‘നിനക്ക് എങ്ങനെ കളിക്കണമെന്ന് അറിയില്ല’ : പുറത്താക്കാൻ ഏറ്റവും എളുപ്പമുള്ള ബാറ്റർ സെവാഗായിരുന്നെന്ന് മുൻ പാക് ബൗളർ

ഇന്ത്യ-പാക് ക്രിക്കറ്റ് മത്സരം ലോകത്തിലെ ഏറ്റവും തീവ്രമായ ഒന്നാണ്.ഇരു രാജ്യങ്ങളിലെയും ആരാധകർ മത്സരങ്ങളെ വളരെ ഗൗരവത്തോടെയാണ് കാണുന്നത്. ബൗളർമാരും ബാറ്റർമാരും തങ്ങളുടെ എതിരാളികളുടെ മേൽ ആധിപത്യം സ്ഥാപിക്കാൻ ഏതു വഴിയും പുറത്തെടുക്കും.മുൻ പാകിസ്ഥാൻ സീമർ റാണ നവേദ്-ഉൽ-ഹസൻ വീരേന്ദർ സെവാഗിന്റെ അത്തരത്തിലുള്ള ഒരു സംഭവം അനുസ്മരിച്ചു.

ഇന്ത്യയും പാക്കിസ്ഥാനും തമ്മിലുള്ള മത്സരത്തെക്കുറിച്ച് പറയുമ്പോൾ പുറത്താക്കാൻ ഏറ്റവും എളുപ്പമുള്ള ബാറ്ററായി റാണ തെരഞ്ഞെടുത്തത് വീരേന്ദർ സെവാഗിനെയാണ്.2004-05 പരമ്പരയിൽ താൻ ഇന്ത്യൻ ബാറ്ററെ സ്ലെഡ്ജ് ചെയ്തതായും അദ്ദേഹം വെളിപ്പെടുത്തി. 2003-2010 കാലഘട്ടത്തിൽ പാക്കിസ്ഥാനുവേണ്ടി 9 ടെസ്റ്റുകളും 74 ഏകദിനങ്ങളും 4 ടി20 മത്സരങ്ങളും കളിച്ച റാണ യഥാക്രമം 18, 118, 5 വിക്കറ്റുകൾ വീഴ്ത്തി.

“ഞാൻ ഒരു സംഭവം പറയാം. ഞങ്ങൾ വിജയിച്ച 2004-05 പരമ്പരയെക്കുറിച്ചാണ് ഞാൻ സംസാരിക്കുന്നത്. ഞാൻ ടൂർണമെന്റിലെ കളിക്കാരനായിരുന്നു. പരമ്പരയിൽ ഞങ്ങൾ 2-0ന് പിന്നിലായിരുന്നു പരമ്പരയിലെ മൂന്നാം മത്സരത്തിൽ സെവാഗ് തകർപ്പൻ പ്രകടനമാണ് നടത്തിയത്. അവർ ഏകദേശം 300 റൺസ് സ്കോർ ചെയ്തു, സെവാഗ് 85-നോട് അടുത്തു. ഞാൻ ഇൻസി ഭായിയോട് പന്ത് തരാൻ ആവശ്യപ്പെട്ടു. ഞാൻ സ്ലോ ബൗൺസർ എറിഞ്ഞു,” അദ്ദേഹം നാദിർ അലി പോഡ്‌കാസ്റ്റിൽ പറഞ്ഞു.

“ഞാൻ സെവാഗിന്റെ അടുത്ത് ചെന്ന് പറഞ്ഞു ‘നിനക്ക് കളിക്കാൻ അറിയില്ല. നിങ്ങൾ പാക്കിസ്ഥാനിലായിരുന്നെങ്കിൽ, നിങ്ങൾ എന്നെങ്കിലും രാജ്യാന്തര ടീമിൽ ഇടംപിടിക്കുമായിരുന്നുവെന്ന് ഞാൻ കരുതുന്നില്ല, ”അദ്ദേഹം പറഞ്ഞു.”അവൻ എന്നോട് കുറച്ച് കാര്യങ്ങൾ പറഞ്ഞു. തിരിച്ചു പോരുമ്പോൾ ഞാൻ ഇൻസി ഭായിയോട് പറഞ്ഞു… ‘അടുത്ത പന്തിൽ സെവാഗ് പുറത്താകുകയാണ്.ഇൻസി ആശ്ചര്യപ്പെട്ടു. ഞാൻ ബാക്ക്-ഓഫ്-ദി-ഹാൻഡ് സ്ലോ ബോൾ എറിഞ്ഞു, പ്രകോപിതനായ സെവാഗ് അത് വലുതായി അടിക്കാൻ ശ്രമിച്ചു, പക്ഷേ പുറത്തായി. വിക്കറ്റ് വളരെ പ്രധാനമായിരുന്നു, ആ മത്സരം ഞങ്ങൾ ജയിച്ചു. ഫാസ്റ്റ് ബൗളറുടെ ചില തന്ത്രങ്ങളാണിവ,” അദ്ദേഹം കൂട്ടിച്ചേർത്തു.

“സെവാഗിനെ പുറത്താക്കാൻ എളുപ്പമായിരുന്നു എന്നാൽ ബൗൾ ചെയ്യാൻ ഏറ്റവും ബുദ്ധിമുട്ടുള്ളത് രാഹുൽ ദ്രാവിഡായിരുന്നു, അദ്ദേഹം കൂട്ടിച്ചേർത്തു.സെവാഗിനെ നവേദ്-ഉൽ-ഹസൻ പുറത്താക്കിയെങ്കിലും, വിശാഖപട്ടണത്ത് നടന്ന മത്സരത്തിൽ പാകിസ്ഥാൻ 58 റൺസിന് പരാജയപ്പെട്ടു.