“പുതിയ സീസണിനും പുതിയ റോളിനും…..” : പുതിയ സീസണില്‍ പുത്തന്‍ റോളിലെത്താൻ എംഎസ് ധോണി | MS Dhoni

ചെന്നൈ സൂപ്പർ കിംഗ്‌സ് ക്യാപ്റ്റൻ എംഎസ് ധോണിയുടെ ഏറ്റവും പുതിയ ഫേസ്ബുക്ക് പോസ്റ്റ് ആരാധകരെ ആശയക്കുഴപ്പത്തിലാക്കിയിരിക്കുകയാണ്. ഐപിഎൽ 2024-ന് ആഴ്‌ചകൾ മാത്രം ബാക്കിനിൽക്കെയാണ് ധോണി ഹ്രസ്വവും വ്യക്തവുമായ ഒരു സന്ദേശം നൽകിയത്.ഇന്ത്യൻ പ്രീമിയർ ലീഗിൻ്റെ പുതിയ സീസണിൻ്റെ ഉദ്ഘാടന മത്സരത്തിന് രണ്ടാഴ്ച മാത്രം ശേഷിക്കെ ഇന്ന് എംഎസ് ധോണി തൻ്റെ ഫേസ്ബുക്ക് പേജിൽ രസകരമായ ഒരു പോസ്റ്റ് ചെയ്തു.

‘പുതിയ സീസണിനും പുതിയ റോളിനും വേണ്ടി കാത്തിരിക്കാന്‍ വയ്യ.. കാത്തിരിക്കൂ’ എന്ന് ഫെയ്‌സ്ബുക്കിലാണ് 42-കാരന്‍ കുറിച്ചിരിക്കുന്നത്. ഇതോടെ ധോണിയുടെ പുതിയ റോള്‍ എന്താണെന്ന അന്വേഷണമാണ് പ്രസ്‌തുത പോസ്റ്റിന്‍റെ കമന്‍റില്‍ ആരാധകര്‍ നടത്തുന്നത്. ധോണി നായക സ്ഥാനം ഒഴിയുമോയെന്ന ആശങ്കയാണ് പലരും പങ്കുവയ്‌ക്കുന്നത്.പരാമർശിച്ചിരിക്കുന്ന പുതിയ സീസൺ ഐപിഎൽ 2024 പതിപ്പാണോ എന്ന് വ്യക്തമല്ല. എന്തായാലും ‘പുതിയ വേഷം’ ധോണി പ്രഖ്യാപിച്ചതോടെ നിമിഷങ്ങൾക്കകം പോസ്റ്റ് വൈറലായി.

ടൂർണമെൻ്റിൻ്റെ 2024 സീസണിൽ ഫ്രാഞ്ചൈസിയുടെ ക്യാപ്റ്റനായി തിരിച്ചെത്തുമോയെന്ന് മുൻ ഇന്ത്യൻ ക്യാപ്റ്റൻ സ്ഥിരീകരിച്ചിട്ടില്ല. ഐപിഎൽ 2023 ഫൈനലിന് ശേഷം ഐപിഎൽ ട്രോഫി നേടിയ ശേഷം ഉയർന്ന നിലയിൽ വിരമിക്കുമോ എന്ന ചോദ്യത്തിന്, വിരമിച്ചാൽ അത് എളുപ്പമാകുമെന്ന് ധോണി പറഞ്ഞിരുന്നു. തൻ്റെ ശരീരം അനുവദിക്കുകയാണെങ്കിൽ സിഎസ്‌കെ ക്യാപ്റ്റനായി അടുത്ത സീസണിൽ തിരിച്ചെത്താൻ ശ്രമിക്കുമെന്നും ധോണി കൂട്ടിച്ചേർത്തു.

മാർച്ച് 22 ന് ആരംഭിക്കുന്ന ഐപിഎല്ലിൽ തൻ്റെ ഫ്രാഞ്ചൈസിക്കായി സ്ഥിരതയാർന്ന പ്രകടനം നടത്തി ദേശീയ തിരിച്ചുവരവ് പ്രതീക്ഷിക്കുന്ന പേസർ ദീപക് ചാഹറിൻ്റെ സാന്നിധ്യത്തിൽ മാർച്ച് 2 ശനിയാഴ്ച ചെന്നൈ സൂപ്പർ കിംഗ്സ് അവരുടെ പ്രീ-സീസൺ ക്യാമ്പ് ആരംഭിച്ചു.അനുയോജ്യമായ പകരക്കാരനെ കണ്ടെത്തുന്നതുവരെ ഫ്രാഞ്ചൈസിയുടെ ക്യാപ്റ്റനായി എംഎസ് ധോണി ഒരു സീസൺ കൂടി കളിക്കാൻ സാധ്യത കാണുന്നുണ്ട്.