രണ്ടാം ടെസ്റ്റിൽ കെഎൽ രാഹുലിന് പകരക്കാരനായി സർഫറാസ് ഖാന് കളിക്കാൻ കഴിയുമെന്ന് ആകാശ് ചോപ്ര | Sarfaraz Khan

‘നിങ്ങളുടെ സ്വപ്നങ്ങളെ പിന്തുടരൂ, അവ യാഥാർത്ഥ്യമാകും’- 2013-ൽ അന്താരാഷ്ട്ര ക്രിക്കറ്റിനോട് വിടപറയുമ്പോൾ വാങ്കഡെ സ്റ്റേഡിയത്തിൽ വെച്ച് മാസ്റ്റർ ബ്ലാസ്റ്റർ സച്ചിൻ ടെണ്ടുൽക്കർ പറഞ്ഞ വാക്കുകളാണിത്. ആ പ്രസ്താവന ഇന്ത്യൻ ടീമിലേക്ക് തെരഞ്ഞെടുക്കപെടാൻ ആഭ്യന്തര ക്രിക്കറ്റിൽ കഠിനാധ്വാനം ചെയ്ത മുംബൈ സർഫറാസ് ഖാനുമായി യോജിച്ചു പോവുന്ന ഒന്നാണ്.

ഇംഗ്ലണ്ടിനെതിരായ രണ്ടാം ടെസ്റ്റിനുള്ള ടീമിൽ സർഫറാസ്, ഇടങ്കയ്യൻ സ്പിന്നർ സൗരഭ് കുമാർ, ഓൾറൗണ്ടർ വാഷിംഗ്ടൺ സുന്ദർ എന്നിവരെ ബിസിസിഐ സെലക്ഷൻ കമ്മിറ്റി തിങ്കളാഴ്ച ഉൾപ്പെടുത്തി.ആഭ്യന്തര ക്രിക്കട്ടിൽ സ്ഥിരതയാർന്ന പ്രകടനം നടത്തി വന്ന സർഫറാസ് ഖാന്റെ നീണ്ട നാളത്തെ കാത്തിരിപ്പ് യാഥാർഥ്യമായിരിക്കുകയാണ്. ഇംഗ്ലണ്ട് ലയൺസിനെതിരെ ഇന്ത്യ എക്ക് വേണ്ടിയും 26 കാരൻ മികച്ച പ്രകടനം നടത്തിയിരുന്നു.ഇന്ത്യൻ ഓൾറൗണ്ടർ രവീന്ദ്ര ജഡേജയും ബാറ്റ്‌സ്മാൻ കെഎൽ രാഹുലും പരിക്ക് മൂലം പുറത്തായതിനെ തുടർന്നാണ് സർഫറാസിനെ ടീമിൽ ഉൾപ്പെടുത്തിയത്.

ജഡേജയ്ക്ക് ഹാംസ്ട്രിംഗിന് പരിക്കേറ്റു, അതേസമയം രാഹുലിന്റെ വലത് ക്വാഡ്രൈസെപ്‌സിൽ പരിക്ക് പറ്റി.ഇംഗ്ലണ്ട് ലയൺസിനെതിരെ ഇന്ത്യ എയ്ക്ക് വേണ്ടിയുള്ള പര്യടന മത്സരത്തിൽ സർഫറാസ് മികച്ച സെഞ്ച്വറി നേടി. 160 പന്തിൽ 18 ബൗണ്ടറികളും അഞ്ച് സിക്‌സറുകളും സഹിതം 161 റൺസാണ് നേടിയത്. അഹമ്മദാബാദിൽ ഇന്ത്യ എ ഇംഗ്ലണ്ട് ലയൺസിനെ ഇന്നിംഗ്‌സിനും 16 റൺസിനും തോൽപ്പിച്ചപ്പോൾ ‘പ്ലയർ ഓഫ് ദ മാച്ച്’ ആയി തിരഞ്ഞെടുക്കപ്പെട്ടു.

കഴിഞ്ഞ കുറച്ച് വർഷങ്ങളായി ആഭ്യന്തര സർക്യൂട്ടിൽ സെൻസേഷണൽ ഫോമിലാണ് സർഫറാസ്.2022 രഞ്ജി ട്രോഫി സീസണിൽ 982 റൺസുമായി ടോപ് സ്‌കോററായ അദ്ദേഹം 2019/20 സീസണിലും 928 റൺസ് നേടിയിരുന്നു.സർഫറാസിന് അസാധാരണമായ രീതിയിൽ കളിക്കാൻ കഴിയുമെന്നും സ്പിന്നിലെ മികച്ച കളിക്കാരനാണെന്നും തൻ്റെ യുട്യൂബ് ചാനലിൽ സംസാരിച്ച ആകാശ് ചോപ്ര പറഞ്ഞു.

വിശാഖിൽ ഇന്ത്യയ്ക്കായി അരങ്ങേറ്റം കുറിക്കാൻ സർഫറാസ് തയ്യാറാണെന്നും ചോപ്ര പറഞ്ഞു.“സർഫറാസ് ഖാനും രജത് പട്ടീദാറും ഈ ടീമിനൊപ്പം ലഭ്യമാണ്. സർഫറാസിൻ്റെ അടുത്തേക്ക് പോകാം, കാരണം അദ്ദേഹത്തിന് അസാധാരണമായ രീതിയിൽ കളിക്കാൻ കഴിയും, കൂടാതെ മികച്ച സ്പിൻ കളിക്കാരനാണ്, ”ചോപ്ര പറഞ്ഞു.