‘സഞ്ജു സാംസണും ഋഷഭ് പന്തും ഇന്ത്യയുടെ ടി20 ലോകകപ്പ് ടീമിൽ ഉണ്ടാവണം’ : ബ്രയാൻ ലാറ |Sanju Samson
ഇത് ഋഷഭ് പന്തും സഞ്ജു സാംസണും തമ്മിലുള്ള പോരാട്ടമല്ലെന്നും രണ്ട് വിക്കറ്റ് കീപ്പർ-ബാറ്റർമാർക്കും ഇന്ത്യയുടെ ടി20 ലോകകപ്പ് 2024 ടീമിൻ്റെ ഭാഗമാകാമെന്നും ഇതിഹാസ താരം ബ്രയാൻ ലാറയും മുൻ ഇന്ത്യൻ ബാറ്റർ അമ്പാട്ടി റായിഡുവും പറഞ്ഞു. ടി20 ലോകകപ്പിനുള്ള ടീമിനെ ഏപ്രിൽ അവസാനത്തോടെ തിരഞ്ഞെടുക്കുമെന്ന് പ്രതീക്ഷിക്കുന്നതിനാൽ മുതിർന്ന ദേശീയ സെലക്ടർമാർ ഐപിഎൽ 2024-ൽ സൂക്ഷ്മമായി നിരീക്ഷിക്കുന്നു.ഓരോ സ്ഥാനത്തിനും ഇന്ത്യക്ക് ധാരാളം പ്രശ്‌നങ്ങളുണ്ടെങ്കിലും, വിക്കറ്റ് കീപ്പർ സ്ലോട്ടിനായുള്ള മത്സരവും ശക്തമാവുകയാണ്.
ഇരുബാറ്റർമാരും ഈ ഐപിഎല്ലിൽ പുറത്തെടുത്ത മികച്ച പ്രകടനങ്ങളുടെ അടിസ്ഥാനത്തിലാണ് ലാറയും റായിഡുവും തങ്ങളുടെ അഭിപ്രായം പ്രകടിപ്പിച്ചത്. സഞ്ജു സാംസൺ ഏതു പൊസിഷനും വഴങ്ങുന്ന താരമാണ് എന്ന് റായിഡു പറഞ്ഞു. “എന്റെ അഭിപ്രായത്തിൽ സഞ്ജു സാംസനും റിഷഭ് പന്തും തീർച്ചയായും ട്വന്റി20 ലോകകപ്പിനുള്ള ടീമിൽ ഇടം കണ്ടെത്തണം .കാരണം മധ്യനിരയിൽ കളിക്കാൻ സാധിക്കുന്ന ബാറ്റർമാരാണ് ഇരുവരും. പ്രത്യേകിച്ച് സഞ്ജു സാംസണ് ഇന്നിംഗ്സ് ഓപ്പൺ ചെയ്യാനും സാധിക്കും. ഏതു പൊസിഷനും വഴങ്ങുന്ന താരമാണ് സഞ്ജു. ഇതുവരെ മികച്ച പ്രകടനങ്ങൾ പുറത്തെടുക്കാൻ ഇരു ബാറ്റർമാർക്കും സാധിച്ചു.”- റായിഡു പറയുന്നു.
അമ്പാട്ടി റായിഡുവിൻ്റെ തീരുമാനത്തെ ബ്രയാൻ ലാറ പിന്തുണച്ചു, പന്തും സാംസണും ഇപ്പോൾ ടി20 ലോകകപ്പ് ടീമിലെ സ്ഥാനങ്ങളിൽ തീർച്ചയായും മുന്നിലാണ്.”രണ്ടു കളിക്കാരും പോകണമെന്ന് ഞാൻ കരുതുന്നു. ഇരുവരും ബാറ്റിംഗിൻ്റെ കാര്യത്തിൽ ഇതുവരെ ഏറ്റവും മികച്ച പ്രകടനമാണ് കാഴ്ചവെച്ചത്. സഞ്ജു സാംസൺ ഒരു മികച്ച കളിക്കാരനാണ്, പന്തിൻ്റെ മികച്ച ടൈമർ ആണ്. വർഷങ്ങളായി ഋഷഭ് പന്ത് ഇന്ത്യക്ക് വേണ്ടി വളരെ മികച്ച പ്രകടനമാണ് നടത്തുന്നത്.വലിയൊരു അപകടത്തിൽ നിന്ന് തിരിച്ചു വന്നപ്പോഴും വളരെ മികച്ച ഫോം പുറത്തെടുക്കാൻ പന്തിന് സാധിച്ചു. നിലവിൽ വിക്കറ്റ് കീപ്പർ എന്ന തസ്തികയിലേക്കുള്ള പേരുകളിൽ ആദ്യ രണ്ടു പേർ അവരാണ് എന്ന് ഞാൻ കരുതുന്നു.”- ലാറ പറഞ്ഞു.
വിശാഖപട്ടണത്തിൽ സിഎസ്‌കെയ്‌ക്കെതിരെ 32 പന്തിൽ 51 റൺസെടുത്ത പന്ത് ടീമിനെ 20 റൺസിന് വിജയത്തിലെത്തിച്ചു. വിശാഖത്തിൽ നൈറ്റ് റൈഡേഴ്‌സിനെതിരെ 25 പന്തിൽ 55 റൺസ് നേടിയ അദ്ദേഹം മറ്റൊരു അർധസെഞ്ചുറി നേടിയെങ്കിലും ടീമിനെ വിജയിപ്പിക്കാൻ സാധിച്ചില്ല.ഐപിഎൽ 2024 ലെ ഓറഞ്ച് ക്യാപ് റേസിൽ സാംസൺ അഞ്ചാം സ്ഥാനത്താണ്. RR-ന് വേണ്ടി ഇതുവരെ 4 മത്സരങ്ങളിൽ നിന്ന് 178 റൺസ് നേടിയിട്ടുണ്ട്.
