നും നേടാതെ പുറത്തായത് വലിയ നിരാശ നൽകി.

ഇന്ത്യൻ ഇന്നിംഗ്‌സിന്റെ ആദ്യ ഓവറിലെ രണ്ടാം പന്തിലാണ് സംഭവം. രോഹിത് ശർമ്മ ഒരു റണ്ണിനായി വിളിച്ചെങ്കിലും ശുഭ്മാൻ ഗിൽ പന്ത് നോക്കിക്കൊണ്ടിരുന്നു. രോഹിത് ശർമ്മ അപ്പോഴേക്കും നോൺ സ്‌ട്രൈക്കിങ് എൻഡിലേക്ക് ഓടിയെത്തിയിരുന്നു. റണ്ണൗട്ടായതിനാൽ രോഹിതിന്റെ തിരിച്ചുവരവ് പ്രതീക്ഷിച്ചതുപോലെ നടന്നില്ല.രണ്ട് പന്തിൽ ഡക്കിന് പുറത്തായ രോഹിത്, മൈതാനത്ത് തന്റെ നിരാശ പ്രകടിപ്പിക്കുകയും തന്റെ ദേഷ്യം പുറത്തെടുക്കുകയും ചെയ്തു. തിരിച്ചടികൾക്കിടയിലും ഇന്ത്യക്ക് വിജയം ഉറപ്പിക്കാനായി.രോഹിതിന്റെ അഭിപ്രായത്തിൽ അത് ഏറ്റവും പ്രധാനപ്പെട്ട കാര്യമായിരുന്നു.

‘ക്രിക്കറ്റില്‍ ഇതൊക്കെ സംഭവിക്കുന്ന കാര്യങ്ങളാണ്. എങ്കിലും, ഇത്തരം സന്ദര്‍ഭങ്ങള്‍ ഉണ്ടാകുമ്പോള്‍ ഉറപ്പായും നിരാശ തോന്നും. ഗ്രൗണ്ടിലേക്ക് ഇറങ്ങുമ്പോഴെല്ലാം തന്നെ ടീമിനായി റണ്‍സ് കണ്ടെത്താനായിരിക്കും നിങ്ങള്‍ ആഗ്രഹിക്കുന്നത്.എല്ലാം നിങ്ങളുടെ വഴിക്ക് പോകില്ല. ഞങ്ങൾ കളി ജയിച്ചു, അതാണ് കൂടുതൽ പ്രധാനം. ഗില്‍ മത്സരത്തില്‍ ഉടനീളം ബാറ്റ് ചെയ്യണമെന്നായിരുന്നു ഞാന്‍ ആഗ്രഹിച്ചത്. എന്നാല്‍, മികച്ച ചെറിയ ഒരു ഇന്നിങ്സ് കളിച്ചാണ് അവന്‍ പുറത്തായത്’ മത്സരത്തിന് ശേഷം രോഹിത് പറഞ്ഞു.

“ധാരാളം പോസിറ്റീവുകൾ, ഈ ഗെയിമിൽ നിന്ന് ഞങ്ങൾക്ക് ലഭിച്ചു, പ്രത്യേകിച്ച് പന്തിൽ. ഏറ്റവും എളുപ്പമുള്ള അവസ്ഥയായിരുന്നില്ല. ഞങ്ങളുടെ ടീമിലെ സ്പിന്നർമാർ നന്നായി ബൗൾ ചെയ്തു,ഒപ്പം സീമർമാരും ആ ജോലി ചെയ്തു. അതിൽ സന്തോഷം.മികച്ച പ്രകടനം പുറത്തെടുത്ത് ഗെയിം കളിക്കുന്നുവെന്ന് ഉറപ്പാക്കാൻ ഞങ്ങൾ ആഗ്രഹിക്കുന്നു. , മൊത്തത്തിൽ ഇന്ന് ഞങ്ങൾക്ക് നല്ല ദിവസമായിരുന്നു ” നായകൻ കൂട്ടിച്ചേർത്തു.