ഇന്ത്യയുടെ ലോകകപ്പ് ടീമിൽ നിന്നും ആ ഒഴിവാക്കിയത് തെറ്റായിപ്പോയെന്ന് യുവരാജ് സിംഗ്|Yuvraj Singh|World Cup 2023

ഐസിസി ക്രിക്കറ്റ് ലോകകപ്പ് 2023 ടീമിൽ നിന്ന് സ്പിന്നർ യുസ്വേന്ദ്ര ചാഹലിനെ ഒഴിവാക്കിയത് തെറ്റായിപ്പോയെന്ന് ഇന്ത്യൻ ഇതിഹാസ ഓൾറൗണ്ടർ യുവരാജ് സിംഗ്. ഒക്ടോബർ 5 ന് ആരംഭിക്കുന്ന ലോകകപ്പിനുള്ള ഇന്ത്യയുടെ 15 അംഗ ടീമിൽ ചാഹലിനെ ഉൾപ്പെടുത്തിയിട്ടില്ല.

ഇന്ത്യൻ സ്ക്വാഡിൽ ഗുണനിലവാരമുള്ള കളിക്കാരുണ്ട്, എന്നാൽ റിസ്റ്റ് സ്പിന്നർ യുസ്‌വേന്ദ്ര ചാഹലോ വാഷിംഗ്ടൺ സുന്ദറോ ആതിഥേയ ടീമിന്റെ നിരയിൽ ഇടം നേടണമായിരുന്നുവെന്നും 2011 ലോകകപ്പ് ഹീറോ യുവരാജ് സിംഗ് പറഞ്ഞു. ഓൾറൗണ്ടർ അക്‌സർ പട്ടേലിനെ പരിക്കേറ്റതിനെത്തുടർന്ന് പകരം സീനിയർ ഓഫ് സ്പിന്നർ രവിചന്ദ്രൻ അശ്വിനെ തെരഞ്ഞെടുത്തിരുന്നു.വേഗത കുറഞ്ഞ വിക്കറ്റുകളിൽ ചാഹൽ അപകടകാരിയാകുമായിരുന്നുവെന്നും ടീമിൽ അദ്ദേഹത്തെ ഉൾപ്പെടുത്താത്തത് ഇന്ത്യയുടെ ഭാഗത്തുനിന്നുള്ള പിഴവായിരിക്കാമെന്നും യുവരാജ് വീക്കിനോട് പറഞ്ഞു.

ഇന്ത്യക്കായി 72 ഏകദിനങ്ങളിൽ നിന്ന് 141 വിക്കറ്റുകളാണ് ചാഹൽ വീഴ്ത്തിയത്.“ യുസ്‌വേന്ദ്ര ചാഹലിനെ ഒഴിവാക്കുന്നത് ഒരു തെറ്റായിരിക്കാം, ഇത് ആശങ്കയുണ്ടാക്കുന്നതാണ്. കുറഞ്ഞപക്ഷം അദ്ദേഹത്തെ ടീമിലെങ്കിലും നിലനിർത്താമായിരുന്നു. ഒരു ലെഗ് സ്പിന്നർ നിങ്ങൾക്ക് വേണ്ടി എപ്പോഴും വിക്കറ്റ് വീഴ്ത്തുന്ന ഒരാളാണ്. കുൽദീപ് തകർപ്പൻ പ്രകടനമാണ് നടത്തുന്നത്. പക്ഷേ, ടേണിങ് ട്രാക്കുകളിലും വിക്കറ്റ് മെല്ലെ വീഴുമ്പോഴും ചാഹൽ അപകടകാരിയാകുമായിരുന്നു. ഹാർദിക് നിങ്ങൾക്ക് ഒരു മൂന്നാം സീമറുടെ ബാലൻസ് നൽകിയാൽ നിങ്ങൾക്ക് യുസ്വേന്ദ്ര ചാഹലിനെ തിരഞ്ഞെടുക്കാമായിരുന്നു, ”യുവരാജ് പറഞ്ഞു.

“ഈ ടീമിലെ ഏക മിസ്സ് യുസ്‌വേന്ദ്ര ചാഹൽ ആണെന്ന് എനിക്ക് വ്യക്തിപരമായി തോന്നുന്നു. ഈ ടീമിൽ നിന്ന് നഷ്ടമായ ഒരേയൊരു വശം ഒരു ലെഗ് സ്പിന്നർ മാത്രമാണെന്ന് ഞാൻ കരുതുന്നു. ചാഹലിനെ എടുക്കുന്നില്ലെങ്കിൽ വാഷിംഗ്ടൺ സുന്ദറിനെ ടീമിൽ കാണാൻ ഞാൻ വളരെ ആഗ്രഹിച്ചിരുന്നു. പക്ഷേ ടീമിന് പരിചയസമ്പന്നനായ ഒരു ബൗളറെ വേണമായിരുന്നു, അതിനാലാണ് അവർ ആർ അശ്വിനൊപ്പം പോയതെന്ന് ഞാൻ കരുതുന്നു” യുവരാജ് പറഞ്ഞു.

ഓസ്‌ട്രേലിയയ്‌ക്കെതിരായ മൂന്ന് മത്സരങ്ങളുടെ ഏകദിന പരമ്പരയിൽ 2-1 ന് വിജയിച്ചതിന് പിന്നാലെ, ഗുവാഹത്തിയിലെ ബർസാപര സ്റ്റേഡിയത്തിൽ ലോകകപ്പ് സന്നാഹ മത്സരത്തിൽ ഇന്ത്യ ഇംഗ്ലണ്ടിനെ നേരിടാൻ ഒരുങ്ങുന്നു. ഒക്‌ടോബർ 8 ന് ചെന്നൈയിലെ ചെപ്പോക്ക് സ്റ്റേഡിയത്തിൽ 2023 ലോകകപ്പ് ഉദ്ഘാടന മത്സരത്തിൽ ഓസ്‌ട്രേലിയയെ നേരിടുന്നതിന് മുമ്പ് മെൻ ഇൻ ബ്ലൂ അവരുടെ അവസാന സന്നാഹ മത്സരത്തിൽ നെതർലാൻഡിനെ നേരിടും.