ഐപിഎൽ ചരിത്രത്തിൽ ഈ റെക്കോർഡ് സ്വന്തമാക്കുന്ന ആദ്യ താരമായി വിരാട് കോഹ്ലി | Virat Kohli
ഐപിഎൽ ചരിത്രത്തിൽ 10 വ്യത്യസ്ത വർഷങ്ങളായി ഒരു സീസണിൽ 400 റൺസ് തികയ്ക്കുന്ന ആദ്യ കളിക്കാരനായി മാറിയിരിക്കുകയാണ് റോയൽ ചലഞ്ചേഴ്‌സ് ബെംഗളൂരു സൂപ്പർ താരം വിരാട് കോഹ്ലി. സൺറൈസേഴ്സ് ഹൈദരാബാദിനെതിരായ മത്സരത്തിലാണ് അദ്ദേഹം അവിശ്വസനീയമായ നേട്ടം കൈവരിച്ചത്.
വിരാട് ഇപ്പോൾ സുരേഷ് റെയ്‌നയെയും ഓസ്‌ട്രേലിയയുടെ ബാറ്റിംഗ് താരം ഡേവിഡ് വാർണറെയും മറികടന്നു, ഇരുവർക്കും ഐപിഎൽ കരിയറിൽ ഒമ്പത് തവണ ഒരു സീസണിൽ 400 അല്ലെങ്കിൽ അതിൽ കൂടുതൽ റൺസ് നേടാൻ കഴിഞ്ഞു.നിലവിലെ ഐപിഎൽ 2024 സീസണിന് പുറമേ, 2023, 2021, 2020, 2019, 2018, 2016, 2015, 2013, 2011 വർഷങ്ങളിലാണ് വിരാട് ഈ നാഴികക്കല്ല് നേടിയത്.2016 സീസണിൽ, നാല് സെഞ്ചുറികളും ഏഴ് അർധസെഞ്ചുറികളും ഉൾപ്പെടെ 81.08 ശരാശരിയിൽ വിരാട് 973 റൺസ് നേടി – ഈ റെക്കോർഡ് സമാനതകളില്ലാത്തതായി തുടരുന്നു.
246 മത്സരങ്ങൾ നീണ്ട തൻ്റെ ഐപിഎൽ കരിയറിൽ 38.27 ശരാശരിയിൽ 7,693 റൺസും എട്ട് സെഞ്ചുറികളും 53 അർധസെഞ്ചുറികളും വിരാട് നേടിയിട്ടുണ്ട്.കരിയറിലെ 8,000 റൺസ് പിന്നിടുന്ന ഐപിഎൽ ചരിത്രത്തിലെ ആദ്യ ബാറ്ററായി മാറാൻ ഇന്ത്യയുടെയും ആർസിബിയുടെയും മുൻ ക്യാപ്റ്റന് 307 റൺസ് കൂടി വേണം.
ഹൈദരാബാദിലെ ഹൈസ്കോറിങ് പിച്ചിൽ വളരെ മോശം ബാറ്റിംഗ് പ്രകടനമാണ് കോഹ്ലി പുറത്തെടുത്തത്. 43 പന്തുകൾ നേരിട്ട കോഹ്ലി കേവലം 51 റൺസ് മാത്രമാണ് മത്സരത്തിൽ നേടിയത്.നിലവിൽ ഈ സീസണിൽ റൺ സ്‌കോറർമാരുടെ പട്ടികയിൽ ഒന്നാം സ്ഥാനത്താണ് കോലി. ഓപ്പണറായി കോഹ്ലി 4,000 റൺസ് പിന്നിടുകയും ചെയ്തു.
