എംഎസ് ധോണിയുടെ ഫിറ്റ്നസിനെ റോജർ ഫെഡററുമായി താരതമ്യം ചെയ്ത് മുൻ ഇന്ത്യൻ താരം റോബിൻ ഉത്തപ്പ | IPL2024

റോയൽ ചലഞ്ചേഴ്‌സ് ബെംഗളൂരുവിനെതിരായ ചെന്നൈ സൂപ്പർ കിംഗ്‌സിൻ്റെ ഐപിഎൽ 2024 ഉദ്ഘാടന മത്സരത്തിൽ വെറ്ററൻ താരം എംഎസ് ധോണി വിക്കറ്റിന് പുറകിൽ മികച്ച പ്രകടനമാണ് പുറത്തെടുത്തത്. മത്സരത്തിന് ശേഷം മുൻ ഇന്ത്യൻ ബാറ്റർ റോബിൻ ഉത്തപ്പ ധോണിയുടെ ഫിറ്റ്‌നസ് നിലവാരത്തെ പ്രശംസിച്ചു. ധോണിയുടെ ഗ്രൗണ്ടിലെ ഫിറ്റ്‌നസും മൊബിലിറ്റിയും ടെന്നീസ് ഇതിഹാസം റോജർ ഫെഡററുമായി ഉത്തപ്പ താരതമ്യപ്പെടുത്തി.

എക്കാലത്തെയും മികച്ച ടെന്നീസ് കളിക്കാരിലൊരാളായ ഫെഡറർ 41-ാം വയസ്സിൽ കായികരംഗത്ത് നിന്ന് വിരമിച്ചു, 20 ഗ്രാൻഡ്സ്ലാമുകളുമായി തൻ്റെ കരിയർ അവസാനിപ്പിച്ചു.മറ്റ് മുൻ ഇന്ത്യൻ ക്രിക്കറ്റ് താരങ്ങളിൽ നിന്ന് വ്യത്യസ്തമായി, വിരമിച്ചവർക്ക് വേണ്ടിയുള്ള ഫ്രാഞ്ചൈസി ലീഗുകളിൽ ധോണി കളിക്കാറില്ല, ആഭ്യന്തര ക്രിക്കറ്റിൽ തൻ്റെ സംസ്ഥാന ടീമായ ജാർഖണ്ഡിന് വേണ്ടി പോലും അദ്ദേഹം കളിക്കാറില്ല.

തൻ്റെ മുൻ ക്യാപ്റ്റൻ പുതിയ ഐപിഎൽ കാമ്പെയ്‌നിനായി തയ്യാറെടുക്കുന്നതിന് വ്യക്തമായ ഓഫ് സീസൺ വർക്കുകൾ നടത്തിയിട്ടുണ്ടെന്ന് ഉത്തപ്പ ചൂണ്ടിക്കാട്ടി.ഐപിഎൽ ഓപ്പണറിൽ സ്റ്റാർ വിക്കറ്റ് കീപ്പർ വേഗത കുറയുന്നതിൻ്റെ ലക്ഷണങ്ങളൊന്നും കാണിച്ചില്ല. അടുത്തിടെ ക്യാപ്റ്റൻ സ്ഥാനം ഒഴിഞ്ഞ ധോണി ഒരു റണ്ണൗട്ടും രണ്ട് ക്യാച്ചുകളും സ്വന്തമാക്കി. ഫാഫ് ഡു പ്ലെസിസിൻ്റെ ബാറ്റിൽ നിന്ന് അകത്തെ എഡ്ജ് തടയാൻ വലത്തേക്ക് അതിവേഗം ഡൈവ് ചെയ്യുന്നത് ഉൾപ്പെടെ വിക്കറ്റുകൾക്ക് പിന്നിൽ ബൗണ്ടറികൾ തടഞ്ഞുകൊണ്ട് ധോണി തൻ്റെ പെട്ടെന്നുള്ള റിഫ്ലെക്സുകൾ പ്രദർശിപ്പിച്ചു.

ആർസിബിയുടെ ഇന്നിംഗ്‌സിൻ്റെ അവസാന പന്തിൽ അണ്ടർ ആം ത്രോയിലൂടെ അനൂജ് റാവത്തിനെ ധോണി റണ്ണൗട്ടാക്കി. തന്റെ പ്രതാപകാലത്തെ അനുസ്മരിപ്പിക്കുന്ന പ്രകടനമാണ് ധോണി മത്സരത്തിൽ വിക്കറ്റിന് പിന്നിൽ പുറത്തെടുത്തത്.ത്രോ സ്റ്റമ്പിൽ തട്ടിയപ്പോൾ എം.എ ചിദംബരം സ്റ്റേഡിയം എം.എസ്.ധോനിക്ക് വേണ്ടി ആർപ്പുവിളിച്ചു.