സീസണിലെ ആദ്യ ജയവുമായി മാഞ്ചസ്റ്റർ യുണൈറ്റഡ് : മൂന്നാം വിജയവുമായി റയൽ മാഡ്രിഡ് : വിജയം തുടർന്ന് ബയേൺ മ്യൂണിക്ക് : ആഴ്സണലിനും ജയം : ഇന്റർ മിലാനും നാപോളിക്കും ജയം
ഈ സീസണിലെ ചാമ്പ്യൻസ് ലീഗിലെ ആദ്യ ജയം നേടിയിരിക്കുകയാണ് മാഞ്ചസ്റ്റർ യുണൈറ്റഡ്. ഇന്നലെ നടന്ന മത്സരത്തിൽ എഫ്‌സി കോപ്പൻഹേഗനെ ഒരു ഗോളിനാണ് മാഞ്ചസ്റ്റർ യുണൈറ്റഡ് പരാജയപ്പെടുത്തിയത്. രണ്ടാം പകുതിയിൽ ഹാരി മഗ്വയർ നേടിയ ഗോളിനായിരുന്നു മാഞ്ചസ്റ്റർ യുണൈറ്റഡിന്റെ ജയം. അവസാന മിനുട്ടിൽ പെനാൽറ്റി രക്ഷപ്പെടുത്തിയ ഗോൾകീപ്പർ ആന്ദ്രേ ഒനാനയാണ് മാഞ്ചസ്റ്റർ യുണൈറ്റഡിന്റെ ഹീറോ.
ഒരു വർഷത്തെ ഇടവേളയ്ക്ക് ശേഷം ചാമ്പ്യൻസ് ലീഗിലേക്ക് തിരിച്ചെത്തിയ എറിക് ടെൻ ഹാഗിന്റെ ടീം മൂന്ന് ഗെയിമുകൾക്ക് ശേഷം വിലയേറിയ മൂന്ന് പോയിന്റുകൾ നേടിയ ശേഷം ഗ്രൂപ്പ് എയിൽ മൂന്നാം സ്ഥാനത്തേക്ക് നീങ്ങി. സമീപ മാസങ്ങളിൽ ആരാധകരുടെ അധിക്ഷേപത്തിന് ഇരയായ മാഗ്വെയർ 72-ാം മിനിറ്റിൽ ക്രിസ്റ്റ്യൻ എറിക്സന്റെ ലോംഗ് ബോളിൽ നിന്നും യുണൈറ്റഡിന്റെ വിജയ ഗോൾ നേടി. എന്നാൽ ഇഞ്ചുറി ടൈമിൽ യുണൈറ്റഡ് പെനാൽറ്റി വഴങ്ങിയെങ്കിലും കോപ്പൻഹേഗന്റെ ജോർദാൻ ലാർസൺ എടുത്ത കിക്ക് ഒനാന രക്ഷപെടുത്തി യുണൈറ്റഡിന് ജയം നേടിക്കൊടുത്തു.2021 നവംബർ 23-ന് വില്ലാറിയലിൽ 2-0ന് എവേ വിജയത്തിന് ശേഷം ചാമ്പ്യൻസ് ലീഗിൽ യുണൈറ്റഡിന്റെ ആദ്യ വിജയമായിരുന്നു ഇത്.
ഗ്രൂപ്പിലെ മറ്റൊരു മത്സരത്തിൽ ബയേൺ മ്യൂണിക്ക് ഒന്നിനെതിരെ മൂന്ന് ഗോളുകൾക്ക് ഗലാറ്റസറെയെ പരാജയപ്പെടുത്തി.വിജയത്തോടെ ചാമ്പ്യൻസ് ലീഗ് ഗ്രൂപ്പ് ഘട്ടത്തിൽ ബയേൺ തങ്ങളുടെ റെക്കോർഡ് വിജയ പരമ്പര 16 മത്സരങ്ങളാക്കി ഉയർത്തി. ഗ്രൂപ്പ് ഘട്ടത്തിൽ തോൽവിയറിയാതെ 37 മത്സരങ്ങൾ എന്ന റെക്കോർഡും ജർമ്മൻ ചാമ്പ്യന്മാർ നേടിയിട്ടുണ്ട്.ഒമ്പത് പോയിന്റുമായി ബവേറിയൻ ഗ്രൂപ്പിൽ ഒന്നാമതെത്തിയപ്പോൾ ഗലാറ്റസരെ രണ്ടാം സ്ഥാനത്താണ്.കിംഗ്സ്ലി കോമാൻ (8′)ഹാരി കെയ്ൻ (73′)ജമാൽ മുസിയാല (79′) എന്നിവരാണ് ബയേണിന്റെ ഗോളുകൾ നേടിയത്. 30 ആം മിനുട്ടിൽ മൗറോ ഇക്കാർഡി പെനാൽറ്റിയിൽ നിന്നും തുർക്കിഷ് ക്ലബ്ബിന്റെ ആശ്വാസ ഗോൾ നേടി.
