‘ഇത് ബാസ്ബോളിൻ്റെ ഏറ്റവും വലിയ വിജയമായിരുന്നു’ : ഹൈദരാബാദ് ടെസ്റ്റിലെ വിജയത്തെക്കുറിച്ച് ഇംഗ്ലീഷ് ക്യാപ്റ്റൻ ബെൻ സ്റ്റോക്സ് | IND vs ENG

ഇംഗ്ലണ്ടിനെതിരായ ഒന്നാം ടെസ്റ്റില്‍ അടിയറവ് പറഞ്ഞ് ഇന്ത്യ. ആദ്യ ടെസ്റ്റ് 28 റണ്‍സിനാണ് ഇംഗ്ലണ്ട് വിജയം നേടിയത്.നാലാം ദിനം അവസാന സെഷനില്‍ തകര്‍ന്നടിഞ്ഞ ഇന്ത്യ 202 റണ്‍സിന് ഓള്‍ഔട്ടായി. ഏഴ് വിക്കറ്റ് നേടിയ ലെഫ്റ്റ് ആം സ്പിന്നർ ടോം ഹാർട്ട്‌ലിയുമാണ് ഇന്ത്യയെ തകർത്തത്.ആദ്യ ഇന്നിങ്‌സ് ലീഡ് നേടിയ ശേഷമാണ് ഇന്ത്യ പരാജയം വഴങ്ങിയത്.ഹൈദരാബാദ് ടെസ്റ്റിലെ ഇംഗ്ലണ്ട് വിജയത്തെ ബാസ്ബോളിൻ്റെ ഏറ്റവും വലിയ വിജയമായി ബെൻ സ്റ്റോക്സ് പ്രശംസിച്ചു.

“ഞാൻ നായകസ്ഥാനം ഏറ്റെടുത്തതുമുതൽ ഇത് 100% ഞങ്ങളുടെ ഏറ്റവും വലിയ വിജയമാണ്” എന്നാണ് ഇംഗ്ലീഷ് ക്യാപ്റ്റൻ ബെൻ സ്റ്റോക്സ് അഭിപ്രായപ്പെട്ടു.ഹാർട്ട്‌ലിയുടെ സെൻസേഷണൽ സ്‌പെല്ലും ഒല്ലി പോപ്പിൻ്റെ അവിസ്മരണീയമായ 196 റൺസും 2013-ന് ശേഷം നാട്ടിൽ നാലാമത്തെ ടെസ്റ്റ് തോൽവി ഏറ്റുവാങ്ങാൻ ഇന്ത്യയെ നിർബന്ധിതരാക്കി.ആദ്യ ഇന്നിംഗ്‌സിൽ 100-ലധികം ലീഡ് (190 റൺസ്) നേടിയിട്ടും ഒരു ഹോം ടെസ്റ്റ് മത്സരത്തിൽ ഇന്ത്യ തോൽക്കുന്നത് ചരിത്രത്തിലാദ്യമായിരുന്നു.

ആദ്യ ഇന്നിംഗ്‌സിൽ 88 പന്തിൽ 70 റൺസ് നേടി ക്യാപ്റ്റൻ ബെൻ സ്റ്റോക്‌സും ടെസ്റ്റ് ക്യാപ്റ്റനെന്ന നിലയിൽ മികച്ച പ്രകടനം നടത്തി.2022 ഏപ്രിലിൽ സ്റ്റോക്‌സ് റെഡ് ബോൾ ക്യാപ്റ്റനായി മാറിയതിന് ശേഷം 20 മത്സരങ്ങളിൽ 14ലും ഇംഗ്ലണ്ട് വിജയിച്ചു.തൻ്റെ നായകത്വത്തിൽ ഇംഗ്ലണ്ടിൻ്റെ ഏറ്റവും മികച്ച വിജയമായാണ് സ്റ്റോക്‌സ് ഇന്നത്തെ വിജയത്തെ വിലയിരുത്തിയത്.

“ഞാൻ നായകസ്ഥാനം ഏറ്റെടുത്തതിന് ശേഷം, ഒരു ടീമെന്ന നിലയിൽ ഞങ്ങൾക്ക് ഒരുപാട് മികച്ച നിമിഷങ്ങൾ ഉണ്ടായിരുന്നു,” മത്സരത്തിന് ശേഷമുള്ള അവതരണത്തിനിടെ സ്റ്റോക്സ് ഹർഷ ഭോഗ്ലെയോട് പറഞ്ഞു. “ഞങ്ങൾക്ക് ഒരുപാട് മികച്ച വിജയങ്ങൾ ഉണ്ട്, ഞങ്ങൾ ചില അത്ഭുതകരമായ ഗെയിമുകളിൽ ഏർപ്പെട്ടിട്ടുണ്ട്.ഞാൻ നായകസ്ഥാനം ഏറ്റെടുത്തതുമുതൽ ഇത് 100% ഞങ്ങളുടെ ഏറ്റവും വലിയ വിജയമാണ്” സ്റ്റോക്സ് പറഞ്ഞു.