ഏകദിനത്തിലെ നാലാമത്തെ അഞ്ച് വിക്കറ്റ് നേട്ടത്തോടെ ചരിത്രംകുറിച്ച് മുഹമ്മദ് ഷമി| Mohammed Shami

മുംബൈയിലെ വാങ്കഡെ സ്റ്റേഡിയത്തിൽ നടന്ന ലീഗ് ഘട്ട മത്സരത്തിൽ ശ്രീലങ്കയെ 302 റൺസിന് തകർത്ത് ഇന്ത്യ ഐസിസി ക്രിക്കറ്റ് ലോകകപ്പ് 2023 ന്റെ സെമിഫൈനലിലേക്ക് യോഗ്യത നേടുന്ന ആദ്യ ടീമായി.മെൻ ഇൻ ബ്ലൂ ടൂർണമെന്റിൽ തുടർച്ചയായ ഏഴാം വിജയം രേഖപ്പെടുത്തുകയും ദക്ഷിണാഫ്രിക്കയെ പിന്തള്ളി 14 പോയിന്റുമായി പോയിന്റ് പട്ടികയിൽ ഒന്നാമതെത്തി.

50 ഓവറിൽ എട്ട് വിക്കറ്റ് നഷ്ടത്തിൽ 357 റൺസെന്ന കൂറ്റൻ സ്‌കോർ ഇന്ത്യ നേടിയപ്പോൾ ശ്രീലങ്ക 55 റൺസിന് പുറത്തായി.അഞ്ചു വിക്കറ്റ് നേടിയ ഫാസ്റ്റ് ബൗളർ മുഹമ്മദ് ഷമിയാണ് ഇന്ത്യയുടെ വിജയശില്പി.ഷമി അഞ്ചോവറില്‍ 18 റണ്‍സ് മാത്രം വഴങ്ങി അഞ്ച് വിക്കറ്റുകള്‍ നേടി.ഇന്ത്യക്കായി ഏകദിനത്തിൽ ഏറ്റവും കൂടുതൽ അഞ്ച് വിക്കറ്റ് നേട്ടം എന്ന റെക്കോർഡ് മുഹമ്മദ് ഷമി സ്വന്തമാക്കുകയും ചെയ്തു.ഇതിഹാസ ജോഡികളായ ഹർഭജൻ സിംഗ്, ജവഗൽ ശ്രീനാഥ് എന്നിവരെ മറികടന്നു, ഇരുവരും തങ്ങളുടെ മികച്ച കരിയറിനിടെ മൂന്ന് അഞ്ച് വിക്കറ്റ് നേട്ടങ്ങൾ നേടിയിട്ടുണ്ട്.

ഇന്ത്യൻ ക്രിക്കറ്റിലെ രണ്ട് പ്രതിഭകളായ ഹർഭജൻ സിങ്ങും ജവഗൽ ശ്രീനാഥും അവരുടെ അസാധാരണമായ ബൗളിംഗ് പ്രകടനത്തിലൂടെ റെക്കോർഡ് വളരെക്കാലമായി കൈവശപ്പെടുത്തിയിരുന്നു. എന്നാൽ വാങ്കഡെയിലെ ഷമിയുടെ മികച്ച പ്രകടനം അഭിമാനകരമായ പട്ടികയുടെ നെറുകയിലേക്ക് ഉയർത്തി.ശ്രീലങ്കയ്‌ക്കെതിരായ അഞ്ച് വിക്കറ്റ് നേട്ടത്തിന് ശേഷം ഏകദിന ലോകകപ്പിൽ 45 വിക്കറ്റുമായി ഷമി സഹീർ ഖാനും ജവഗൽ ശ്രീനാഥിനും മുകളിലായി.ഇന്ത്യക്കായി ലോകകപ്പിൽ സഹീറും ശ്രീനാഥും 44 വിക്കറ്റുകൾ നേടിയിട്ടുണ്ട്.

ഏകദിന ലോകകപ്പ് ചരിത്രത്തിൽ ഏറ്റവും കൂടുതൽ വിക്കറ്റ് വീഴ്ത്തിയവരിൽ ആദ്യ പത്തിൽ ഷമിയും പ്രവേശിച്ചു, 71 വിക്കറ്റുമായി ഗ്ലെൻ മഗ്രാത്താണ് ഒന്നാമത്.സജീവമായ അന്താരാഷ്ട്ര ക്രിക്കറ്റ് താരങ്ങളിൽ, യഥാക്രമം 56, 49 വിക്കറ്റുകളുമായി മിച്ചൽ സ്റ്റാർക്കും ട്രെന്റ് ബോൾട്ടും മാത്രമാണ് പട്ടികയിൽ അദ്ദേഹത്തിന് മുകളിൽ.ഇംഗ്ലണ്ടിനെ നേരിട്ട അതേ ലൈനപ്പ് തന്നെ ടീം ഇന്ത്യക്ക് ഇന്നിംഗ്‌സിന്റെ രണ്ടാം പന്തിൽ ക്യാപ്റ്റൻ രോഹിത് ശർമ്മ പുറത്തായതോടെ തുടക്കത്തിൽ തിരിച്ചടി നേരിട്ടെങ്കിലും 357/8 എന്ന മികച്ച സ്‌കോർ നേടാനായി.

ഇന്നിംഗ്‌സിന്റെ ആദ്യ പന്തിൽ തന്നെ ശ്രീലങ്കൻ ഓപ്പണർ പാഥും നിസ്സാങ്കയെ പുറത്താക്കി ബുംറ ലങ്കയുടെ തകർച്ചക്ക് തുടക്കമിട്ടു.തന്റെ ആദ്യ പന്തിൽ തന്നെ കരുണരത്‌നെയെ പുറത്താക്കി മുഹമ്മദ് സിറാജിനും സ്വപ്നതുല്യമായ തുടക്കം ക്കുറിച്ചു.ബൗളിംഗ് ഷോയിലെ യഥാർത്ഥ താരം മുഹമ്മദ് ഷമിയായിരുന്നു. വിക്കറ്റ് വേട്ടയിൽ ചേർന്ന ഷമി തന്റെ മൂന്നാം പന്തിൽ അസലങ്കയുടെ വിലയേറിയ വിക്കറ്റ് സ്വന്തമാക്കി. ദുഷൻ ഹേമന്ത, ആഞ്ചലോ മാത്യൂസ്, ദുഷ്മന്ത ചമീര എന്നിവരെ തുടർച്ചയായി പുറത്താക്കിക്കൊണ്ട് അദ്ദേഹം ശ്രീലങ്കൻ ബാറ്റിംഗ് നിരയിൽ നാശം വിതച്ചു. കസുൻ രജിതയെ പുറത്താക്കിയ ഷമിയുടെ അസാധാരണമായ ബൗളിംഗ് അതിന്റെ പാരമ്യത്തിലെത്തി, തന്റെ അഞ്ചാം വിക്കറ്റ് ഉറപ്പിക്കുകയും ചെയ്തു.