ചാമ്പ്യൻസ് ലീഗ് ഗ്രൂപ്പ് സിയിൽ നടന്ന മത്സരത്തിൽ റയൽ മാഡ്രിഡ് ഒന്നിനെതിരെ രണ്ടു ഗോളുകൾക്ക് സ്‌പോർട്ടിംഗ് ബ്രാഗയെ പരാജയപ്പെടുത്തി.റോഡ്രിഗോയും ജൂഡ് ബെല്ലിംഗ്ഹാമും ഇരു പകുതികളിലുമായി നേടിയ ഗോളിലായിരുന്നു റയലിന്റെ ജയം.16-ാം മിനിറ്റിൽ റോഡ്രിഗോയുടെ ക്ലോസ് റേഞ്ച് സ്ട്രൈക്കിലൂടെ റയൽ മാഡ്രിഡ് സ്കോറിന് തുറന്നു.വിനീഷ്യസ് ജൂനിയർ കൊടുത്ത പാസിൽ നിന്നായിരുന്നു ബ്രസീലിയന്റെ ഗോൾ പിറന്നത്.വിനീഷ്യസിലൂടെ ലീഡ് വർദ്ധിപ്പിക്കാനുള്ള നിരവധി അവസരങ്ങൾ പാഴായ മാഡ്രിഡ് നഷ്ടപ്പെടുത്തി.
എന്നാൽ 61 ആം മിനുട്ടിൽ ബെല്ലിംഗ്ഹാമിലൂടെ റയൽ ലീഡ് ഇരട്ടിയാക്കി.1998-ൽ ക്രിസ്റ്റ്യൻ കരേംബ്യൂവിന് ശേഷം തന്റെ ആദ്യത്തെ മൂന്ന് ചാമ്പ്യൻസ് ലീഗ് മത്സരങ്ങളിൽ ഓരോന്നിലും ഗോൾ നേടുന്ന രണ്ടാമത്തെ റയൽ മാഡ്രിഡ് കളിക്കാരനായി ഇംഗ്ലീഷ് താരം മാറി. റയലിനായി 11 മത്സരങ്ങളിൽ നിന്ന് ബെല്ലിംഗ്ഹാമിന്റെ പത്താം ഗോളായിരുന്നു ഇത്.63-ാ ആം മിനുട്ടിൽ പ്രതിരോധത്തിലെ പിഴവ് മുതലെടുത്ത് ആൽവാരോ ജാലോ ബ്രാഗക്കായി ഒരു ഗോൾ മടക്കി .മൂന്നു മത്സരങ്ങളിൽ നിന്നും 9 പോയിന്റുമായി റയൽ ഒന്നാം സ്ഥാനത്താണ്.
ആദ്യ പകുതിയിൽ ഗബ്രിയേൽ മാർട്ടിനെല്ലിയും ഗബ്രിയേൽ ജീസസും നേടിയ ഗോളുകൾക്ക് ആഴ്സണൽ സേവിയ്യയെ പരാജയപ്പെടുത്തി. ഒന്നിനെതിരെ രണ്ടു ഗോളുകളുടെ വിജയമാണ് ആഴ്സണൽ നേടിയത്. ഒന്നാം പകുതിയുടെ ഇഞ്ചുറി ടൈമിൽ ഗബ്രിയേൽ മാർട്ടിനെല്ലി നേടിയ ഗോളിൽ ആഴ്സണൽ ലീഡ് നേടി. 53 ആം മിനുട്ടിൽ ജീസസ് ആഴ്‌സനലിന്റെ ലീഡുയർത്തി. 58 ആം മിനുട്ടിൽ നെമഞ്ജ ഗുഡെൽജ് സെവിയ്യക്കായി ഒരു ഗോൾ മടക്കി.മൂന്ന് കളികളിൽ നിന്ന് ആറ് പോയിന്റുമായി ആഴ്സണൽ ഗ്രൂപ്പിൽ ഒന്നാമതാണ്. അഞ്ച് പോയിന്റുമായി ലെൻസ് രണ്ടാം സ്ഥാനത്തും, രണ്ട് വീതം പോയിന്റുമായി സെവിയ്യയും പിഎസ്‌വി ഐന്തോവനും മൂന്നും നാലും സ്ഥാനത്താണ്.
ചാമ്പ്യൻസ് ലീഗ് ഗ്രൂപ്പ് ഡിയിൽ നടന്ന മത്സരത്തിൽ ഇന്റർ മിലാൻ ഓസ്ട്രിയൻ ചാമ്പ്യൻമാരായ എഫ്‌സി സാൽസ്‌ബർഗിനെ 2-1 ന് പരാജയപ്പെടുത്തി.അലക്‌സിസ് സാഞ്ചസിന്റെ ആദ്യ ഗോളും രണ്ടാം പകുതിയിൽ ഹകൻ കാൽഹാനോഗ്ലുവിന്റെ പെനാൽറ്റിയും ഇന്റെരിനു വിജയം നേടിക്കൊടുത്തു. ബെൻഫിക്കയ്‌ക്കെതിരെ സ്വന്തം തട്ടകത്തിൽ 1-0ന് ജയിച്ച് റയൽ സോസിഡാഡ് പോയിന്റ് ടേബിളിൽ ഒന്നാം സ്ഥാനത്തണ്. ഏഴു പോയിന്റുണ്ടെങ്കിലും ഇന്റർ രണ്ടാം സ്ഥാനത്താണ്.ചാമ്പ്യൻസ് ലീഗ് ഗ്രൂപ്പ് സി മത്സരത്തിൽ യൂണിയൻ ബെർലിനെതിരെ ഒരു ഗോൾ ജയവുമായി നാപോളി.ജിയാക്കോമോ റാസ്‌പഡോറിയാണ് നാപോളിയുടെ വിജയ ഗോൾ നേടിയത്.
